克服無力感Step 1

亦都只係得Step 1， 就係去做。

尋日同朋友食飯，佢話我真係好強意志力，呢個環境下仲可以每日清晒個To-Do list，每日最少食足兩餐 。 我話 “It’s all about determination”。

呢個月真係好辛苦，無論係情緒上定係其他方面都好辛苦。之前見到朋友响Facebook quote咗呢句歌詞，叫大家記得食飯：

“在最壞時候 懂得吃 捨得穿 不會亂”
王菀之Ivana Wong — 小團圓

越壞嘅時候，越需要照顧好自己。同埋越唔可以俾自己懶，或者唔自律。懶咗一日、hea咗一日，唔會令到個人舒服咗，反而係會加深自己嘅無力感同罪疚感。 當然如果係身體情緒有問題，當然要休息。安排適當嘅休息都係「正事」嘅一部分。

至於點樣可以逼到自己做嘢，其實唔會有個「方法」，講到尾，都係你想唔落床嗰一刻，有冇能力說服到自己落床煮早餐然後埋枱做嘢。

近期最痴線嘅一日係1000坐到2100做嘢。嗰日寫咗PhD proposal、寫咗篇正經嘅稿、做咗啲research、睇咗書、同寫咗Medium、食足三餐、做咗瑜伽打坐。

做完香港有冇變好，冇架。
但起碼我冇浪費時間，冇對唔住其他人嘅犧牲。我有好好努力，未見到成果都好，我今日都起碼無愧於心。

有時我都好怕去做嘢，幫人用英文draft咗啲嘢，好怕俾人改到體無完膚。好似係我唔夠好，寫得差能力差，要人做多咗嘢咁。所以會拖延，會唔想做。唔想面對自己失敗，唔接受自己失敗，唔接受自己就係會有啲嘢做得唔好。

如果我自然醒之後，賴床碌到12點，然後因為已經12點所以覺得算啦今日休息下。橫掂都唔夠時間做晒啲嘢，心情唔好於是睇下netflix，睇下無聊嘢，過咗成日。夜晚我一定好焦慮，覺得自己浪費時間。第二日起身都會冇動力，因為覺得自己廢。

呢個係vicious cycle嚟。而做番好，只係需要一個決定，一個念頭。

「好，我而家落床去刷牙洗面。」然後心不甘情不願咁落床。

That’s it.

所謂嘅意志堅定，唔係一個State of mind，而係好多個當下，你都決定follow through，都決定「去做」。呢個係練習嚟，有時我都會懶咗。但點樣懶少啲，係你可以控制。你嘅意志力，係練習返黎。積少成多，你就會做咗好多嘢。

無力感侵襲嘅時候，俾自己沉澱下。將嗰啲焦躁變成你坐埋張枱嘅動力，而唔係你邊睇netflix邊困擾著你嘅罪惡感。同埋記得，休息都係正經事。

為咗同伴、為咗所有我哋未有緣份認識嘅戰友。