煙腸日記：哲學系
腰痛到痴線，坐响同事房入面個健康球拉住筋發問兼傾偈。
同事話讀咗7年Law，考埋First State Exam，而家份工做研究可以睇下Social Science嘢「好refeshing」。
我打趣話「Philosophy都好有趣好Refreshing，而家要我legal thinking好辛苦」同事就話哲學嘢對佢嚟講 「too much」話細個自己訓响床上面諗點解自己存在已經好夠，唔想一日到黑都諗住呢啲冇答案嘅嘢。
我話，讀哲學就係每一日都諗下呢啲嘢，好開心架，明知冇答案都中個頭埋去，嗰個爽唔係來自「有冇答案」而係來自「感覺到自己用腦」。 同事表示唔識欣賞不了，繼續返討論點樣methodically證明Intermdiate嘅community standard有份塑造個discourse。
入文學院嘅時候，其實本身係想揀翻譯做主修，但讀咗幾個1字頭courses之後覺得難就唔難，自己啲grade都幾靚，但冇乜嘢好玩。反而個哲學1003令我覺得大開眼界，以前細個諗過嘅、聽爸爸家姐食飯討論過嘅問題都有涉獵，雖然係無「正確答案」，而且輕鬆A咗，諗住無死啦。
於是第二年就把心一橫揀咗哲學做Major，政政做副修，諗住大學4年一定好有趣。但之後我發現，如果唔係哲學嗰兩個1字頭必修咁簡單呢，我哋部門應該每年20個同學都收唔到…
於是Year 2開始，每年派grade之前我都好誠心咁做晒啲勁過儀式，寫勁過揮春、劈豬、勁過跑跑咗一年咁大把… 但最後都係搞唔掂，追唔返Year 1 瞓街搞到唔過2.5嘅GPA嗚嗚嗚。
但我都無後悔揀咗哲學系。
因為每一堂都可以「用腦」可以「諗野」嘅感覺實在太幸福。Year 3同Year 4每個sem都有上慈生（慈繼偉）嘅堂，通常都係1630上到1820，之後再有導修。個陣每一次落堂，都覺得自己好似個腦要虛脫咁樣，要用盡全力去聽去理解，啲嘢真係有趣到不得了。到而家望住自己寫到花晒嘅筆記，會好有滿足感。
而家响班律師身邊做research，慢慢開始無咗個種覺得自己無專業背景嘅心虛。因為training好唔一樣都好，佢哋係「專業的」都好，佢哋好多時都要靠我去幫佢哋去解一啲legal training無教佢哋嘅問題，例如咩係Discourse、AI Court Ruling有咩問題之類，哲學系去到呢啲時間就幾有用。
不過而家每次聽到身邊啲寶寶話想揀哲學做主修，把口都會阻止佢哋「唔好呀，爛grage啊，搵唔到食呀，出來渣兜呀」。同埋會話「It changes you as a person, not necessarily a good thing in this world」仲會叫佢哋準備定面試要答HR「哲學即係讀咩」嘅問題，但個心都會開心有人鍾意自己鍾意嘅嘢，有人同我一樣鍾意個種用腦用到盡嘅感覺。
