閱讀報告：《哈利波特》(5)
人有冇自由意志？你係咩人唔重要，最重要係你點選擇。
到底人有冇自由意志？呢個問題我耐唔耐就會同K討論。
K一直都話冇，我一直都模棱兩可唔係好落到主意要唔要相信有冇。
“Exactly,” siad Dumbledore, beaming once more.
“Which makes you very different from Tom Riddle. It is our choices, Harry, that show what we truly are, far more than our abilities”
「選擇」係Harry Potter入面其中一個好大嘅命題。
由一開始，Harry搭火車去學校，途中Malfoy搵上門，同Harry講你可以唔駛同啲窮兼且唔高尚嘅巫師來往，嚟同我坐嘅時候，Harry揀咗拒絕。Harry坐响大廳帶住Sorting Hat嘅時候，佢自己選擇唔要入Slytherin。去到之後，佢選擇唔殺Wormtail、選擇折磨Bellatrix、選擇親自赴死了結Voldemort…
每一個選擇，我哋都叫見到Harry係一個點樣嘅人。其他角色都一樣。
Percy一開始係趾高氣揚嘅嘅高材生，做Prefect、做Headboy，成績好，得屋企媽媽嘅重視。畢業之後進入魔法部，第一份工因為老細被人落咗咒到唔知，好樣衰。但之後明知道魔法部為咗借佢嚟監視全家，仍然揀升職入Minster Office。甚至開口埋怨屋企嘅壞名聲一直影響佢仕途，同屋企人反面。然後一直留响魔法部，直到Hogwarts開波打仗，突然出現返，同全家人道歉和好。
Percy: “I was a fool! I was an idiot, I was a pompous prat, I — was a — a — “
Fred Weasley: “Ministry-loving, family-disowning, power-hungry moron.”
Percy: “Yes, I was!”
Malfoy由故事嘅開頭，一直去到第六集都係乞人憎到爆炸嘅細路。傲慢、輕佻、自視甚高、Bully其他人、用錢撻人… 去到第六集仲好MK地以為好威咁加入Deatheaters，殊不知Voldemort為咗報復佢爸爸嘅失敗，將會派去殺Dumbledore。Malfoy嘗試好幾次都失敗，每次都害到其他人受傷。去到最後，同佢同Dumnbledore面對面嘅時候，佢點樣都落唔到手。
佢嘅父母本來係最忠貞嘅Deatheaters，但自從知道個仔畀人派去殺Dumbledore之後，所有嘢對佢哋來講都唔再重要。為咗救個仔佢哋可以欺騙Voldemort，Hogwarts打仗佢哋全然不顧，只係想搵返個仔。
曾經响Harry生命入面擔當過長輩同教佢對抗黑魔法嘅Remus Lupin，去到面對自己嘅私事嘅時候，其實都係一個懦夫，會選擇逃避、選擇一走了之。畀Harry當面鬧咗一次之後，選擇咗返去老婆身邊。
呢幾個例子都好似話人其實有得揀，而且點揀比你係咩人更加重要，而好似Dumbledore所講 “We must all face the choice between what is right and what is easy.”
對於每一個角色嚟講，佢哋都面對好多選擇，而佢哋似乎都係有得揀行善抑或行惡。但其實人係咪真係有得揀？
如果Voldemort冇將Harry嘅父母殺死，Harry可唔可以保持一顆赤子之心，一直努力同反派對抗？
如果Voldemort嘅外公Marvolo Gaunt唔係一個廢老，冇對Merope咁苛刻嘅話，Voldemort會唔會出世？如果Merope冇停止對Tom Riddle Senior用藥嘅話，Voldemort會唔會係開心快樂嘅小朋友？會唔會對自己嘅祖先同出身咁執著？
如果Snape從來都無遇上Lily Potter，冇鍾意佢，咁佢仲會唔會做間諜？會唔會咁落力幫Dumbledore同埋Harry?
我哋做嘅所謂「選擇」其實都係過去嘅因果所組成嘅嘢，我今日响到做滑鼠娘娘讀Law，都係環境使然。係以前種落嘅因，成為今日我承受／享受緊嘅果。而我一開始嘅因，就係我出世，有而家嘅爸爸媽媽。佢哋教養好好，連帶我都識得明辨是非。然後引出後面嘅一切，不論係抑鬱定係讀書都係環環相扣嘅因果。
但每一步感覺上，我都有得揀。好似係抑鬱其實都係選擇返嚟。好似Harrt Potter咁，有得揀，佢哋每一個人都有得揀。
中文老師成日同我講「人想改變，只會因為佢想改變。冇生命影響生命呢回事。」但一個人點樣嘅先會想選擇改變？ K話過「仆街仆到盡頭就會改變」，意即唔到你唔改變，你就會去改變。
諗返其實都係，唔係發生過好多事食過好多屎，我都唔會變成今日咁。唔係Voldemort殺咗Harry父母，佢都唔會追到天腳底都要Voldemort死。唔係Snape對Lily一見鍾情，最後都唔會有令咁多人淚灑當場嘅結局。
咁講嘅話Malfoy其實係應該殺咗Dumbledore架喎，佢係邪惡嘅細路嚟。但去到嗰個當下，佢都係落唔到手，或者選擇唔到落手。除咗話佢其實仲有一絲人性仲有少少良知之外，以致佢揀唔到落手之外，書入面就冇畀到其他答案點解會咁選擇。
但最難搞係人生無如果，都無一個「作者」出嚟為你解惑，話你知點解呢個角色咁咁咁。
即使我哋感覺好似自己做緊選擇咁，其實可能背後有一百個我唔知道嘅因果關係運作緊。我哋見到嘅可能係Hume講嘅嗰張枱，枱上面有幾個波，我哋見到A波撞落去B波，然後B波郁。但可能枱底下有磁石令到啲波郁，我哋永遠都唔會知道。
咁即係我有冇得揀？ 如果我無得揀，咁即係點？咁即係我嘅選擇其實反映唔到我嘅本質？定係所有嘢一早整定，我只係負責演出嘅戲子？如果係咁，點解我要有意識去諗呢啲嘢？
有時心情唔好就會咁樣轉落去，然後好厭世，覺得既然係咁咩都無所謂。
但其實有冇得揀嘅呢個問題，係咪真係需要一個答案？
有答案又點呢？如果有日俾你遇到全知全能嘅神，佢答你「有。」咁都係咁樣過日子，努力做個好啲嘅人，努力做一個心地善良幫到人嘅人。如果佢答「冇。」咁我係咪即刻自殺呢，又唔係，只係會有啲唔知點，應該會追問佢「咁點解你要畀我諗呢個問題呢 點解人要有意識？」
我諗，我自己其實唔係好想接受「人其實無得揀」。就算心底暗暗知道可能係真，但都唔係好想接受吾，因為太灰機了。但另一方面，「人無得揀」又令我莫名其妙地安心，咁即係我以後嘅事都將會安排好，我唔使擔心，照著劇本行就可以，唔係好使負責任啦。 但其實我係永遠唔會知劇本係咩，心情都係高低起趺淆底不安…
呢個時候，我就覺得佛家講得好啱 — 「過去心不可得，現在心不可得，未來心不可得」，都係好好過好當下就算。因為Harry都好似係咁。
