所謂嘅一念之差

關於我、我Best Friend同佢架舊車嘅故事。

早兩年有一晚，經歷緊抑鬱症嘅低潮，响宿舍房喊到收唔到聲。覺得好痛苦，唔止心好痛，成個人都好似無晒力，想尖叫想打牆，想自己舒服啲。

去到一個位，好想死。其實唔係真係唔想生存，只係唔想再辛苦落去。感覺好似已經唔會再有希望，我以後都淨係會好似殘缺嘅人咁，好想逃避呢種痛苦，所以想死。

見到Facebook有朋友share咗港大最新嘅防自殺短片，係一個男仔遇上一個的士司機，最後成功捱多一晚，捱到第二朝佢就冇事了，捱過咗。

睇完，我反而覺得自己捱唔過了，一晚我都唔想再捱，太辛苦，我好怕。

我打開咗個窗網。打開咗窗。跨咗一隻腳出去。

淚流滿面望落去，見到樓下7–11嘅燈光。

覺得跳落去就一了百了。第一次無覺得怕高。

然後望到下面有架車。突然一個念頭浮上嚟「跳落去會砸爛人哋架車」，做人嘅時候有病已經帶咗好多麻煩畀人，死都要搞著其他人，會唔會太過份？

有啲猶疑，唔想帶麻煩畀人，車主一定會多得我唔少。

最後我無跳到。閂窗，坐落床，繼續喊通宵。

過咗一段時間之後，我認識咗我最好嘅朋友。機緣巧合之下，發現原來佢係個架車嘅車主。而個架車，其實係佢嘅舊車，根本唔會再用。

知道嘅時候，我有少少哭笑不得。早知個陣唔咁considerate，跳就跳。
同一時間又覺得，冇死真好，緣份好奇妙，我哋而家係Best Friend。

一念之差嘅嘢。