初一：齋菜、蘿蔔糕與紅豆糕
今年自己第一次整红豆糕。
初一每年都食齋，嫲嫲總係會响前一晚煮定20個人都食唔晒份糧嘅齋菜。
初一朝早，會先同睇住媽媽忙住佈置全盒，全盒由我懂事以來都係同一個，好似有聽講過係媽媽嘅嫁妝。通常屋企全盒會有糖冬瓜、糖椰子、糖椰絲、糖柑桔，中間圓形嗰架放於紅瓜子。全盒上面會有一對用珠仔穿成嘅桔，唔記得咗係邊個嘅作品了，總會有一封「硬利是」放响全盒上面。另外會再有兩個茄子形嘅容器裝住紅黑瓜子。另外仲有一個籃型嘅玻璃兜，裝住啲糖果，細細個裡面裝嘅係發達糖，但唔知係因為發達糖好難搵定係唔再好食，之後就變咗做日本嘅水果軟糖，到後來就係水果軟糖、Lindor朱古力、Lint一大盒一片片嘅雜錦朱古力同埋大白兔糖嘅組合，有一年媽媽知道我好鍾意食熊仔糖，仲有haribo細細包嘅熊仔糖。
朝早要先向爸爸媽媽拜年，之後會同親戚飲茶，然後上屋企坐吓飲吓茶傾下偈，食下全盒嘅糖果，睇下電視，去到3,4點大家都開始昏昏欲睡嘅時候，親戚就會起身離開。爸爸就會出去接嫲嫲連同佢前一晚準備嘅齋菜返屋企準備晚飯。而大約6,7點，其他親戚就會紛紛到達屋企，互相拜完年，一齊食晒啲齋菜。
响嫲嫲到拎咗啲齋菜，去到食飯，中間其實仲有啲工序。因為嫲嫲習慣煮齋菜都落好多南乳，齋菜會偏鹹，所以爸爸會响張齋菜翻熱嘅時候，順便將掛響廚房，貪好意頭而又實用嘅黃芽白切好放埋落去，加水炒返熱啲齋菜，令佢無咁咸。話就話係齋菜，唔知點解總係有啲大隻蠔豉，上年仲係金蠔添。
晚飯除咗嫲嫲嘅齋菜之外，總會有屋企自己整嘅蘿蔔糕。通常都係媽媽响年廿六、七嘅時候同阿姨一齊整。有一兩年，我都有幫手，幫手切白蘿蔔、幫手開粉。屋企開粉嘅手法有啲特別，亦都係因為呢個方法令到成品食落口唔會削，另外屋企嘅蘿蔔糕淨係用蝦米同白蘿蔔，唔會落冬菇，因為容易變同埋會遮咗蘿蔔嘅味。蘿蔔會一般刨絲一半切條，媽媽話咁樣口感好啲。屋企嘅蘿蔔糕真係最好食架哈哈，除咗蘿蔔糕以外，基本上我係唔食白蘿蔔的，聞到陣味就覺得唔鍾意了；住宿舍嘅時候，仲會拎最少半底屋企嘅蘿蔔糕返去慢慢食。
通常餐檯上仲會有爸爸同事屋企整嘅芋頭糕，我自己好唔鍾意芋頭，所以好少食，但嘴極尖嘅爸爸媽媽都話好食，應該都真係好食。有時仲會有年糕，有幾年媽媽會特登入布袋澳買年糕，薑汁年糕煙煙靱靱煎香咗真係好好好食。可惜之後幾年質素差咗，上年買嚟再試都係失望而回。
晚飯仲有白飯任裝。因為屋企飯廳坐唔落好多人，所以作為細路嘅我哋，通常都要坐響客廳地下圍住茶几食飯，德高望重嘅長輩同大人就可以坐响飯枱。但近幾年因為屋企多咗3個塞豆窿，佢地嘅父母都會陪佢哋坐客廳地下方便照顧，我個輩又開始長大，所以有時都會輪到我哋坐響飯廳食飯。再唔係就會拎住碗飯企响度食，行埋餐檯到挾餸咁樣。
傾吓偈食吓嘢，好快就飽。細個嘅時候會盡快同表弟食完媽媽指定嘅份量，跟住問准爸媽就衝入我房玩。早幾年得一個塞豆窿嘅時候，就係等佢食完然後入我房攞我啲麵包超人公仔出嚟娛賓。而家屋企有三個塞豆窿，基本上佢哋自己會好似我同表弟表哥佢哋以前咁，自己玩埋一堆，發明奇怪嘅遊戲。有時電視太悶我哋班唔大唔細嘅人就會開始玩下UNO，輸到甩褲都好開心。細個玩呢啲最唔想輸，輸會唔開心哈哈，但而家有得同大家一齊玩已經覺得好正。
通常去到呢個時候，嫲嫲已經响屋企將梳化度訓著咗扯緊鼻鼾，而所有人都已經食完飯，係得返表弟表哥畀爸爸chur緊叫佢盡量幫幫手食埋淨返嘅齋菜／糕。而媽媽就會拎啲水果出嚟畀大家食，通常都係柑或者橙，表姐同一位姑媽就會大顯神通表現果皮唔斷嘅搣橙／柑，好食懶飛如我通常都係等食。
另一位姑媽整嘅紅豆糕亦都會拎出嚟，然後大家就興高采烈咁用牙籤拮嚟食。姑媽整嘅紅豆糕唔會太甜，好多紅豆，椰子味好重，好好食，食完一舊又一舊。
屋企總會有另一啲賀年食品，茶泡呀、芋蝦呀、人哋家製嘅煎堆呀咁。一般食飯之前都已經會忍唔住口食左少少。食完飯爸爸實會沖壺好飲嘅鐵觀音，機會黎喇飛雲，係時候食呢啲香口嘢。我最鍾意食芋蝦，因為脆脆的一大舊真係好香好好食。通常呢啲時候都會上演塞豆窿同媽媽嘅角力，細路都總係鍾意呢啲熱氣嘢，但媽媽唔會俾小朋友食咁多，所以去到某個位，細路就會開始扭計話「我仲想食呀」媽媽就會話「最後一啖」，多數都「最後」幾次先真係停手唔食。
去到9,10點，大家都會繼續飲吓茶傾下計食下糖果朱古力，親戚就會開始離開，爸爸就會開始清洗用過嘅碗碟，有時我都會幫下手拖下地，更多嘅時候就係為咗無份幫手而心虛但又咩都唔想做。然後爸爸就會送嫲嫲返屋企，而我就會沖涼過多陣訓覺，初二起身去尖沙咀團拜。
新年真係好開心。不過今年我冇得同屋企人過了，一個人響外國，每逢佳節真係會倍思親。就算今年响香港，初一到未必有齋菜食，都唔會再聽到一把中氣十足嘅聲音同我講「嘩乜而家係高妹喇」或者同我講「要俾心機讀呀知唔知呀」，都唔會再聽到沉重嘅呼吸聲同埋梳化上嘅鼻鼾聲了。
