如何遠離有毒人士
同Toxic寶寶畫遠距離全攻略
身為仆街磁石垃圾屎（近年有好轉嘅），同Toxic人類嘅緣份深不見底。但講到尾，都係四隻字 — 「自己攞嚟」。
講到尾，無人攞住支槍要你留响一個令你唔好受嘅人身邊，自己揀架，仆街都好應份。 姑勿論出於咩原因，唔帶眼識人、覺得自己淨係值得仆街… 乜都好，永遠要記得，你有得揀，冇得一邊怨一邊又要磨爛蓆。
如果揀繼續留响有毒寶寶嘅身邊，最緊要就係唔好做受害人，唔好victimize自己。如果你身邊嘅有毒寶寶對你唔住，mistreat you，而你唔知基於咩原因唔想同佢畫遠距離，而係繼續同佢做毒氣雙子嘅話，你要記住你自己揀咗。你主動選擇咗留低嘅一剎那，你就唔係受害人。當然，你可以唔開心，你可以嬲，但你唔係受害人。你淨係可以搵方法去令自己好受啲，而唔可以怪有毒寶寶對你唔住。
但如果你咁揀，你身邊啲朋友知己應該反晒白眼，覺得你應該撼親個頭，先會咁樣作賤自己。我啲朋友成日反住白眼同我講：Well阿囡， 值唔值得呢啲係好個人嘅決定，你開心就好。同埋， 你頂唔順自然就會收皮，唔到我催促你。然後補多句，I think you deserve better lor~
如果人係可以時刻都咁理智嘅話，就唔會有咁多瓊瑤讀者啦係咪？
但去到真係頂唔蒲，想收皮搞返好自己嘅個一刻，發現其實唔係講咁簡單。
你自己心知肚明啦，有毒寶寶可以有幾影響你內在嘅平靜，可以令你典床典蓆，可以令你幾辛苦，你自己知道架。你自己直覺都已經知道，呢件事註定失敗收場，你知道自己辛苦，知道自己感覺能量被抽乾。
但搖搖擺擺話抽身講左九幾萬次，然後有毒寶寶對你微笑一下，oh shit，我要暈了，失敗。話唔玩喇攰喇拎個心出嚟真係玩唔起喇，諗返起呀唔係喎其實有毒寶寶都有對你好過。
It is all about determination。從來呢啲嘢最大嘅敵人都係自己。
畫遠距離最好嘅方法就係真係劃遠距離，唔好搞咁多嘢，起碼俾時間自己回下氣先。
然後就係正本清源。點解你會容忍自己呢個狀態，即係如果你Best Friend咁樣畀人對待，你應該著咗十世，點解你唔會咁樣為自己嬲？ 聽Therapist講，呢種行為主要係來自冇Self-worth。（係，back to square one，你要鍾意你自己）因為覺得關係應該係咁樣，自己就係值得咁多，所以就會縱容其他人mistreat自己。
或者係你覺得你唔會遇到更加好／靚仔／聰明／善解人意／了解你嘅人；或者係你唔甘心咁努力但都係會無成果。但講真啊，我上一次分手都以為自己呢世都唔會遇到更加好嘅人啦，我都好唔甘心自己咁畀心機都無好下場架，咬牙一段時間而家就樂得清閒。
不過係好難一時三刻相信會有更加好嘅人，但你可能過3個月之後諗起，你就會心諗自己點解會覺得佢好哈哈。而努力好多時都係冇成果架，世界上太多嘢都係徒勞無功。唔好咁用力可能會仲好過。我聽過一句好有哲理嘅說話， “Not doing something is already doing somethnig” 唔係下下都要扭盡六壬去嘗試做啲咩令件事變好先係真係為件事好嘅。呢啲嘢都唔到人唔接受，就算呢刻打爛晒房嘅嘢，發晒脾氣，都係咁架啦，太多嘢out of reach。
「他愛我嗎？他是不是更愛別人？他比我愛他愛得更多嗎？也許我們所有這些關於愛情的問題，這些度量、測定、試探以及對愛情的挽救，都有一個附加效果，就是把愛情削弱。也許我們不能愛的原因，就是我們急切的希望被人愛，就是說，我們總是要求從對象那裡得到甚麼東西（愛），以此代替了我們向他的奉獻給予，代替了我們對他的無所限制和無所求取 — — 除了他的陪伴。」
生命中不能承受之輕
同埋我始終相信吸引力法則，如果自己個人好，係根本唔會遇上有毒寶寶。
不過睇死我身邊呢排所有搵我救命想斬纜嘅朋友，你哋都係會典多一頭半個月無限on and off然後乜都做唔到繼續畀有毒寶寶迷到唔知方向。
因為我試過，我真係試過。
但千山萬水之後，會陪住你嘅都係我同你自己。玩還玩，只要唔係斷手斷腳喪命或者有情緒病，玩死自己都好，你都會搵到方法幫自己好好收屍。 之後就會學識錫自己多啲同真係同toxic嘅關係同人劃遠距離。
