「你仲後生、你仲有時間」

我以前最憎聽到，但而家會講兼且深以為然的説話

24歲時覺得時間不夠，內心每日尖叫「已經快25仍然一事無成呀呀呀」、「27歲博士畢業太慢了，有人26就grad」、「快25歲未賺到錢儲到十幾廿萬好失敗」、「骨膠原bb同鈣質開始留失，我唔想變老」⋯⋯

然後前輩朋友就會話「你先24大把時間」，我聽到會好嬲，心諗我頂你啦你上左岸晌度講風涼話。覺得自己冇成就冇時間，要快啲做單大茶飯，默念謠傳係張愛玲講過「成名要趁早」之類的金句，完全冇諗過其實佢未必講過。通常佢地仲會加句「你叻女嚟」心中更加焦急， 想問佢地 「你又知我叻，你又知我會冇問題？我而家睇唔到自己去緊邊，你點知我得？」好想佢哋解釋俾我聽，我到底邊到得，話我知我要點算。

總之，我好趕時間要做大茶飯，不然我就唔夠叻。

所謂大茶飯係乜，當時我零個概念，甚至乎今日我就快28，我都係冇概念。但我好似冇再趕時間。

啲人話28係個大關口，因為傳統世俗會提你the clock is ticking，你要已經稍為穩定，有積蓄有伴侶有事業。而我乜都冇，博士論文進度緩慢、骨膠原bb開始離我而去、能力手腕上追唔上我老細⋯⋯但我覺得冇乜所謂，ok啦30歲畢業都得啦，未有積蓄咁今日開始每日儲少少好過冇，冇做到啲驚世大茶飯都唔會世界末日，反而我隻貓食好住好對我反肚我更加開心。

由趕時間去到唔趕時間嗰個轉折，我到而家都唔係好知點樣發生。

有一日，有個妹豬嚟搵我同朋友講心事，大意係佢好迷惘，搵唔到方向，覺得自己好失敗。

我衝口而出就係一句 「好正常架，你仲後生，仲有大把時間」。講完我都知出事，妹豬一臉憂怨地望住我，我肯定佢內心活動同我當年一樣，問候左我全家一次。

當下好心虛，「哎呀，真係呢，你可以慢慢思考trial and error」，將嗰句 「你叻女嚟」吞返落肚唔敢講出口。但我都知對於一個自感冇時間的人心目中，我呢啲説法蒼白冇無力。佢想要嘅，係一個現在就可以見效的解決方法、一眼望到頭的確定性。

經歷過同一個階段之後，先開始明白 「你大個啲就會明」 「你仲有時間」呢啲我曾經以為lame到爆炸的説話，其實係有佢嘅意義。因為經歷過先有point of reference，知道咁樣好正常，而過渡呢個階段冇捷徑，只可以用時間、同自己嘅內心蘑爛蓆。

因為所有改變都需要時間。

冇人會一覺醒來，變得聰明睿智參透人世間嘅道理，變得了解自己。要了解自己、搵到方向，需要觀察自己。而觀察係一個過程，需要時間。觀察後搵到自己個pattern、試唔同option試錯、再修正，全部都需要時間。

而如果你唔係下一秒暴斃，你都仲有時間。

你可以去做 — 可以呢刻就起身做運動拉筋，防止你鈣質流失容易整親。可以呢刻就做家務、食好西、寫論文、約朋友出去玩、睇下有咩工可以轉、搵下人生仲有咩option可以選擇。 然後持續執行（which極度需要紀律，呢個又係另一個課題）。

去到一日，sooner or later，你會發現自己仍然會焦慮，但你無覺得趕時間，因為你見到你自己嘅選擇，日積月累幫你鋪好咗一條路。未來嘅路點樣，仍然不確定，但你知道你可以隨時揀。 大環境你未必有得揀，但信我，呢啲細嘅選擇比你想像中嚟得更加有影響力。

你大個啲就會明。哈哈。

又，呢啲細嘅選擇，响我流亡感覺自己冇咗「身後身」之後，慢慢疊加，而家累積成當下我嘅身後身了。好踏實。