讀小說

寫閱讀報告有感

曾經有段時間，淨係讀小說，睇親非小說類嘅書都集中唔到。小說總係有種魔力，會將人吸入去，令人响小說嘅世界入面流連忘返。

早一兩年，時任男朋友問過我睇咩書學英文，諗都唔諗就答Harry Potter。一來好睇，二來日常用語好多（J.K Rowling成日描寫主角食咩，見到就肚餓），係慢慢浸啲英文出來嘅好選擇。但對方話，自己好少睇小說。當時無講啲咩，但心裡面就有啲納悶，乜真係有人唔鍾意睇小說架咩。

我意思係，唔鍾意睇書嘅人好多，但我以為鍾意睇書嘅人都會鐘意睇小說。

本身閱讀就已經係一件好有趣嘅事，只要識字，成個世界就可以响書本入面任你採摘。當知識同文字進入個腦，真係世界上最爽嘅事。

而讀小說，更加係一件神奇嘅事。小說可以承載嘅嘢好多，好多感情、情緒、教訓、故事… 隱晦嘅、露骨嘅，都可以透過小說一次過表達晒。

好直覺同主觀地覺得，讀小說可以令人盛載到更加多情緒。透過讀小說，可以身同感受嘅嘢多咗好多。可能去到最尾，啲感受都係自己嘅，亦都唔可能同人100%共感。透過作者嘅文字，透過感受文字鋪排嘅橋段、文字形容嘅感受，好多情緒都從此有咗出口。 自己一啲曾經無以名狀嘅感受，透過讀小說，搵到一堆文字去去形容，有文字可以用嚟排解。

我讀過最有呢種作用嘅小說有《房思琪的初戀樂園》、《人間失格》同《挪威的森林》，我諗唔係呢幾本小說的，我都未必會搵到寫字去作為我自己情緒嘅出口。佢哋對於一啲我曾經覺得無以名狀，難以宣之於口嘅鬱結情緒，有好好嘅形容同表達，好似學識咗一套新嘅語言，去理解同整理我內心經歷緊嘅事。 Harry Potter對我嚟講都一樣。感覺好似係將一啲我經歷過嘅橋段同感受，用文字經歷多一次；將一啲我將來可能要經歷嘅橋段同感受，用文字預先準備好自己。

如果個世界無咗小說，應該會好恐怖。