大英博物館：日不落帝國

有多啲建設性嘅遊記。

無建設性嘅遊記： 大英博物館：唔可以失去好奇心同對世界嘅熱情

行完大英博物館嘅另一個感受就係「日不落帝國」真係一件好偉大嘅事。

响我去倫敦之前嘅半個月左右，我睇完加重睇一本叫做《Sapiens: A Brief History of Humankind》嘅書。一直都有聽過呢本書，但一直都無興趣拎嚟睇，作為考過西史嘅人，歷史書嘅quota我一早已經睇滿咗。但由於好幾個我好崇拜嘅朋友加埋意中人都極力推薦，我就抱住半信半疑嘅態度開始睇，一睇就停唔到。 本書用好簡單嘅脈絡，解釋咗成個人類文明嘅起源，解釋咗而家社會嘅造成係基於大家共同相信嘅「大話」。強烈建議所有人都要第一次呢本書，睇完之後世界會make sense好多。自己睇完之後去行大英博物館，覺得所有嘢都好似易明咗啲咁樣。

至於呢本書點解關大英博物館事呢？ 書入面有一部份係講殖民地嘅歷史，入面提到英國人管理殖民地嘅手腕，大英博物館嘅館藏就正正反映咗呢一部份嘅歷史。

書入面講到殖民者（尤其係英國人），去到新嘅領土，佢哋會用好多心機時間去了解、學習有關殖民地嘅一切。佢哋唔單止「擁有」咗嗰個地方，仲會學習買佢哋嘅知識同文化。英國人去到印度嘅時候，唔單止淨係將佢變成一個殖民地，仲會研究嗰度嘅古蹟同文化，好多關於古文字嘅研究都係嗰個時候做的，之後更加成為咗comparative linguistics嘅基礎。好似當法國去到埃及嘅時候，佢哋發現並搶走咗咗個一塊遐邇聞名嘅石碑Rosetta Stone，上面有3種語言，成功幫佢哋搵到古埃及文字嘅意義同結構。

呢啲嘅發現對於殖民地嘅歷史考察或者對於佢嘅文化保育真係好有用。當然，我唔係想為帝國主義塗脂抹粉。响大英博物館入面，見到好多成個Hall咁大嘅展品，譬如係The Patrhenon嘅雕刻、The Nereid Monument，都會心諗「嘩你哋當年咁determined要運佢哋返黎，都真係幾狼死」。去到而家，各地嘅政府都要求要將呢啲文物歸還，有時都會覺得可能真係要還架。

印象好深刻就係行印度、伊朗嗰啲地方嘅展區。7月去印度嘅時候去咗Taj Mahal參觀，同行有一位伊朗人，佢非常仇視英美國家，覺得佢哋係世界嘅侵略者。當我哋都入去泰姬陵嘅主建築入面嘅時候，佢咬牙切齒話，呢個Hall入面本來全部都佈滿寶石，但係英國人嚟嘅時候就將佢哋偷走晒，然後講咗好多英美國家嘅劣行。我當時係不置可否嘅，因為我真係唔識。但行到入大英博物館，見到入面咁多响眾多响唔同古蹟到得到嘅「贓物」，都開始覺得佢講得冇錯。

不過行到去中國展區嘅時候，呢種心情已經完全消失。望住保存得咁好嘅文物，不禁會諗，就算唔係英國「偷呃拐騙」咁搶走晒啲文物，有幾多件文物又可以响內戰、文革之後仲留得低？仲有就係，當時嘅中國或者其他曾經被英國殖民過嘅地方，自己本身係有能力好好保存同研究啲文物？呢種好典型嘅帝國主義心態 — 「我哋係嚟enlight你班barbarian」，其實有啲時候真係錯唔晒。不過可能只係係我無其他Point of reference，歷史都已經發生咗，我無辦法去想像其他可能性。

行完之後，我對於英國嘅官僚制度同英國嘅崇拜更上一層樓。首先係單憑大英帝國以前作為「日不落帝國」版圖之大，真係响大英博物館嘅館藏入面可見一斑。雖然而家無呢支歌仔唱，但係英國作為殖民者，算係唔錯，文化保育做得好，只係為咗管理都會用好多人力物力去研究殖民地。唔知响邊度聽過一句「讀英國歷史，咪即係讀世界歷史」，聽到真係想拍手哈哈。同埋，香港主權移交咗咁耐，個官僚系統就無人駕駛咗咁耐，仲三番四次亂咁搞啲咩問責制，到而家呢一刻都算行之有效，已經足以見證英國人嘅管治手腕有幾高明。