讀藝術賞析比搞社運更需要勇氣
如題。
同唔同嘅朋友幾次討論起文學，我都表示唔想／唔敢讀文學賞析，因為我覺得讀咗返唔到轉頭。返唔到轉頭嘅意思係，學識咗一套評鑑嘅方法之後，你就冇辦法拋開個套框架，永遠冇辦法用最單純嘅觀眾身份去睇一件作品。
其實唔止係文學，任何有關藝術評鑑嘅理論我都唔想知、唔想識。 我係一個都幾鍾意睇畫聽歌睇書嘅人，都好鍾意睇人哋點樣睇我睇過嘅作品，但我真係完全唔想學評鑑。
我自己對於藝術作品嘅喜惡係近乎直覺式嘅判斷，最緊要合眼緣、啱感覺；可能係對於作者／藝術家嘅唔尊重，佢背後運用咗幾多技巧，我唔係完全無興趣，我只係比較在乎我對件作品嘅感覺。
試過同學畫嘅朋友睇畫展，佢望住件作品好欣賞會情不自禁咁樣分析畫家用咗啲咩嘅嘅技巧，而我就只係單純地被件作品「好靚」而深深折服；同學音樂嘅朋友聽歌，佢哋會突然間開始分析個拍子或者嗰啲好技巧性嘅組成，而我就係咩都聽唔明淨係覺得好啱感覺。
嗰種被「美」所震撼嘅感覺好好，唔忍心畀其他諗法或者念頭干擾咗呢種被觸動嘅感覺。其實咁樣聽落去，我都幾原始，完全係用動物式嘅直覺去睇藝術哈哈。
所以我都幾肯定自己唔會成為一流嘅藝術家，不論係文字畫畫定音樂都好，我都想只係想做個跟感覺行事嘅觀眾，偶爾好似而家咁寫幾隻字扮下KOL。唔係想話呢啲賞析、技巧唔重要，而係我個人選擇唔會了解，我想做一個無知嘅觀眾，被動地享受藝術帶畀我嘅感受同喜悅。因為我知道，一旦學咗一套「審美嘅標準」，我就唔可以再只係用直覺去感受藝術品。
好似搞社運咁，落咗水，返唔到轉頭。
但我自己嘅感受係曾經滄海難爲水，一旦認真上過心，就放唔低。認真投入過，認真想改變個社會，曾經對社會有過熱誠嘅人，好難完全放低呢種執著。始終你都會因為啲高官亂講嘢反白眼，你會因為個政府亂推政策而嬲，會因為有人俾人拉又要坐監而難過。
即使你話放低，去外國讀書、專心搵錢乜都好，個心始終都會因呢啲嘢硬住。即使盡量唔睇新聞，都始終會聽到相關嘅嘢，然後唔出聲唔表態都好，你個心入面都一定會或多或少有啲不忿、無力、嬲、失望。
不過起碼我哋都有見過陳巧文呢個例子，話唔再參與就真係完全無人再見過佢、無人再聽過佢嘅消息，我都可以安慰自己有一日唔會再「姣婆守唔到寡」。
所以我覺得讀藝術評鑑嘅人比起搞社運嘅人，更需要勇氣。
