閱讀報告：《哈利波特》(4)
對住唔道德嘅敵人，我哋需唔需要堅守道德？
Harry對抗Voldemort嘅情節如下：
Voldemort靠住Harry嘅血得以復活，Harry冒死返去通知Dumbledore同魔法部，但後者覺得佢做謠。魔法部於是不停用輿論機器、政策做Harry，話佢貪慕虛榮講大話。鳳凰會再度成立，但因為魔法部嘅打壓只能地下進行，所有成員都被監察。之後Voldemort去魔法部搶預言，Harry因為以為Sirius被捉而出現阻止Voldemort/ Deatheaters。魔法部人員後知後覺地出現，終於發現原來Harry真係冇講大話。
之後魔法部開始好認真想對抗Voldemort，响唔肯道歉嘅情況下期望Harry會為佢哋背書。Harry拒絕，就被魔法部部長話佢同加以留難。 之後魔法部倒台，Vodemort掌權，Harry變成朝廷欽犯，處境危險，展開流亡嘅對抗。Harry到處消滅Horcrux。最尾發現自己都係一個Hocrux，於是响Hogwarts大戰先被「殺死」（像徵佢克服咗對死亡嘅恐懼），然後再等Voldemort決鬥，靠著神奇嘅巧合戰勝。
Harry對Voldemort途中，固然佢係一個好有道德勇氣同高尚情操嘅人，但佢都做咗好多「唔應該做嘅事」。
－佢對Bellatrix (殺死Sirius嘅兇手)施展酷刑咒
－潛入銀行偷竊Horcrux
－混入魔法部，仲帶住班犯人離開
－違反宵禁
－組織學生軍隊，私自學魔法部禁止嘅防禦／攻擊咒語
－對Malfoy施展傷害性嘅咒語
但同一時間，Harry係一個善良嘅人：
－响「萬應室」冒性命危險騎著掃帚折返救助被惡魔之火圍困嘅Malfoy等人
－對住Voldemort由始至終都只用繳械咒還擊，而非不赦咒等等
我哋對住唔道德嘅大魔頭，完全唔理是非黑白嘅大眾（魔法部嘅打壓／同相信輿論機器嘅人），我哋係咪仍然要堅守道德？
答案係： 要。但道德唔等於「守法」。
Harry用酷刑咒對付Bellatrix，對Malfoy用咒語，佢當然錯，濫用私刑係錯。但你可唔可以怪佢？ Bellatrix殺咗佢教父，Harry有一百個理由去憎恨佢。(Malfoy嗰次，佢係想試下個咒語，但點知好大殺傷力)Voldemort係佢殺父母仇人，佢將會千刀萬剮都不為過，但佢每一次都只係用繳械咒。
Harry去搞學生軍隊、潛入銀行偷竊Horcrux等等，做犯法嘢，佢無錯。犯法都好，呢件事係道德嘅。但輿論就會攻擊佢呢樣果樣。
如果佢跟隨輿論同大眾要求嘅「守法」嗰條線，Voldemort應該掌權兼且千秋萬世。
書入面描寫Harry做決定嘅時候，好少去考慮「合唔合法」，而係諗「啱唔啱」、「應唔應該」，甚至有時係直覺式嘅衝動覺得要做就去做。作為理性、守法嘅代表Hermione，好多時都係皺住眉頭阻止佢，覺得凡事都要深思熟慮。有時係Harry啱，有時係Hermione啱。
但响好多集，Hermione作為乖乖女，都帶頭違反校規去做「啱嘅事」。去偷材料煮變身水、鼓動Harry成立學生軍隊。理性有時都會叫你去做犯法／世俗覺得有問題嘅事。
如果講道德，都要討論「咩先係道德」，而我哋知道唔會有答案。每一個人都有自己嘅選擇。愛就係選擇，選擇就係捨棄，犧牲就係意義。你可以為你所相信嘅原則犧牲幾多？
Harry响知道自己係其中一個Horcrux之後，佢甚至願意選擇去送死，以換取Voldemort嘅消失。克服對死亡嘅恐懼，唔係佢唔驚，而係佢驚佢都去咗。
好多時，都唔係大家嘅道德信念有冇問題，而係大家係咪真係願意選擇同犧牲。通常大家嘅信念都冇錯，大家都想要民主，想政府回應，但大家都唔願意選擇犧牲。Harry如此高尚，繼平除低口罩如此高尚，原因在於佢哋肯犧牲，佢哋真係好「愛」佢哋相信嘅嘢，佢哋真係選擇，真係犧牲。
