仆街磁石講嘢你要聽 #1

見到老泛民臨近選舉開始訓醒有感

好多香港人以前唔生性，對中國好似對自己身邊嗰個明知要斬，但就總係搵好多藉口俾自己去硬食佢mistreat你。硬食佢DQ候選人同議員、硬食佢釋法、硬食佢濫用警權乜乜乜，即係好似你另一半同你講，話對個女仔／男仔冇嘢架，但係櫃桶收埋人哋張相，人哋一個message就衝出去睇戲然後5點都未返到屋企，然後你同佢嘈，佢就有一大堆歪理同解釋乜乜乜。

然後你因為唔知咩原因，都係忍咗佢，繼續（扮）相安無事。但其實呢啲一件件嘅事，去到下一次嗌交、有咩不滿，都係攞返本小器簿出嚟逐件逐件清算，然後呃呃氹氹返然後loop到2046。

你啲姊妹／兄弟, aka同路人，望住你三日唔埋兩日典一次，會苦口婆心勸你完咗佢，唔好再咁搞自己，起碼同佢反面呀。但你唔會聽，話返你啲朋友轉頭「咁你話我可以點，唔通分手咩」，去到一個位，你啲朋友都會燥，忍唔住鬧你叫你可摸以潔身自愛少少。(即係好似本土派聲嘶力竭鬧泛民賣港咁樣呀。) 你就會覺得「咩喎，連你哋都鬧我」然後反而更加令你覺得唔可以分手。去到一日，唔知點解，你終於發現其實忍落去無用，不如算啦。終於時候都了，你自然能放手。你啲朋友有啲可能已經永遠反面，有啲可能見到你終於諗通好高興咁接返你返去。

但個重點係，你下一次點算？ 你下一次係咪都一樣繼續縱容其他人mistreat你？ 你下一次會唔會真係過咗底線就果斷同佢斷？ 定係下一次到會為咗有拖拍然後到係忍先？ 即係自己個底花唔係得把口講下就可以釋除大家嘅不信任架嘛〜君不見每次你身邊個仆街磁石朋友有對象，你哋成班friend都係自己偷偷地開盤估佢幾時出事？

用呢啲比喻除咗好juicy之外，另一樣嘢係因為呢個故事同呢啲老土愛情瓜葛一樣都係old news is so唔識串，但去到真係實行其實好難做到。

但係，香港唔同我去拍拖呀，而家講緊你再為咗有段關係（選又好資源又好）而被人mistreat係會犧牲手足同好多其他人架。即係呢，有人問我35+如果有35個梁耀忠點算，我都真係答唔到。都唔好話35個，淨係有1個已經夠我哋收皮。