打坐唔係「解決辦法」

作為抑友同歇斯底里嘅代表，各方好友都好鍾意同我講心事。早幾日，D話自己好痛苦又煩惱。之前試過叫佢學打坐，因為佢個人好急躁坐唔定無耐性。

佢今次突然主動話「我試咗打坐啦，都無用，我連續五日每日15分鐘。」話打完坐都係辛苦，情緒冇好到。

我一直相信打坐可以救世界，但我從來冇講過「打坐係解決方法」。

打坐係一個可以培養你你獲得解決方法嘅能力。即係打RPG，做主線任務之餘，你都要做支線任務儲錢儲資源去去做主任務架嘛。（其實我無打機，我估係咁）打坐就係做支線任務去儲解決主任務aka人生難題嘅過程。

所以唔係打坐可以解決問題，而係打坐可以令你知道問題響邊，睇到到底而家發生緊咩事，然後學識解決或者知道要練習啲咩去解決。 打坐唔係短時間見效嘅嘢，而係一個過程。

一開始學打坐，一定有個問題係「做唔到心無旁騖」。開始學到而家都兩年，我都從來唔覺得自己學識咗，因為幾乎每一次我都有念頭升起。都試過好焦慮好嬲自己咁廢，控制唔到自己諗嘢。但後來睇書見到，其實有念頭係好正常，而點樣唔好執住啲念頭就係打坐要練習嘅嘢。

同埋每一日，人嘅狀態都有所唔同，只要將打坐當成每一日檢視自己嘅機會就可以。可能今日焦慮啲、聽日心散啲、後日會專心啲。要對自己寬容啲，接受自己唔係下下都最好狀態。月有圓缺，人都會有狀態好壞，只要知道然後接受，再練習做好啲就可以。

其實打坐好似做Gym咁，做Gym係練習你嘅肌肉，而打坐就練習你腦袋同心靈嘅力量。點樣去說服自己嘅執著、情緒同埋衝動。打坐係反覆練習點樣說服自己，點樣去好好處理呢啲嘢。

打坐係一個好好嘅機會去了解問題，之前講過人生係一個練習：

講好容易。真係要轉Mindset好難的，但係由你決定要改變+awareness開始。過程會係如下：

1. 後知後覺：你會响自己做咗某件事之後一陣先醒起「頂吖又做咗」

2. 無咁後知後覺：你會响自己一做完就發現

3. 即時知道：你會响自己做緊嘅時候察覺自己做緊，但都阻止唔到自己

4. 即時知兼阻止自己：你會响自己做緊嘅時候察覺自己做緊，然後成功剎車

5. 响你做之前已經發現自己有呢個念頭：成功阻止，甚至換其他方法。

6. 連念頭都唔會再出現：恭喜你，你已經成功

而打坐就係會幫你由第一步開始，知道發生咗咩事先。

其實當中個原理我都唔係好解釋到，但成日打坐嘅時候都會諗起啲做過嘅嘢，然後會諗到自己咁做嘅原因。 譬如試過打打下坐，發現自己對K咁執著嘅原因係，我好羨慕佢可以唔理其他人嘅眼光做自己，我好想成為佢嘅狀態，亦都好想得到佢嘅認同。

知道咗第一次之後，我响自己做咗啲唔應該做嘅事之後，打坐就會諗起，會「Fuck又做咗」咁樣。之後慢慢就會越來越高Awareness，練習多啲就會容易啲阻止自己做傻事，或者有能力同自己講「喂你咁做都係想佢讚你姐，但你唔需要呢啲嘢架喎，你已經做得好好了」。慢慢做傻事嘅念頭就唔會再出現咁多，希望遲啲連呢啲念頭都會無埋，咁就真係功德圓滿。

但人生係好漫長嘅練習，啲嘢咁容易就唔使我學我練習啦。所以真係要有耐性，以上嘅過程係可以數以年計的。但打坐可以令你加速少少，容易少少，平靜少少，開心少少。