同香港拍拖
上一段感情慘烈地失敗。
咁港女失戀時會做啲咩？ 除咗睇港女語錄、聽慘歌、喊同𦧲地之外都無其他啦係咪先。走出失戀最重嘅陰霾之後，就開始認真研究到底戀愛關係係咩一回事。
然後綜合N篇勵志self-help同關係專家心理學家嘅文同睇咗N條Anna Akana嘅YouTube videos之後（誠意推薦），港女為一段關係得出以下結論：
- 首先你要自己照顧好自己先 。起碼你要開始學習照顧自己，為自己負責任先好開始拍拖，如果唔係你另一半慘過死。【強烈推薦：From Godric To Beyoncé God姐給女生的三點建議】
- 要努力溝通。In short就係要俾對方知道佢衰咩／你而家咩環境／有咩可以做唔可以做，唔扭屎忽花唔玩passive agressive。
- 接受對方as一個人，唔好Project唔好FF。
- 要明白愛就係100%接受一個人當下嘅狀態、過去同埋未來嘅所有可能性。
- 開始以「我哋」做主語，諗野會開始用「我哋」出發。有時好想發脾氣，但當你諗到咁樣只係會令「我」爽一下，但「我哋」係會奶嘢，你會忍得住唔好發脾氣，而係冷靜地同你BB講「嗱我而家因為XXX條氣唔順，你一係即刻氹返我，一係畀我自閉一陣。我知你唔係想令我條氣唔順，其實問題係源於YYY嘅陰影，但我真係好唔開心」
其實2,3,4,5都係建基於1 — 即係你照顧好自己，比較了解自己想要啲乜，自己畀到安全感自己。真心努力試過之後，要可以面不紅氣不喘唔掙扎嘅情況下直接或畀對方知你嘅感受，其實係一件好chur，感覺好脆弱嘅事。（當然，經常落得少女心碎一地嘅情況。）
然後港女開始學呢5樣嘢，努力嘗試同其他人建立一段關係。真心多謝身邊人願意陪我練習、陪我一齊改變、接受我就係未係做到100分嘅樣子，而我估佢都應該好努力一齊做緊嘅哈哈。
言歸正傳，當我哋同人哋建立一段關係應該係咁樣嘅時候。對於我哋自己嘅城市，又應該點呢？
我今年22歲，2個月之前離開咗香港，一段長時間之後先會返去。即係我同香港已經建立過一段22年嘅關係。同香港拍咗拖22年，我自問我都幾愛佢呀，但好似佢唔領情咁。
係，香港真係好唔善待香港人。但可惜嘅係，身邊伴侶你理論上可以搵幾多個都得，但自己嘅國家同城市，只係得一個。 即係冇得你揀嘅意思。
當然你可以移民，即係分手啦，你唔夠愛香港。完。
咁假設我哋都想同香港一生一世啦好嘛。
而家我同香港嘅關係，大概就係一對鬧交冷戰嘅情侶。而我揀咗出國透下氣，等我冷靜下。但我知道我始終會返去，我係唔會離家出走，去第二個國家／第二個人嘅屋企尋求慰藉。 同居鬧過交都會知，間屋嘅氣氛真係會好難頂，空氣好似就快凝固咁。但一定會返屋企，其實係話俾另一半知「我努力緊架，我唔想放棄」。
好多時候，關係嘅問題都唔係可以「噠」一下手指解決。可能我哋會對住朋友呻，「頂，佢都唔了解我嘅。」「佢真係好不解溫柔囉」「佢真係好幼稚呀」，而益友多數都會幫你解決情緒，令你見到卡住嘅點响邊度，而普通朋友或者損友，就會不問因由附和你「係囉，佢仆街嚟架，分手啦。」講到尾，旁人可以畀嘅，都只係建議、鼓勵同勸勉。真正要去解決問題，繼續行落去嘅始終係自己。响同香港拍拖呢個case入面，同香港解決問題嘅，始終都係香港人。
遇到關係嘅難題，一定係痛苦不安而且好焦躁難耐，但唔係你喊住大叫「我咁愛你，點解你唔明」，問題就會解決。
如果真係「愛」，再難解決再焦躁，你都要忍住，同自己講「我賴死唔走架喇」。
試下响照顧好自己既前提下，去思考「我可以為咗我哋做啲咩」。
當你唔再淨係聚焦响痛苦，而係嘗試行動，事情會唔再一樣。問題會由「點解你睇唔到我有幾愛你」、「你係咪唔再愛我」變成「我係咪真係愛你」、「我有冇真係去愛你」。
我有冇真係去愛香港？
我而家做緊嘅嘢係咪真係愛香港？
我有冇啲咩可以做到係真係愛香港？
我係一個成日都會擔心自己唔夠好，唔夠好就唔值得人愛嘅人。但我開始會唔俾自己諗呢樣嘢，淨係諗我有冇真係去愛佢，定係只係响佢身上荷求validation去令到自己感覺被愛。
而可能去到尾，呢個人唔係我嘅真命天子。可能我哋最後都係會收皮，但唔緊要，愛就係選擇，選擇就係捨棄。愛就係接受對方一切可能性，包括佢可能永遠都唔會回報你嘅愛意。
對住香港都一樣。 可能香港永遠都唔會變好，但因為愛，我都係會努力去愛香港。
好肉麻，頂唔順，但又好似真係咁。
