閱讀報告：《哈利波特》（1）

愛與勇氣最為重要。

《哈利波特》係我最喜愛嘅小說，沒有之一。
我對呢套小說嘅熱愛可以反映到响屋企套書嘅狀況上面—中文翻譯本上面嘅燙金「哈利波特」幾隻字甩晒色，英文版每本望落去都飽經滄桑。一套七本連同其他《怪獸與他們的產地》、《穿越歷史的魁地奇》、《吟遊詩人皮陀故事集》，每一本都應該唔止睇過10次。

我記得第一次睇《哈利波特》嘅時候，第五集《鳳凰會的密令》都未出，應該仲係小學生。個陣逢星期二四都要去游水，搭地鐵出九龍灣嗰半個鐘就係睇書嘅最好時間。有一次响書架拎咗本《哈利波特：神秘的魔法石》，就開始咗呢個歷時好多年嘅大冒險。

當時屋企得第一至第四集，好似係姑媽借畀爸爸定家姐睇的。出咗第五集《鳳凰會的密令之後，仲係問英文班嘅可愛男仔同學分開借上下集來睇。之後爸媽見我對套書念念不忘嘅樣子，就買咗第五集畀我。

好記得，之後出《混血王子的背叛》嘅時候，爸爸媽媽同我約法三章，要保持英文默書成個學期都係100分先會買畀我。但我最後一次默書因為冇咗粒full stop畀人扣咗一分，畀默書簿爸爸睇嘅時候喊到傻，但爸爸無出聲遞咗本書畀我，即刻破涕為笑。

《死神的聖物》買咗之後，媽媽將佢收埋咗，因為驚我掛住睇書，唔做功課，點知我搵到兩本書出嚟，一放學就睇晒佢，然後當然就係冇做功課俾人鬧到飛起。

由於呢套書對我影響太深遠嘅關係，我應該會好長氣咁寫幾篇閱讀報告哈哈，不然唔夠尊重我心目中最好嘅小說。簡單來講，呢套小說係講述哈利波特嘅冒險故事，由佢11歲好似講到佢30幾歲，由塞豆窿變成大人，對抗壞人嘅故事。

由第一至第三集，故事都係熱血大冒險式發展。Harry一個人，連同Hermione同Ron，去「惹麻煩」然後解決。好多時都係基於Harry嘅正義感同義氣，而開展故事 — 為咗幫Hagrid送走蘿蔔而半夜遊蕩、為咗唔想魔法石落入Snape手上而進入活板門、為咗搞清楚邊個開啟密室去偷材料煮變身水、為咗拯救Ginny而進入密室同Tom Riddle決、為咗拯救巴嘴而捲入Sirius嘅事、為咗拯救Sirius而偷偷同魔法部作對…

頭三集入面，Harry都係大無畏自己搵麻煩上身。即使法力不高，即使只係一個細路，佢都係勇氣行先，覺得啱就出手。成年人睇應該係魯莽同不負責任，但做人應當如此。而每一次，佢都唔係靠法力取勝。第一次面對佛地魔，佢因為唔覬覦魔法石反而獲得魔法石，仲靠佢媽媽嘅保護逃脫。第二次面對佛地魔，佢因為鳳凰相助同埋Gryffindor寶劍。幫Sirius逃脫嘅時候，就係靠Time Machine，但佢都施展咗個護法咒。

但整體而言，都係運氣居多。其實佢能力不足，簡單啲黎講就係死好命。

頭三集入面，都係講Harry有赤子之心，即使由細到大備受蹂躪，佢都無變成一個心地唔好嘅人。而佢對是非黑白，有一套好明確嘅指標，唔啱佢就會出手，唔會退縮，而能力夠唔夠，從來都唔係佢嘅考慮入面。

而去到第四集之後，故事就好似唔再係熱血大冒險。Harry亦都由自願披甲上陣，變成成日半推半就上路做大家眼中嘅英雄。