「你也會有人妒忌」
你仰望到太高，貶低的只有自己。
今日達成咗一件人生大事，開心同各方好友分享。各方好友反應比我想像中冷淡，全部都話「恭喜你，但真係唔意外囉」，得我一個人因為興奮跳上跳落，好興高采烈。 有少少不是味兒，你班人交下戲都好呀，點知俾朋友話返轉頭，「吓我哋咁信任你能力你仲唔高興呀」，駁唔到。
其中有一位朋友，好誠實地同我講，話見到我「得咗」其實覺得有壓力同不安，會有比較，但都真心鄧我開心。我見到message嘅時候其實呆一呆，因為佢真係好誠實，而佢對住我咁誠實有啲受寵若驚。
講真呢種心情邊個人無試過。
見到身邊朋友甚至情人成功，會覺得不安覺得自己好似好廢咁。唔係妒忌唔係羨慕，就係單純覺得自卑同有危機感。「死啦～佢咁勁，已經做到乜乜乜，我點算，而家仲原地踏步，進度好慢」、「我真係好無用」之類嘅諗法會出現，會質疑自己能力，質疑自己係咪呢世都唔會成功，唔會達成理想。
我同朋友講，我對住我哋一啲共同朋友嘅時候，都有呢種感受。佢就話，你已經離佢哋近咗一步，唔使擔心。然後我哋轉咗話題，當時我有一句說話想講，但無講到。我想講「其實我做到佢哋咁樣之後，我都係會覺得inadequate，覺得佢哋永遠都好過我」。同埋，就算「超越」佢哋，可以將我比下去嘅人比比皆是，我永遠都會自卑。
我對同我講呢樣嘢嘅朋友，其實都一樣係好羨慕，覺得自己比唔起佢。對住我身邊好多朋友、家姐、相識，我都係好自卑的。佢哋响我眼中，全部都閃閃發光，不可企及。
呢一年叫做搵到個令自己好受啲嘅方法，就係提住自己「我睇你好，你睇我好」，或者大家都唔係過得咁好。
自從今年學識咗攪唔掂就要求救，將自己交去support network嘅手中之後，聽多咗好多朋友嘅安慰／故事。真係我睇佢哋過得好，其實佢哋每個人都勁辛苦好大壓力有自己struggle。亦都學識咗响朋友嚟求救嘅時候，分享下自己嘅Struggle。各自講完大家取下暖，互相安慰下，圍下爐，然後繼續努力，各自做該做嘅事。
但嗰種「我係廢柴」嘅感覺係真係會揮之不去架喇，有少少認咗命。個世界咁多人，咁多事，我無可能樣樣都精，更加冇可能做到最好嗰個，呢種感覺應該一世會跟住我。唯有安慰下自己個個都係咁，用呢種感覺嚟提自己唔好沾沾自喜，自己唔係真係咁特別，要繼續努力。
一諗到個個都咁掙扎咁痛苦，就黑心地好受左。
