自我懷疑mode: 點先可以有勇氣
12月差唔多聖誕節嘅時候，去咗柏林玩。去完藝術館之後，搭S Bahn去搵朋友買嘢，之後去佢屋企食飯。响告別一齊去藝術館嘅意中人同朋友之後，我自己一個轉車，想拎對藍芽耳機出嚟嘅時候，其中一隻跌咗落地下，彈咗幾下，然後跌咗落月台。徹底Hang機，個人冷靜咗3秒之後，去搵人求救，不獲理會。 然後我認命離開咗。返到漢堡之後，我第一件事就係去買返一對一模一樣嘅耳機。
再早幾個星期，响街嘅唔知邊度跌左個錢夾，問咗幾個地方都搵唔到。過幾日上網訂返個一模一樣嘅。我當時同朋友講話唔見咗，我話啲錢唔係問題，係個夾。但其實夾住嘅錢嘅金額係貴過個夾。
18年早中嘅時間，我有一個响17年1月日本買雜誌送嘅背囊爛咗，想買過個。我係堅持搵咗好多間書店、上網搵咗好耐，發現已經無可能搵到，心灰意冷咁買咗另一個背囊。
我係有一個近乎強迫症嘅心態係想買返啲一模一樣嘅嘅嘢，响執行李嚟讀書嘅時候，我都好想將所有我用開、覺得好熟悉嘅嘢帶晒過嚟。而我呢排發現自己咁樣有啲誇張，同好似有啲問題。
我諗係我自己好怕uncetainty，好怕改變好怕啲嘢唔熟悉。但係呢，自己又不甘平凡，成日想幹一番大事業，所以有卡住咗响度。一方面自己怕冒險，但另一方面其實想做嘅嘢就係冒險。
成日覺得世界上有兩種人，一種係可以昂然闊步邁入競技場，一種畏畏縮縮碎碎念拖著腳步走入去。我點睇都係後者，但又想做前者。成日好想問前者嘅人到底只係叻扮勇敢，定係真係一無所懼。而其實兩者係咪都係一樣咁有勇氣呢，一樣都係不安中一往無前。
諗起我Year 1嘅時候，球隊隊長同我講嘅說話「唔係你有能力所以你去經歷一啲嘢，而係你去經歷完先會有能力」，佢就係典型我眼中嘅第一類人，勇敢、昂首闊步。臨飛前約咗好多我眼中嘅第一類人見面，發現佢哋其實都有自己嘅不安同掙扎，都係一樣硬著頭皮頂硬上做住先。佢地好多都話其實第一類人唔存在，我眼中嘅第一類人一係就無俾我見到佢哋不安、一係就好叻扮無事。不過知道咗之後，佢哋响我眼中都係閃閃發光嘅人類。
每個人都會怕架，好正常。我知道啊，但係呢我真係覺得自己唔係一般嘅細膽呢，係超級極度細膽，而我唔鐘意咁樣。咁下一個問題就係咁我想點，我想改變自己定改變自己想做嘅嘢。咁我揀改變自己。咁即係要點樣做。即係做好眼前你可以做、想做嘅嘢，做好每一個選擇，慢慢累積你嘅能力。因為無其他嘢我識做，我淨係識呢啲。
點樣先可以有勇氣真係一個好問題。睇《被討厭的勇氣》話我知要去選擇為自己嘅人生負上責任，要自立，要敢擁抱未知。人哋正常嘅細膽可能練習10次，我就要練習夠100次。啊～好想逃避，但自己又睇唔起自己逃避。
係囉，又係呢啲老土嘢。但越老土嘅道理先越真，因為佢真先老土呀明唔明。
