做Spa的內心小劇場
渡假中。
呢幾日放假，臨上機之前做好晒啲嘢就飛咗10幾個鐘去同陽光玩遊戲，重拾返作為港女應有嘅購物慾同埋姿整，染咗頭髮做返個mk妹。
今日晏晝去咗做spa。其實按摩或者spa都做過唔少，但每次要响個陌生人面前赤條條淨係著住果條即棄底褲訓響度都係有好大心理關口要衝過。做spa或者按摩真係一件感覺幾脆弱嘅事。
通常入到房之後，都要沖個涼，換上佢幫你準備嘅衫褲。技師通常都會响房外面等，响自己沖完涼搞掂晒同佢入嚟之前嗰段時刻，我每一次都覺得好尷尬。到底我應該圍住條毛巾企响度呀、圍住條毛巾坐响度呀、放低條毛巾面朝下訓好等佢定點樣呢？每次呢個問題都會晌我腦中出現，到底應該如何响陌生人入嚟而我衣冠不整嘅情況下自處？
說時遲，那時快，技師已經敲敲門問可以入嚟未。响個零點幾秒嘅反應時間入面，我又係會掙扎到底應該點應佢。直接話 “ok/yes/please”定係點呢，哎呀我仲未決定到底企定坐定點。然後佢已經推咗門入嚟，笑笑口望住我叫我瞓低。
就咁放低條毛巾，好似唔係咁好，忍唔住摺好佢放响床尾。一瞓低，眼角餘光就見到佢直接將我摺好嘅毛巾隨手掟埋一邊，客觀效果同冇摺無分別，嗚呀有種做咗多餘嘢俾人嫌蠢嘅感覺。
技師開始幫我去角質，佢幫我捽下捽下，開始暗自擔心，會唔會自己有老泥呢，佢會唔會覺得好唔乾淨呢。嘩原來我都幾多角質aka死皮可以去，我到底係算多定少呢，技師又冇遇過啲好worst嘅case呢，佢會唔會好想嘔呢。
諗咗好耐，開始昏昏欲睡嘅時候，技師叫我轉身，面向天花板，然後幫我繼續去手腳角質。嗯… 肚腩佢會唔會幫我去角質呢，肚腩有冇角質架，咁心口佢會唔會都幫我去呢，下我未準備好畀個心口佢睇，有啲尷尬喎，但佢應該睇過好多人個心口應該睇到唔想睇啦嘛，唔好諗咁多啦你做spa炸嘛。
去到我瞓著咗唔知幾耐，技師又叫我轉身。唔知我有冇扯鼻鼾呢。技師開始幫我按摩，按下我最攰嘅腰同膊頭。
嗯…佢好似唔係好用力喎，我覺得可以大力啲，應該點同佢講呢，係咪應該用harder呢個字呢，定係應該點講呢。咦，但係佢鏈呢個位真係有啲痛喎，算啦都係唔出聲。嗚呀係呢個位啦，嗚哇好舒服，下，完架喇？唔好呀，唔好按第二度住呀嗚嗚嗚，果個位先最攰呀呀呀～
但技師手勢都幾好呀，唔好嫌三嫌四啦鄺頌晴，你舒服咪得囉，唔好諗咁多無聊嘢啦，放鬆啲啦好嘛。哦…咁專注响呼吸放鬆下囉。
然後又响技師叫我轉身嘅時候發現自己瞓著咗，希望真係冇鼻鼾，其實技師聽過幾多個人嘅鼻鼾呢，佢會唔會好想叫佢哋收聲呢。嗚哇，佢又要揭開我條毛巾。嘩佢幫我通埋淋巴，仲幫我做埋豐胸按摩，都係繼續恰埋眼先，你眼望我眼真係好尷尬。
過咗陣，佢叫我轉身然後行開咗，眼角餘光响度好奇佢做緊咩。佢攞個草藥球過嚟，然後响我背脊度按下按下。shit好熱，會唔會太熱，搞唔掂，噢佢拎開咗了。到底草藥球嘅原理係咩呢，應該係熱力影響血液循環？咁有冇草藥又有冇關係？定係只係大話嚟？無限loop咗好多次之後，佢叫我轉身，將個草藥球放响我肚腩上面，然後 — 我肚腩好唔爭氣地大聲guruguru。媽呀，完全唔敢同佢有眼神接觸，呢一刻快啲過去好唔好。好快又唔小心訓著咗。
技師叫我坐起身，幫我拉筋。要我成個人摺埋，好大力咁㩒我背脊，嗚哇等陣先未warm up會好痛。到底技師見過最柔軟嘅人係點呢，係咪真係可以人體摺疊；技師見過最僵硬嘅人到底又係點呢，有冇响呢個環節慘叫？佢將啲客人轉來轉去，令佢哋啲骨頭啪啪作響嘅時候，佢諗緊啲咩呢，好想知道。佢按完我個膊頭之後，用手指頭卒我個頭皮又係有咩用架呢，點解個個人都會咁做嘅呢？
噢，可以沖涼走了。唔該晒你呀，我真係全身都放鬆咗。Errr，小費應該而家畀定出去先，佢會唔會走咗架。頂佢已經出咗去。
