叫春雜記 (1/7–22/7)

W打算來訪，問我一齊聽Concert可好。畀咗幾個選擇我，我一見有Brahms就應了好。W send了個感動流涕的Sticker，話「好撚感動。我記得以前啲人同我講『嘩 知妳聽Brahms就知你好撚多嘢諗』」我笑笑，我一開始聽Brahms因為姐話好聽，跟屁蟲當然都要聽，一聽就愛上。

Brahms嘅音樂，真係有種多嘢諗嘅感覺。百轉千迴，唔係好有氣勢嘅旋律，但又唔係全然溫柔，有時好俏皮，有時好哀傷，有時好焦慮，有時思慮甚多，好似我典床典蓆嘅狀態 — 有時ok有時唔ok咁樣。

好人話Brahms死唔斷氣，好悶。但我覺得Brahms真係好貼近人性，唔機械化。聽住Brahms溫書零舍入腦又係另一個我好鍾意聽嘅原因。

23歲生日了，留咗响屋企全日做嘢。完全無出街，本來要上堂都因為老師病而取消咗。難得一日無嘢做，就選擇留响屋企做埋啲嘢，一個人自己摺埋沖茶睇書溫書過咗一日，好開心。最好的生日活動就係好好過一日想要嘅生活。

正日前一日，同朋友出咗去食飯。本來以為係簡單食餐飯，朋友們會買蛋糕已經係Bonus。點知朋友們精心準備咗一大串驚喜，又有好靚嘅蛋糕好多件、一個大氣球、生日帽、煙花蠟燭、寫滿字嘅生日卡，餐廳姨姨們因為朋友曾經响嗰度返過工嘅關係，為我整咗壽包。好幸福，雖然有啲尷尬，但真係好開心，好有被當成一回事嘅沾沾自喜感覺。

W終於來訪，係我第一次收留朋友少少壓逼感都冇。煲咗湯、煮咗飯俾佢食，然後傾下心事過咗一晚。第二日一齊去啊最鐘意嘅cafe、去Vintage Store買衫、聽Brahms嘅Concert、去行下紅燈區、飲嘢、Clubbing，好減壓。

我哋感嘆咗好多次，大個咗就開始搵到啱Vibe嘅人。W同佢Flatmate係我好難得搵到好啱傾、而且做嘢目標相近嘅人。有次我去探佢哋，响廚房食早餐，講講下無聊嘢，話題一轉就去開咗學術台，暫時傾計滿足感無一個人及得上。

同埋同W真係興趣好相近，大家都好鍾意類似嘅嘢。一齊去聽Concert一齊被Brahms同Schumann深深打動，一齊覺得Bach唔好聽；一齊想做poilitical theory嘅相關project；一齊做垃圾屎典床典蓆… 有時遇到知音真係唔容易，遇到要好好珍惜。

W離開後就無乜理由唔繼續閉關溫書。咁啱讀到Trade Law同國際法，不停問自己到底讀呢啲有冇用。讀嘅時候亦都好Skeptical，國際法其實唔係「法」，亦都唔係大家聽落去或者我啲律師同學覺得咁有用。其實講到尾都係Realist政治，然後又諗到香港人無乜leverage去為香港做啲乜，自己無權無勢冇嘢做到。

無力感好重。然後又提醒自己，克服無力感唯有「去做」，而家我可以做到嘅嘢只有溫書搵工寫Paper。考完個試就可以努力去準備自己想lauch嘅project，去做啲事。於是繼續拎起支筆繼續溫書。