如何－冇marking scheme的練習

有時人生嘅難題，唔係在於你識唔識啲道理，而係在於「如何」。

張懸（安溥）《如何》|| 每次我唔知點算都會聽嘅歌

18年1月17：

過去半年是我認知中最難捱的半年。病發－分手－病情每況愈下－看病吃藥－哭鬧，幾乎每天都過得好差。每天都想過得好，每天都想重新整理自己的生活，卻是無從下手，天天看著自己的生活離析分崩。逼著自己面對時，卻發現唯一知道的是「你好亂，需要整理」，但從來無人告訴你「整理」是什麼一回事。

出現問題嘅時候，其實你知道的，你知道自己過得唔好，你知道而家有啲嘢出咗事。你好想變返好的，但到底要點做呢，點樣先可以舒服啲，點樣先可以唔再痛苦。

你去問朋友，你去睇醫生，佢哋全部都會同你講「你要準時食藥」「照顧好自己」「我想你好」「你要接受自己」「要愛自己」。聽落去，全部都係Bull Shit。我唔好呀而家，我搞唔掂呀，我想知道點樣先會變返好。

個感覺真係好差。好想搵方法，好想搵出路，但搵唔到，每日淨係睇住自己一日一日咁捱過。

你淨係知道自己需要改變現狀，要變得愛自己、接受自己，但點做到，真係唔知。

「要愛自己」咁即係點？「要接受自己」咁即係點？

睇咗好多本self-help books、日日打坐、日日同朋友deep talk，我都係唔知即係點。一直都响呢個「咁即係點」、「咁即係要點做」、「方法係乜」嘅位苦惱，終於忍唔住問家姐。

答案係 “Trial and Error，每個人都唔同”。

What the fuck? 呢個答案恐怖過無答案。

從來冇試過自己搵答案。細個讀書，我係考試機器一般嘅存在，溫書操卷，務求一嘢命中題目。細個同人相處，你知道有套pattern apply落某類人就唔會死。响咩環境都有一套生存方法。點可能無標準答案。點可能呀你話我知？

呢套「標準答案」mindset害死咗我。

我太崇拜marking scheme，我將每一件事都當成考試，pass or fail，然後失敗就係廢、失敗就係failing someone、失敗就係自己唔夠努力。然後發生咩事？就係我每一次「失敗」我就起勢怪自己，點解唔努力啲，努力就會做得好。每一次「Fail」我就搵方法去贏個遊戲。然後我變到「輸唔起」「無勇氣」去Trial and Error，因為我個世界係唔容許「犯錯」，曾經發生過好多嘢令我覺得唔可以「錯」。

你而家同我講Trial and Error即係要我推翻以前接近20年嘅價值觀，真係好恐怖。

但人生唔係咁的。應該講，人生未必要係咁樣。 Events in life are not tests to be passed, people are not prizes to win.

人生其實係練習嚟。

好似你學樂器咁，第一次彈一隻歌一定係唔好。練十次、練一百次之後，就會好咗。但你唔會怪自己第一次彈得差架嘛。（會都唔好chur自己啦，乖）

講好容易。真係要轉Mindset好難的，但係由你決定要改變+awareness開始。

過程會係如下：

1. 後知後覺：你會响自己做咗某件事之後一陣先醒起「頂吖又做咗」
2. 無咁後知後覺：你會响自己一做完就發現
3. 即時知道：你會响自己做緊嘅時候察覺自己做緊，但都阻止唔到自己
4. 即時知兼阻止自己：你會响自己做緊嘅時候察覺自己做緊，然後成功剎車
5. 响你做之前已經發現自己有呢個念頭：成功阻止，甚至換其他方法。
6. 連念頭都唔會再出現：恭喜你，你已經成功

咁即係點先做到？我都唔知道點先可以開始呢個過程。有時候係Clinical Psychologist同我傾計嘅時候有awarenss開始，有時候係同朋友促膝長談嘅時候發現自己有呢個pattern，有時候係睇返自己寫嘅嘢，有時候係見到其他人…

始終都係冇一套方法，無標準答案的。真係令人好焦慮。

身邊啲人成日叫我 “Trust the process”，冷靜嘅時候我知道佢哋講得啱的，我已經on the right track，知道自己唔鍾意現狀嘅乜嘢，；唔夠冷靜嘅時候淨係想DNLM，我而家要知道結果標準答案係乜呀！我要知道而家呢一刻要點算呀！

要按耐得住呢個DNLM嘅衝動，其實係要有耐性。而耐性都係練習返嚟，都係要經歷嗰個過程架～（仰天長嘯：點解？話我知點解咁難？）

而有情緒嘅當下走去整啲output紓解下啦，都無其他辦法，去唱K又好畫畫寫字又好，總之搵啲嘢搞下，試下分散下注意力。

接受個世界就係無標準答案，就係好亂，係好難好痛苦。

接受完之後，要有勇氣去Trial and Error，更難更痛苦。响接受人生冇marking scheme之後，你面對嘅就唔再係一份份試卷，而係一大片平原，一望無際。 要點行、行去邊，全權由你決定。 即係，你要為自己嘅人生負上全責。無人畀你賴、無人幫你做決定。

最可怕係，呢個响平原嘗試搵自己想行嘅路嘅過程，其實叫做「生活」。呢條路係由每日每時每分每秒組成，每一個當下，你都行緊嗰條路，為自己附近責任。

我得嗰廿幾歲，大佬我點知點行啊，我好驚啊，行錯冇得返轉頭架。

點算啊啊啊啊

“Alright, alright, calm down. Listen to me, Morty. I know that new situations can be intimidating. You looking around and it’s all scary and different, but y’know, meeting them head-on, charging into ’em like a bull — that’s how we grow as people. I’m no stranger to scary situations, I deal with them all the time.”

如果你都覺得迷惘同不安，同成日諗「咁即係點」「咁而家要點做」嘅話，我希望你知道，寫呢篇文嘅垃圾屎係經常處於呢個暴走唔知點算嘅狀態，你已經做得好好了。萬事有我陪著你一齊仰天長嘯，然後死死地氣繼續練習。

愛你喔❤ 唔好死。