煙腸日記：送禮物
呢個對話令我諗起一份送咗但未送出嘅禮物，嗚。
做緊嘢，office入面貌似Ben Wishaw嘅同事行咗入我房，坐低咗，以為佢要同我延續上次正經嘢嘅對話，點知佢開始吹吓啲無聊水，另外兩個同事同入咗嚟。
Ben Wishaw同事話自己想買Play Station，想玩FIFA同埋GTA，但屋企要買張床，有啲掙扎。同事A就話，你女朋友一定好鐘意你話要買Plays Station唔係買床啦哈哈哈。Ben Wishaw同時就話「反正我都響公司訓覺架啦」我就插嘴，唔好買Play Station放响屋企啦，會家變。
曾經買過PS4 VR同埋新出嘅FIFA畀（當時）男朋友，結果簡直就係攞自己嚟搞…
未送之前，有一日男朋友放工同我食飯，然後好興奮咁話食完去行街。佢興高采烈拖住我去咗信和，然後轉左個圈出返嚟，佢拖住嘅變咗部機，我响後面跟住佢衝番屋企咁滯。
送咗VR之後我好幾日都冇望到男朋友正面，同埋同佢講嘢永遠都無回應，要高聲呼叫佢先會「下，咩話」咁應你，有好多次都以為自己返咗大學迎新玩緊「下咩話」房game。送FIFA嘅時候，一早起身去買，但畀人埋怨我冇偷跑，佢要出個日先有得玩。送出之後更加係幾日聯絡唔到佢咁滯…肯定佢係打通宵機哈哈哈哈。 不過FIFA真係好好玩，尤其係大叫唔准對面射波或者亂咁玩都好刺激。
所以故事嘅教訓就係唔好搞咁多嘢。
同事聽完笑到痴線，Ben Wishaw同事就話今晚女朋友生日，我買咗藍芽headphone畀佢，應該無事掛。我就開港女mode話，「哦咁你而家即係唔想同佢講嘢先俾個Headphone佢啦哈哈哈，但其實係幾好嘅，你自知你唔好笑係好事」（Ben Wishaw同事自命幽默，仲有個Twitter專門搞笑）佢就話我知女朋友一定會鍾意囉好冇。
送禮物係一件好開心嘅事，見到收禮物嘅人嗰個笑容、見到佢由心而發嘅開心，會覺得有錢都買唔到咩都值得。為咗嗰個笑容，可以好努力咁去做好多嘢令到送禮物呢件事work。去到真係見到嗰個笑容嘅一剎那，成個人都會融化，淨係得返開心嘅泡泡响度。
送禮物可能就係想一個人開心，送畀你就係想見到你笑見到你會因為一啲嘢而覺得興高采烈或者享受。唔駛擔心回禮或者點樣，如果真係滿意同開心，淨係好開心由衷地講句「多謝你，我好鍾意」就夠。
係囉咁簡單嘅事，唔好搞到咁難。開心就好。
