而我不知道… (世界常態)

看了馮晞乾的《而我不知道吳靄儀是誰》。

文中話而家香港嘅年輕人唔知道邊個係吳靄儀、梁家傑、湯家驊（十一哥）之類的政界老人／老屎忽。反而知道邊個係吳亦帆、姜濤。

有時候，會諗，其實呢個先係世界嘅常態。 呢個社運圈子，其實只係被時代選中（而不幸）嘅細路。返緊KIFF嘅時候，有個星期六跟咗兩個姐姐去HH，佢哋同我我講「走得就走啦，你哋呢啲人買少見少，你year 1係14年，係得你個年嘅combination咁大感覺架炸，之後嗰啲冇架啦。」

係囉，14年入大學經歷雨傘革命、區議會選舉、校委會罷課、初一、補選、選舉、大大小小審判、朋友相識入獄流亡。講戲劇性，應該都係我哋呢代數一數二地dramatic。被時代選中嘅細路，其實都幾不幸，唔講投放一去不復返嘅青春小鳥，淨係講同其他人嘅代溝，已經有淡淡嘅哀愁。

有段時間，返咗一間行ABC路線嘅服裝牌子嘅PT。一班同事都同我係within同我相差4年，但個世界真係好唔同，有97年出世嘅同事唔知道香港幾時主權移交，唔知道立法會分組點票，但佢知道我完全唔知道嘅電視劇、明星同潮流。初一義士判監7年嘅果一日，朝早返工， 响舖頭忍唔住喊，同事仲問我係咪失戀，我覺得個世界好神奇。同一個環境下，有兩個好唔同嘅世界。

有時候，會嬲嬲地想拋低一句「而家啲後生」（又唔諗下自己其實都只係個死𡃁妹）。但尋根究底之後，發現其實係接受資訊嘅渠道太唔同。

//今天談社會或政治問題，比貧富懸殊更嚴重的，也許是知識懸殊。大眾接收資訊的渠道千差萬別，於是便有了平行時空，結果所有人都在同一個現實呼吸，在不同的世界做夢。//

然後我又開始覺得，social media其實真係維穩最好嘅手段。唔使政府操控，佢自己幫你計好條數，幫你配對好咩人睇咩嘢，好簡單。所以一開始你無乜睇政治嘢，你嘅Newsfeed就會越來越少去到冇政治嘢；你一開始唔係好睇啲潮流嘢，你嘅Newsfeed就會越來越少去到冇潮流嘢。回音壁又好、圍爐又好，個問題就係而家多人用嘅平台資訊就係唔太流通。唔係話你睇唔到，只係你要特登自己搵／改變條algorithm，但無啦啦邊有人會咁做先。

咁下一個問題就係，點樣改變呢種資訊好似好流動但其實暗地裡你好多嘢都睇唔到嘅問題。

Ummm…. 我嘅答案係，繼續做advocacy同諗新方法吸引所謂嘅「啲後生」睇下政治嘢。Advocacy我有好多廢話可以講，但其實後者緊要啲。

搞咗5、6年社運同公民社會，都已經有老屎忽嘅通病，就係啲橋傳統得滯又悶，又諗唔到新嘢，自問同自己嘅同輩同唔係好溝通到，遑論再細幾年嘅人。但偏偏佢哋先係嚟緊社運嘅生力軍，應該講，我想建構嘅未來其實佢哋都有份，佢哋都應該有權被邀請一齊參與。

成日見到民主黨公民黨啲政治老人話要聽多啲後生仔講嘢，吸納後生仔都好想翻白眼。大佬你端起個款，仲要我主動卑躬屈膝，邊個想同你講嘢。心同此理，我都唔想「啲後生」反我白眼，始終對等嘅對話先有用。所以身為年紀老啲嘅人，好應該主動啲去嘗試邀請「啲後生」打開chatbox，邀請佢哋一齊諗下世界應該係點。可能佢哋始終覺得個世界有姜濤同吳亦帆就夠，ok 咁at least we know， 但可能佢哋係想要其他嘢，唔去接觸永遠都唔會知道。亦都可能，佢哋嘅social media令到佢哋覺得世界只有姜濤同吳亦帆呢～ we don’t know either.

吹咗咁耐，作為一個唔用snapchat淨係用IG/Facebook/Twitter嘅人，我係冇橋嘅。但我會努力俾啲耐性，如果身邊出現唔同圈子嘅人，我會好想聽佢哋講野，好想知道多啲佢哋對於「美好世界」嘅想像。然後試下威逼利誘佢哋知道多啲其他圈子做緊嘅嘢，可能佢哋會有其他人諗唔到嘅嘢。