求知慾與好奇心極其昂貴

讀大學嘅最後一年，唔知點解好奇心同求知欲都大爆發。認知到原來個世界有咁大，有咁多嘢可以學可以玩，即刻好後悔自己4年嚟冇學多啲玩多啲冇好好認真讀書。其實大學4年我已經chur到自己爆炸，但當時都係覺得有啲可惜咁樣，不過條路自己揀嘅。

好好彩，一畢業報Master就有學校收，可以去外國開開心心咁遊學一段時間。一年前併發嘅求知欲可以得到滿足。

於是呢段時間不停睇書、去旅行、學新嘢，試下搵出屬於我世界嘅真理，認真上堂溫書希望呢科可以補完我嘅世界觀，對個世界認識多啲。每一日都好似大鄉里出城咁望住「知識嘅殿堂」深受感動。另一個好開心嘅原因係因為，書本嘅世界冇咁多殘酷嘅現實、是非不明嘅事情，唔駛用咁多腦唔駛咁痛苦。

但其實呢種「求知慾」同好奇心係好昂貴嘅事。

昂貴在唔用新嘅知識新嘅認知養住佢，佢好快會死。

昂貴在知識同認知需要時間去獲取，冇時間跟本就談不上好奇同求知。

昂貴在於新知識一秒之後就已經係「已知」，你又要搵新嘢學。

响香港，唔好話大人，小朋友其實都唔被允許有求知慾同好奇心。個教育制度填鴨式固然已經係令好奇心死得好快，而因為「贏在起跑線」應運而生嘅課外活動、補習班更加係灌山埃畀人嘅好奇心。

課外活動等補習班已經將小朋友嘅時間填得滿滿的，冇時間俾佢哋自己去發掘佢哋覺得有興趣嘅嘢。如果投胎好彩家長開明嘅，可能佢就可以揀自己有興趣嘅課外活動，佢嘅求知欲仲養得住。但唔好彩嘅，佢就唔會有時間去探索自己世界以外嘅嘢。

年輕人嘅好奇心都唔係特別容易保存。上到中學，唔係應付TSA就係要準備DSE，成副心機就放咗落讀書或者應付學校家長到。其實係好心力交瘁，有時打開個電話，加埋而家越上網個人越懶，寧願碌下social media都唔想去Google一下自己見過有興趣嘅嘢。仲有echo chamber嘅問題，你好少會見到唔係你睇開嘅嘢，令到接觸新嘢變成一件要自己落力做嘅事。

大人更加唔駛講，做港奴點樣同你有求知慾同好奇心，放工唔死已經覺得執返身彩。返工攰到半死，放工淨係想快啲返屋企，食飯沖涼打下機煲下劇訓覺。要求自己有好奇心同求知欲係一件chur自己嘅事。

身邊有人好努力想响做港奴同開心大發現個世界中間攞個平衡，我諗佢係做到嘅，但呢個人佢真係異類嚟，佢真係好熱愛個世界，好奇心旺盛都可以燒著個世界，而且佢都唔係一般嘅chur得。

但香港唔係一個對人好好嘅地方，香港真係會令人覺得 “The world is asking too much of me”，你仲點可能對於呢個世界有強烈嘅愛意同埋強烈嘅好奇心。 唔覺得自己係日復一日捱緊已經好少有，要响呢個地方感受到成就感或者响呢個世界有進步真心難過登天。

辦法唔係冇嘅，都係嗰句「條路自己揀，仆街到要行落去」，即係選擇呀明唔明？ （再講選擇我都嫌悶）

但好奇心，真係一件好 好 好 好 昂 貴 嘅事，如果你有一日，突然間對一樣嘢好奇，想知多啲，我好希望你會用啲時間，養住嗰點點嘅火光。

好奇心會令你變成一個更好嘅人，會令你更有智慧同同理心。因為你會對個世界好奇，其實係你仲熱愛個世界嘅最好證明。

而個世界已經overpopulated with 仆街，我哋會要多啲好人架。