紀錄片《我們的青春，在台灣》

「有時我們是造餃子的人，某天或也成為餃子」

呢段時間身邊嘅事都不停以同一個theme出現，尋晚睇紀錄片嘅時候都係一樣。

《我們的青春，在台灣》係一套本來想記錄兩岸三地社運青年連結嘅紀錄片，但隨著人物陳為廷同埋蔡博藝嘅成長，故事亦都漸漸偏離咗本來導演想拍嘅嘢。時間線橫跨4,5年，由反媒體壟斷去到太陽花再去到選舉、退選，睇住兩個主角响社運嘅掙扎，最尾「回歸平淡」。

睇戲嘅時候，喊咗好幾次，但唔係覺得好震撼。可能經歷完呢幾個月嘅戰爭狀態之後，我已經唔會再因為螢幕上衝突嘅畫面而心痛。喊嘅原因係佢click中我呢大半年都一直掙扎緊嘅嘢 — 「大台」。 唔係淨係社運要唔要大台，而係我嘅人生一直都有「大台」嘅出現。

其中一部分講太陽花學運面對「大台」嘅問題，係好老土嘅運動領導者VS群眾嘅問題。信息唔流通、群眾覺得無人尊重、領導者覺得自己都好難做…導演就傾向覺得當時群眾依賴主角，唔理解群眾運動嘅本質。呢啲嘢我哋14年經歷過，之後到經歷過好多割席、拆大台。去到19年而家，冇咗大台，群眾自發。

導演响片後面嘅地方影住陳為廷分別話「我把這些（性騷擾醜聞）都說來以後，就從神壇上走下來」、「你們試試過沒有神的日子」。最後導演同兩人對談，情緒激動，有少少覺得被兩個主角「掉低」，因為兩個人都回歸平淡、低調，無再成為佢或者其他人嘅「領導者」，連帶令佢對藝術、電影嘅追求都產生質疑。

一個星期前，我去咗 鄺頌婷 Practical Dinosaur 嘅詩集《造餃子的人》發布會。佢讀咗《做餃子的人》，解釋咗背後嘅故事。

「有時我們是造餃子的人，某天或也成為餃子」背後嘅故事係，一次佢去睇show，對於台上嘅人產生一種想臣服嘅感覺，台上嘅人被仰慕、崇拜，台下嘅人全權交出自己。而《做餃子的人》就係對呢種狀態提出質疑。造餃子的人，製造出一粒粒面目模糊嘅係餃子，餃子對人予取予攜。有時人都會成為餃子，臣服、不問因由交出自己。

作為餃子，我哋永遠唔應該全權交出自己，對方都只係一個人，唔係神。唔好期望永遠有另一個「充滿靈光」嘅人去帶領你，話你知應該點做。
作為做餃子的人，面對任自己拿捏嘅餃子，更加唔應該abuse佢哋呢種臣服同順從。

鄺頌婷講嘅時候，我形住佢係望住我講。我聽到頭皮發麻，忍住唔流眼淚。

因為我太經常將人放响「被我仰望」嘅位置，而最後呢個都只係一個普通人，唔係一個我想像中嘅神。而我有時响一啲場合作為做餃子嘅人，我亦都係會享受接近呼風喚雨嘅感覺，會沾沾自喜。

《我們的青春，在台灣》、《造餃子的人》帶畀我一樣嘅提醒 — 永遠唔可以全權交出自己，永遠唔可以放棄為自己做決定、唔為他人而活。

因為唯有咁樣，先唔會迷失。偶像、造餃子嘅人係會改變，佢哋有一日可能會放棄呢個身份，作為小小嘅餃子你會「被背叛」被遺棄。如果可以為自己充權，就永遠可以堅持落去。

但said is always easier than done，唔知係我懶定係我細膽，我都係好想有個人可以話我知應該點做。為自己負責任係好可怕，世界好大好多嘢可以選擇，我真係好怕「揀錯」。為自己做決定個感覺好脆弱。

但我而家知道唯有自己trial and error，唯有自己去愛去做選擇，先可以成為獨立、唔依附其他人嘅存在，咁樣先有能力帶到改變畀個世界。