「演算法就好似你咁」
以為自己好了解你，但其實係你自作多情。
畀朋友教訓我，對人好好但其實唔識睇人眉頭眼額，完全無諗對方想要嘅係乜嘢。對方知你極度用心、極度好，但就係件事錯咗，人哋見你咁落力唔好意思反你白眼咋。
我似懂非懂，朋友就話「你呀，就好似啲演算法咁呀，以為人哋想要呢樣就畀呢樣嘢人，但你點計條數都只係base on data，距離真正嘅智能仲有好遠」
我頂，OK，明晒。
而家平常應用嘅AI，距離真正嘅「智能」仲有好遠距離，好多時係收集數據，去feed條程式去學習你嘅行為模式，再去預測到底你想要啲咩，終極目標係去塑造你嘅行為。簡單嘅講法就係Micro-targetting嘅廣告 — 你睇完去日本嘅機票，Facebook、Google就開始起晒彈啲相關嘢你睇佢咁。
成件事錯咗，你以為人哋想要呢樣嘢，但其實人哋已經唔想再要或者只係隨便睇下，冇諗過認真要去個旅行。但條程式就自作多情畀啲嘢你，以為你好需要好想要。亞茂整餅，冇嗰樣，整嗰樣。
日常生活，你當然可以翻個白眼俾對你自己自作多情嘅人，但响平台(platform)上面，呢樣嘢唔係好可能。
因為Micro-targetting或者AI，唔止會發生响廣告上面，連你嘅搜尋結果、News Feed，都係會因應條程式自以為「你嘅喜惡」去調整。想像下，一個自作多情嘅人，會因為佢自以為嘅你，畀啲嘢你睇，而你冇得揀要硬食，諗下都打冷震啦下嘛？
久而久之，你見到嘅嘢就會越來越窄，因為演算法會計算同推測你想睇咩，淨係畀佢以為你想見到嘅嘢你。當我哋成日話 “You are what you eat”嘅時候，其實You are also what you read。Micro-targetting嘅最終目標係用佢有嘅數據去塑造你嘅行為，去為佢哋嘅廣告、商品製造需求。
惡名昭彰嘅劍橋分析事件都係靠Micro-targetting去做一啲同選舉有關嘅廣告campaign，有指Brexit、Trump當選、斯里蘭卡選舉、肯亞選舉…等等相關嘅Online Campaign都係佢哋一手促成，亦都真係影響到個結果。
你話：唏～唔用咪得囉，同埋資本主義社會係咁運作架嘞。
都話咗唔係「唔鍾意就唔好用」咁簡單。 唔用Browser你點上網？ 用無痕模式？你知唔知tab與tab之間會互相過data?（我去到上鍵盤戰線嘅security workshop先知）你知唔知profiling其實唔一定要知你係邊個？你知唔知你嘅網上行為變成數據之後會影響埋其他人收到啲咩？
資本社會主義的確係咁運作，我都唔想自己變成左膠咁話資本主義係萬惡根源，我依然相信自由市場萬歲。但以前嘅廣告，未去到micro-targetting咁細嘅targetting，以前嘅科技或者mass media都未去到你屋企個Alexa咁掌管你嘅大小事務。而家係無處可逃。
同埋你想像下，而家啲小朋友同後生，一出世就畀micro-targetting包圍，屋企用Smart Home、細個就開始拎住個電話或者tablet，佢哋所有見到嘅嘢係演算法俾佢哋嘅嘢，佢哋過多幾年到底係唔係佢哋嘅authentic self? 定係只係演算法同廣告商想佢哋變成嘅嘢？
講到呢度問題又返返去啲冇答案嘅問題： 到底人係點樣先為之Authentic and Autonomous? 而自作多情想搵啲嘢你睇、幫你選擇，又有冇問題？平台係咪應該有咁大能力知道咁多嘢？到底係佢哋唔應該有咁多權力定係佢哋嘅business model有問題？
我全部都無答案。我老細都無答案。無人有答案。
所以我哋做緊研究哈哈哈。
