雜記：單詞的意思
細細碎碎無辦法寫成一篇文嘅嘢
Body positivity唔係自己對住塊鏡孤芳自賞，而係滿心感動發現呢個身體支撐咗你好耐嘅一剎那。Take a moment to feel how it enables you to feel fierce and really take a moment to feel fierce.
尋日上Pole Dance，有一個trick練咗成個月都未得，上一堂同學話我知原來係我隻腳放錯位，尋日就成功做到了。有一刻發現自己大力咗好多，雖然次次落堂都氣來氣喘、腳震，但我個身體令我做到好多嘢。坐响Office坐八個鐘、不停睇Journal同書學新嘢、放工仲去跳個半鐘Pole Dance，忽然間身體肥咗瘦咗好似唔重要。我個身體真係好勁，畀我玩咗22年，五勞七傷都仲做到咁多嘢，都仲响所有時刻都支撐住我。
每日返工都覺得自己瞎子摸象咁。 根本無人知我哋問緊嘅問題係啲乜嘢。
被風沙蒙著眼，想要往前走就要伸長雙手摸索著前方有無異物，有時摸出了一點東西，但沒有摸著端倪那是什麼。摸索著，只能用自己有的比喻和借代來形容。瞎子摸象一般嘗試理清面前的世界，即使一片混亂仍然覺得歡快，找答案有種歡愉。有時知道面前的是全新的，無可能用舊的比喻去談論，但我只有舊的，要將新的也變成舊世界的一部分。因為一暴露在空氣中沙塵中，新的就變成了舊，更新的還在前頭。
這年用得最多的字是Hybrid，所有新的事情我都稱之為hybrid。沒有舊比喻可用的時候，就用舊框架稱之為畸形的、奇怪的混合體。
也許遲一點回頭，會看見摸索的全貌，但更可能是我已經追趕著下一個要摸索的現象走了。
改變：佢以前唔係咁
友人傳來一篇訪問，受訪者是另一位朋友。單看標題已經挑起了眉，越讀眉挑得越高，看罷嘆口氣「佢以前唔係咁」。以前佢好inspiring，會晌玩完房Game，問下大家點解短頭髮就會係隨便啲，後面有咩stereotype；講完鬼古揭尾故，講下怕黑怕鬼係來自怕未知。好多優秀、一個打十個嘅同儕，都係受過佢影響 同提攜。
回覆話，其實佢係好榜樣。人到屋簷下不得不低頭，好似大條道理。晌轉折中間係一種咩感受，係會無奈欣然抑或平平淡淡。以前會笑說大家要一併投向甚麼甚麼，到真的到嗰一刻，原來會心有戚戚焉。
成日講勿忘初衷，只希望唔好忘記CYM嗰一刻唔忍心決定除低對平底鞋畀人，赤腳返去，嗰種戇鳩鳩嘅多餘心情，個種唔捨得其他人suffer嘅心情。一條腰帶一道氣!!
迎新
迎新好神奇，會令人瞬間變理想寶寶。
外人睇Hall O真係戇鳩到爆，10日每日瞓得3個鐘，又要dem cheer又要過啲畀人鬧到喊嘅programme，半夜仲要畀大仙咆哮迫佢地過NT。大家都一面痛心同話「我地唔上心，點會搞咁多嘢畀你地新鮮人」，集體情緒勒索新鮮人一般，要佢地成為Hallmate之前狠狠suffer十日。新鮮人往往過嘅時候屌哂鬼，同組mate同仇敵愾，幫Ex-Co, OC改花名，過緊programme嘅時候不甘示弱回罵⋯⋯但總係晌一啲位會畀大仙講嘅嘢trigger到淚如雨下，「你jo-mate嚟架」「屋企人呢？住左hall唔使要屋企呀？」過完十日辛苦到想死，自問一世仔冇乜咁辛苦過，寫龜背時同組mate暗自決定唔會畀bonding走樣，然後再同一晚見證全hall一齊飲醉酒起哄做9其他人係點。
一年後，再re-U，有半組已經好好。到填𨋢紙嘅時候，都係會有唔少人抱住過迎新嘅熱誠去做oc，唔記得左room visit或者細share時嘅不忿同心諗嘅心情。「想帶啲嘢畀freshman」，所以去做oc或者form組。全Hall人都會傾巢而出去做好迎新，去帶一啲我地都唔知係咩嘅value畀親鮮人。
過迎新同搞迎新都令人充滿熱誠，但過完十日就冇左。會諗到底有啲咩係真性情或者真誠嘅反應，定係開始Hall life之後嗰啲日常花生mode先係norm。
Hall education其實唔係咁或者唔止係咁，唔係好知係點，但一直都只聞其聲不見其形。晌被鬧、鬧人、失聲、掟板、感動同委屈中間，因為一啲「人造」嘢中間得到過一啲新感受，啲感受係咪真？出到去no one gives a fuck, but you learned something, didn’t you?
迎新令人對同類都仲有少少信心，只要有需要，人都係可以可靠可以負起責任。迎新最後嘅意義大概就晌呢度。
