「我不殺伯仁」
「我不殺伯仁，伯仁因我而死。」
我準備搞第一個集會嘅時候，我被爸爸召回屋企，坐低劈頭就係好嚴厲嘅責罵叫我唔好搞，有咩事我負責唔起。
聽唔明，覺得好委屈，群眾自發佢鍾意參加咪參加。群眾唔係白痴架嘛，有咩唔對路佢哋會走，佢哋自己會幫自己選擇，我哋唔係大台，唔會勉強群眾。 我自己都無打算做犯法嘢，攞晒不反對通知書。
爸爸嬲到痴線，就話我冇可能預計到會有咩事，有咩事發生就太遲，如果有人受傷我點賠個仔／女／屋企人俾人，啲責任我根本負唔起。 爸爸話「你知唔知有啲嘢係『你不殺伯仁，伯仁卻因你而死』？」完全覺得爸爸小題大做，一個集會可以出咩錯？
唯唯諾諾應付咗之後，我都係照搞。
點知一次大鑊過一次。
第一次出事，議員俾人圍，無人受傷，只係好混亂。雖然當下我唔識處理，但覺得群眾同議員各自都有自由意志，我以為好少事。
第二次出事，兩個議員被圍，受咗輕傷，覺得頭暈擦傷之類，我都以為好小事。
第三次出事，立法會門外垃圾桶著火，有人被捕，最後入獄。
聽到有人被捕個一刻，我先知道「我不殺伯仁，伯仁卻因我而死」係咩感覺。咩「群眾自發」、「相信群眾」、「唔做大台」係幾咁廢嘅廢話。事實就係我好內疚，唔係我搞咗個集會，唔係我叫人出嚟，咩事都唔會發生。去到事情好後期，我先有勇氣去聽審，入到去，當事人同我笑住打招呼。走嘅時候，佢對住所有人講要加油佢冇事。
「群眾自發」、「相信群眾」、「唔做大台」全部都係真，但發生咗事情嘅話，呢啲嘢唔會令你可以為自己開脫。有人因為你出事，就係出咗事，講咩做咩都彌補唔到。臭格嘅48小時、畀程序折磨嘅時間、响獄中嘅日子，仲有當中嘅精神壓力，點補償？爸爸咁講除咗係擔心其他人，亦都係擔心我要應付呢一啲壓力。 因為我，有個人平白多咗案底，要入去受苦。 呢份內疚，會跟我一世。
之後每一次集會，都戰戰兢兢，唔可以再出任何問題。以後亦都無再搞過大型集會，亦都唔敢搞。唔想不負責任，唔想累咗人，唔想平白要犧牲多個人，唔值得。 因為呢啲嘢真係無僥倖可言，唔係一句「我控制唔到」就可以推搪過去。
