「其實無人想知」
初戀情人就係我老公症候群
「其實冇人想知」多數係「唔鍾意咪唔好用」嘅下一句。
大約一個月前，响柏林嘅一間咖啡店入面，我同意中人用晒兩文三語同另外兩位朋友討論我嘅倡議工作。响佢講完「唔鍾意咪唔好用」，我好努力咁解釋反駁完之後，佢話「我明，但我都係唔同意」。於是，我就開始話，你明白但唔同意係經過深思熟慮同論證，但一般人係無呢啲知識，所以教育同宣傳係幾咁重要呢。佢拋低咗一句「其實無人想知呢啲」。
我即刻畀咗呢個樣佢：
其實係真係無乜人想知嘅… 尤其係香港入面，社會時事鑊鑊新鮮，有心機時間都關心咗啲已經殺到埋身嘅嘢先啦，唉。
但其實，你係需要知道架。
初戀情人就係我老公症候群
香港好多人都抱住「我初戀情人就係我老公，無理由有我份」[1] 嘅心態，簡單來講就係僥倖心態，覺得數位權利呢啲嘢唔關我事。自己係良好公民，奉公守法，唔睇新聞、唔支持港獨、唔搞社運、熱愛擁護基本法，閒時淨係去深圳食下海底撈飲下喜茶，諗下去邊度打下卡影下相，冇嘢唔見得光唔見得人。係你哋呢班廢青，先搞咁多嘢身有屎，要防住唔可以俾其他人知唔見得光。
咁我想問，你係咪真係聖人咁樣，做咩都見得光架？
上一上連登，已經會見到好多關於「帽事嘅」「綠帽唔怕戴最緊要除得快」嘅題目。私德有損嘅事，每一日都發生緊。如果我話你知，如果你同你個第三者嘅對話紀錄會畀個伺服器（server）儲存晒，而又會有啲三唔識七嘅人會睇晒兼且津津有味咁同其他人分享呢？或者你同另一半好甜蜜而有時又好露骨嘅對話，會俾素未謀面嘅人當成甜故咁睇呢？
你有冇send過丁圖畀另一半？如果你用某啲app傳送限時嘅裸照，對方唔可以儲存落嚟好安全啦。但其實你張相係會經過個伺服器，要睇嘅話一樣睇到，你係咪可以忍受到自己嘅全相畀啲陌生人睇晒兼且評頭品足一番。既然其他人可以睇到，佢要儲存落嚟，唔知幾時流出都可以架。你隨時成為下一個「多圖無碼流出」post嘅主人翁。
就算你真係聖人咁樣樣，做人正直從來唔send J圖，你都未必可以倖免。
18年入面，已經發生咗好幾單資料外洩：
－PayMe分別响4月同9月到發生資料外洩嘅事件，一次就係洩漏資料，另一次涉及金錢損失。
－因管理不善而從全球最佳航空公司排名榜節節下跌的國泰航空，3月洩漏咗940萬乘客嘅資料，10月先通知咁多位香港人。
－「轉數快」資料外洩，用戶本人未登記但就有佢嘅戶口資料，响用戶嘅銀行戶口轉數。
－環聯資訊（TransUnion）被記者發現只要憑他人的身份證號碼及公開資料，回答數條簡單問題，便能通過身份核證步驟，可以得到他人所有詳細個人及信貸資料。
你只要曾經使用過以上任何一種服務，你已經有可能係以上資料外洩嘅受害者。好不幸嘅係，呢啲淨係香港本地發生緊嘅事，全球嚟講仲有Facebook嘅劍橋分析事件（涉及最少5000萬用戶資料）、Under Armour資料外洩（涉及1.5億用戶資料）、 British Airways（涉及38萬用戶資料）… 一年有太多呢啲事，不能盡錄。
睇到呢度，我希望你哋個個都有少少不安，發現原來個世界都幾危險。但原來真係唔到你唔用呢啲服務，你只係可以响好多屎入面，揀一舊，都無得分邊舊臭啲，佢哋都係一樣咁臭。
係咪仲可以話「其實冇人想知」呢？
其實想就一定係唔想知架啦，但而家嘅情況已經發展到「唔到你唔知」。當我哋嘅生活都咁電子化，同互聯網脫不了關係嘅時候，你如果關心日常生活就代表你都需要關心數位權利。
呢篇主要係想靠嚇，講下真係會影響「現實生活」嘅嘢。本來想討論埋社交媒體對我哋生活嘅影響，但發現內容會太長，所以留番下一篇再寫。其實而家網上世界幾乎已經係現實世界，所以都唔好話唔關自己事呀。
註解：
[1] 「我初戀情人就係我老公」係一個『定期檢查子宮頸癌廣告』嘅宣傳片，應該係集體回憶嚟，唔好話我知你細個無睇過。
