「過晒氣」

早排聽朋友分享花生，原來我個輩嘅人已經响新一代眼中係「過晒氣」。22歲就可以畀人話過晒氣真係幾有趣。 好似獻寶咁同另一個朋友分享，大家都覺得「過氣」係一件好事。

「李杜詩篇萬口傳，至今已覺不新鮮。江山代有才人出，各領風騷數百年」

而家唔好講百年，世界瞬息萬變可以一領風騷已經好好，或者都唔係好事，領一時風騷嘅代價太大。而新一代睇上一代唔順眼，覺得上一代唔好、守舊、一事無成，或者「你哋嘅時間已經過去，唔好阻住我哋上位」，係一件必然會發生嘅事。

今期我個朵好似雷噤響
你回撚曬塘就唔該你俾個位我上
長江後浪推前浪就系人都知
唔該你死撚開咪撚阻鳩住
總之有你個撚樣系度我就無運行
— LMF《反骨仔》

年少氣盛應該係要覺得所有人所有事都好老土，唔夠創新唔夠好至啱。因為呢個係年輕人嘅專利 — 所有嘢都睇唔順眼係年輕人嘅專利。

只有企響「後生」嘅身位，先有資格或者會所有嘢都覺得唔順眼。年少氣盛，有青春可以揮霍，世界就响面前展開，開始任人採摘一樣。「後生」會响世界見到無限嘅可能性、見到世界「應該係點樣」。亦都會傾向覺得世界係二元對立，啱就啱，錯就錯，邊有咁多「唔係咁簡單」。

而世界往往就唔係理想嘅模樣，所以「後生」郁啲就鬧晒全世界係好應該嘅事。唔係咁樣反而令人擔心，「後生」唔係乜都鬧乜都睇唔過眼嘅話，個世界應該出咗啲問題。「後生」就應該要有一往無前，雖千萬人而吾往矣嘅嗰種霸氣，如果唔係青春要嚟做咩？

而「過咗氣嘅人」有時候就係「老屎忽」。因為响個世界都吃過虧，會知道啲嘢「唔係咁簡單」，做人唔可以再too simple, somtimes naive。亦都隨住仆得街多、執得自己嘅手尾多，而知道做人做事原來唔係「啱就啱」咁樣。

反而發現世界好複雜，對好多人來講啱同錯唔係最重要，反而係利益掛帥，一個唔小心俾人食咗都唔知咩事。或者隨著自己要為自己曾經嘅年少氣盛口出狂言負責，會發現一往無前嘅勇氣已經一去不復返。隨著自己年少輕狂而得罪人多，會發現有道理都好有時都要講少句。

兩代人好容易睇對方唔順眼。

後生嘅覺得老嘢過晒氣，唔該唔好阻住，你乜都做唔到就等我嚟。
老嘢覺得，你哋班細路毛都未出齊／書讀未讀好出來托咩，你大個就會知唔係咁簡單。

但其實冇咩大不了，每個人都後生過，係老嘢都知呢啲嘢係講唔聽。大佬，我都想像唔到6年之後我會變成咁。曾經我都日日大鬧特鬧。但仆街仆得多，自自然然會大。而後生嘅，未必要覺得人哋阻住你嘅，同埋你都無需要理會，年少氣盛係你嘅專利。趁後生，可以揮霍就揮霍下，唔會斷手斷腳唔會死都去試下囉。

我爸成日話自己係預言家，話我過多幾年返轉頭睇下點。而我每次過幾年都真係死死地氣要承認我爸講得啱。我爸有時會忍唔住用 “I told you 7 so”嘅tone回應，有時真係唔想畀呢個credit佢哈哈。

不過更多時候，啲前輩或者屋企人，其實會想你話佢知「你錯啦，食鹽多過我食米都無用，我搵到另一個方法／睇法」。如果真心錫你，點會忍心見到你仆到直一直然後要承認佢啱？ 不過都有啲人係鍾意睇人仆街之後同你講「I told you 7 so la～ 你個傻仔」嘅，我希望呢啲人佔少數。

我希望所有「後生」都可以年少氣盛，有空間俾佢哋盡情揮霍青春。
至於青春小鳥一去不復返過晒氣嘅我哋，我希望我哋唔會做老屎忽，而係記得自己都年少氣盛過，而依家世故圓滑收咗火咁都幾好。因為每個階段都需要唔同嘅嘢。