大英博物館：唔可以失去好奇心同對世界嘅熱情
無建設性嘅遊記。
有多啲建設性嘅遊記：大英博物館：日不落帝國
早幾日一個人去咗倫敦，留咗4晚，其中有一日當然就係留畀相傳行幾日都未行完嘅大英博物館。我都真係幾鍾意倫敦，雖然好迫好多人，雖然METRO入面好侷促，雖然好貴，但唔知點解我就係好鍾意倫敦。臨走之前先發現，因為倫敦有齊我最喜愛嘅事物。
一朝早就到咗大英博物館門口。 嘩，咁多人嘅。入面一定好嘈好迫，即刻想打退堂鼓。
「British Museum 多人到我唔想入去:neutral_face:」
「It’s worth (it )to go.It takes a few days」
收到意中人嘅保證，我都係決定心不甘情不願咁樣排隊安檢入去，而唔係去Oxford Circus行街。開始行就發現不得了，真係唔會行得晒，大部份嘢都好有趣！
有一瞬間，我好似返返去初中未需要面對咁多讀書壓力同需要Play cool嘅同儕壓力咁，可以真係毫不掩飾咁欣賞呢啲好靚好有價值嘅嘢咁樣。 我諗响自己上咗中三之後，已經好少再睇Musical亦都好少再行博物館或者睇自己真係好有興趣嘅書，慢慢都唔係好記得原來呢啲嘢會帶畀我咁大嘅享受同快樂。係直到近期，重新睇過一啲作品，先發現，喂原來我係咁樣的。
我係先行非洲展區地下嘅果一層，然後逐層逐層行上去。行到去睇埃及嘅展區，見到木乃伊同好多埃及嘅文物，個腦自動浮現咗好多相關嘅知識，整木乃伊嘅過程、每一個神會守護邊一個器官、埃及嘅歷史… 我都唔知呢啲嘢我幾時邊度學返嚟。 於是我坐低響啲展品前面，好認真回想到底自己點解會知呢啲奇怪嘢，到底係點樣學返嚟。之後一直行，一直對住啲花樽呀瓷器呀珠寶呀雕塑响度若有所思，好似係因為乜乜原因，所以佢咁設計。
但當刻真係醒唔起，但嗰個「點解會記得呢啲嘢」、「我好似唔知邊度讀過」嘅感覺，响大英博物館入面不停出現。去到食晏嘅時候，先醒起係細個對古文明好有興趣，於是𦧲爸爸買咗好多好有趣而且勁抵死嘅科學同歷史漫畫，然後放學返屋企食晏嘅時候邊食邊睇（壞習慣到而家都改唔到），然後日積月累慢慢學識呢啲無謂嘢。
不過唔知幾時開始，呢啲我覺得有趣嘅嘢已經冇再响我生命入面出現過。曾經對個世界好多嘢都好有好奇心，好想知多啲，覺得個世界好大好正，對個世界好有熱情，好想出去試下大冒險。
只係隨住年歲漸增，呢種熱情變咗做其他嘢。對於世界嘅滿心希冀，隨住參與社會運動已變成憤世嫉俗；對於世界嘅好奇心求知慾，隨著學業嘅壓力增加漸漸變成一種得過且過嘅心態；對於世界嘅熱情，隨著真係踏咗半隻腳入現實世界而變成怯懦同逃避。
因為感受到太多負面情緒，而慢慢對世界變得麻木嘅時候，其實同一時間，我對於世界嘅熱情亦都一樣numb埋，變咗以前最唔鍾意最睇唔起嘅大人。而我唔想再係咁，唔係好想再對個世界疏離同無感地生活。
行完大英博物館，我再一次感受到嗰種求知慾大爆炸嘅感覺，同埋覺得好開心「係喇，呢個係我喇」。過咗就快6年之後，搵番想好好努力嘅動機。平時都唔算係好懶散，讀書嘅責任做足grade唔差，返工老細交代嘅嘢全部達標，但就係自己會心虛覺得自己得過且過。响博物館感受到嘅「想努力」係公開試想好好努力中英文都攞個5**返黎既個種想努力，唔係水過鴨背就算，而係我想盡全力，而且會盡全力。唔麻木對我來講就係好好捉住呢種求知慾大爆炸嘅感覺，好好捉實個「努力公開考試mode」，去好好做好想做嘅嘢，但凡心虛嘅時刻，即係要再做多啲嘅時刻。
但係呢，唔麻木嘅意思好似就係好壞都要一併接受。諗下都覺得有啲恐怖…
焦安博 （張懸）：
你總有一天會看到， 一些東西有重新引發那種 我想要知道我是誰的渴望。 所以關於， 虛無但沒存在感; 跟有存在感但很痛苦， 這兩個東西，其實你在每個階段裡都會體會， 你也可以在每個階段換著 去當當看， 直到你發現…. 我願意有感覺， 所以有痛苦也有快樂地活著。 或者是說， 欸其實我希望我心如止水，也可以 這個選擇都是你自己的。 只要這對你來說， 這是你人生因為體驗， 所以做的決定 而有的心得。 我相信這個世界都會祝福我們的。
不過你問我要點樣做先係「有熱情」其實係冇答案的。拾家姐嘅牙慧咁講，「有熱情」就係好好享受滿足好奇心同求知欲、學習新知識帶來嘅喜悅。享受唔等於無痛苦或者唔辛苦，而係心甘命抵咁去咬緊牙關，辛苦笑著快樂痛咁樣囉。同埋，腳踏實地，唔心虛。
行完大英博物館除咗呢啲咁私人嘅感受之外，我都有啲有多少少建設性嘅insight嘅，等我寫埋佢。
