見字飲水與情緒病低潮

(此文本來寫於patreon, 希望多多支持）

兩個星期冇update個patreon，除咗因為聯署好忙之外，亦都因為自己健康有啲狀況所以停工咗一陣俾自己休息下。呢兩個星期貫徹「見字飲水、唔好蹺腳」嘅原則，休息咗一陣。

（附上散步照一張）

成日話「見字飲水、唔好蹺腳」一大堆叮囑，好似不斷講啲好老土嘅嘢，而對香港嘅進程好似冇乜用咁。

飲多杯水、坐好少少，其實有咩用? 我都答你唔到有咩用，但生活過得好少少，對自己好少少，會令一個人過得舒服少少。舒服少少唔係話你會多咗廁所去或者冇咁容易腰痛，而係當低潮來襲嘅時候，你身體ok會好過少少。

一直好少公開提及，但都唔隱瞞自己有過抑鬱症同焦慮症，抑鬱大概兩年前好返，焦慮就一直時好時壞。呢一年因為香港嘅事，加上而家自己面對流亡同未來嘅種種不確定，焦慮前所未有的嚴重。

剛剛來德國嘅時候，焦慮都發作得好犀利，但冇而家咁難受。好認真咁思考過到底兩段時間差別響邊嘅時候，發現差別在於－－兩年前身體好啲，多啲時間照顧自己；而家身體唔太好，冇乜時間照顧自己。 嚟德國讀碩士嘅時候，香港冇大型社會活動，自己除咗讀書之外冇其他嘢做。每日都有時間做下運動、煮飯、睇書、訓足八個鐘；但今年返香港幫手選舉嘅時候，三餐唔定時、訓得少、冇時間做運動，返到德國就係一大堆國際線嘅事務同埋PhD嘅學業。

醫生同我講過「如果你身體好，其實你情緒差極有個譜」，當時我唔信，覺得醫生好老土。但自己住咗幾年，又經歷過情緒病嘅高高低低之後，發現越老土啲嘢通常都越真。

叫人飲多杯水，其實後面蘊藏著呢一種體會。身體唔好，呢度痛嗰度痛，行兩步就攰其實開心極有限。加上大家响香港，睇住新聞面對著咁多嘢，更加唔會開心。如果身體唔能夠支持住你，真係好難去處理同消化咁多嘅無力感。對自己嘅身體都冇掌控嘅時候，只會加重呢種「我乜都做唔到」嘅感受。

希望你睇到呢度，會自己去飲多杯水，照顧好自己。人冇事先可以做世界冠軍。