信息量很大的一日
今日訓醒第一件事就係send email去搵offer，人哋收到email之後10分鐘就覆我，話想同我傾下。因為前路茫茫而持續恐慌嘅心情，終於放鬆咗啲。
難得一日入面同一大堆好耐冇傾過偈嘅人catch up返，信息量很大。
其中一個朋友同我講覺得自己收咗火，唔係好想再浪費時間去罵戰，覺得無謂浪費時間。但B同時擔心自己會對「重要嘅事」都收火。
我就話，收火好呀，得罪少啲人哈哈哈。同埋B都幾年無停過手咁做，啲嘢做得好唔好有斟酌空間，但佢明顯係需要休息同埋離開下，所以所謂嘅對重要嘢收火都好合理。
其實我同B，都曾經有段時間唔咬弦。主要係我單方面追住佢來咬，睇佢唔順眼，覺得好多嘢唔應該係咁咗，或者覺得道理响自己嗰邊，於是老實不客氣往死裡打。但日子過咗咁多，佢仍然健在，殲滅唔到佢，唯有包容,做返朋友，偶爾傾下偈。而講真，我無預期過我同B會可以繼續有來往，而我可以對住佢由衷地講好多嘢，都好驚訝佢毫不掩飾咁稱讚我嘅才幹話「我覺得你响外國自在好多」，然後鼓勵我要俾心機幹一番大事。（今日好多朋友都進入肉麻mode，對住我講「我知你一定會成就一番大事業，我等你呀」咁。我都未對自己咁有信心哈哈。）
得罪人多，稱呼人少，其實係我過去幾年嘅寫照。而家望返轉頭，後唔後悔呢？有少少，但我知道嗰個年紀、嗰個情況，我就係會咁樣。年少氣盛就係周圍屌，同埋我覺得我開過口屌嘅絕大部分嘢，我都有道理嘅。只係而家我唔會再咁做。
同埋當年我屌過嘅人，唔知點解，都可以做得返朋友，或者起碼無繼續交惡先。緣份真係好奇妙。 可能係大家叫一齊共過患難，大家睇住大家suffer，都唔忍心再計較啲咩，覺得大家都唔好死就好。
返工嘅時候，搵出一位好耐冇聯絡我超級仰慕嘅教授/朋友L傾計，想問佢攞啲建議睇下dissertation應該睇啲咩source。佢毫不猶疑咁介紹咗一大堆人同一大堆書俾我，應該我到dealine都唔會睇得晒。我禮貌地道謝，然後L問我「聽講你想讀上去喎，你係咪真係肯定架」然後開始同我分析前途。
佢話其實讀上去唔係你唯一可以行嘅路，我回覆話我真係幾鍾意呢。L就話讀上去唔止要「幾鍾意」同埋係真係要投放青春落去，真係要諗清楚，同埋 “You are a person with many talents”叮囑我要諗清楚，然後決定等我返香港見面詳談。
聽到好仰慕嘅L對我有好高嘅嘅評價，其實真係好開心。我每次同L共事嘅時候，我都有種自己响度班門弄斧嘅感覺。L係一個好討厭廢柴嘅人，但佢一直對我都好友善，從來唔擺架子，都無嫌過我有啲嘢唔識唔明或者跟唔切，永遠都係循循善誘，畀好多機會我。
於是我成個下午都係沾沾自喜面紅耳熱嘅狀態，諗住一定要畀心機唔可以辜負其他人嘅厚望嘅心情。
再晏啲嘅時候，因為確定咗返香港嘅時間，可以約番啲朋友食飯，於是同一個由細睇到我大，幾乎係睇住我壞嘅朋友傾偈。原來而家R响德國準備比賽，又原來佢準備結婚了。聽到真係好開心，我11歲識佢，都而家我都就快23歲；R20幾歲識我，而家都30幾，我哋都見證住對方好多唔同嘅轉折。
但响我心目中，佢同埋同期認識嘅朋友，好似永遠都係廿幾歲，仲係會無啦啦走埋嚟搣我塊面，會陪住我練習、會笑我啲肉永遠生錯地方、會成日話睇住我大就睇住我壞嘅嗰幾個人。佢哋都一個一個結婚生仔，一個一個咁離開咗我哋認識嘅嗰個地方。
放工返到屋企，同另一個曾經幫我做過訪問嘅朋友N傾偈。唔經唔覺個訪問都兩年，係我做過最開心同最掏心掏肺嘅訪問。我哋講起一啲編採角度嘅問題，N真係好善良同好有自己睇法。
N話：如果做一個訪問，唔係真係想聽受訪者講嘢，不如唔好做。
聽完我終於明白點解嗰個訪問我會做得咁開心，又點解N筆下嘅訪問全部都好好睇。N唔想隨便搵一個juicy或者普遍人認同嘅角度就隨便寫，N係真係會用心去聽受訪者講嘢嘅人，佢對於受訪者嘅關心嘅體現就係佢筆下嘅訪問。N自己都話，佢同受訪者嘅關係就僅僅係存在响訪問入面。如果冇一篇報導，佢嘅關心就無載體。
我同佢傾完覺得，佢同我認識嘅另一位好記者好相似，佢哋都真心相信journalism，真心做，真心想做好。如果香港多啲呢啲人，或者世界多啲呢啲敬業樂業嘅人，或者每個人都一份使命感，可能好多嘢都會好唔一樣。
廢話肉麻mode完了。 大家都唔好死。無咩事我出番去溫書先。
