Member-only story
大時代下的小情小愛
有時候覺得，大時代下仲為小情小愛苦惱都幾奢侈，但都好幸福。
有時候望住香港，好似冇嘢令人開心，好似啲時間唔攞去抗爭、準備抗爭、讀書、令自己變得對香港更加有用，就係浪費咁。休息去旅行斷網幾日，都好似下「休息係為咗行緊遠嘅路」，所有嘢都係為咗「大業」。 雖然話就話唔係苦行抗爭，應該可以have some fun，但真係開心時都會內疚。
有時為咗啲自己嘢好有感覺，會覺得有啲內疚，好似全世界打緊仗，我仲响度醉生夢死咁樣。
9月16：
念念不忘，必有迴響。點一盞燈，有燈就有人。本來導演指的是技藝傳承，同伴指的是大業，我指的只是你。故事中執拗的人，緊緊守著過了一世，我呢，你呢。有一天會到我想將歌詞送給你嗎。我們都只是人，多變反覆，有一刻我知道一切都沒變就夠好了。也說不出甚麼執拗的說話，因為執拗也是會改變。
執拗不是說的，是穩穩的捧著，然後一直捧下去。捧在手心裡，或者高舉過頭，一直下去，再不拿起另一樣。也不是沒心思要去選擇下一件，而是看見了總不如已經捧住的這一份。所以也不敢說執拗，可能下一秒我就捧起了另一份。
在改變出現之前，努力捧住、守著，念念不忘。
9月嘅時候，我一時有感寫咗呢堆字。
個陣係畀啲人事煩得好緊要，自己好似冇做錯事但就好似失去咗啲我好重視嘅bonding咁樣。然後我就響度典床典蓆，不停諗不停鑽牛角尖。但同一時間好多其他打擊，又好忙。都唔知點樣get myself together好，一起身就喊全日都係焦慮同埋抑鬱嘅感覺。
有心事但會唔敢搵人傾訴，每個人都面對緊好多嘢 — 身邊有人被捕、身邊有人受傷、自己被捕、自己受傷、同屋企人鬧翻… 相比之下，我呢啲就好似好小事咁。會不自覺去judge自己，用一個好宏觀嘅覺得去睇自己啲嘢，因此覺得自己嘅嘢都唔重要。
自責咗好耐，覺得自己「好唔應該」，有精力去典床典蓆，不如去睇多份paper，去見多個人，做多幾個訪問，而唔係為咗呢啲小情小愛响度浪費精力，應該同其他人一齊集中「大業」。 所謂嘅「大業」，對我嚟講其實係啲咩，我好認真響度諗。
我話，我想要嘅嘢好簡單。我想要一個digital rights嘅career，平時行街買衫睇戲食飯買下衫同唇膏食下tea，同心愛嘅人煮下飯仔傾下deep talk就好，甚至係痴男怨女式糾纏。 「大業」嘅成功，就係我可以心安理得去做呢堆嘢嘅必要條件。
咁其實唔駛內疚呀…?
我都係好好珍惜想小心翼翼守護嘅關係同人事物。仲會感受到呢啲小情小愛，證明我都仲係一個「人」，仲有感情仲有感受，證明我有想努守護嘅生活型態。亦都證明，其實我都仲係幸福嘅人，我仲有能力去感受去經歷呢啲嘢，有啲人已經唔會再有機會去感受任何嘢。
我成日話，我哋每日盡力過好佢就已經係我哋可以為其他人、為香港做到最好嘅事。我覺得，過好會應該係包含埋盡力去感受呢啲小情小愛，盡力去為咗自己心愛嘅人事典床典蓆，咁樣先係live our lives to the fullest.
但最好啲嘢就順順利利，唔駛我成日鐵達尼模式咁典來典去。
