世界上沒有人應該被這樣對待

2018年5月27日 星火集會發言

【你也可以牢牢記著，不是你不寬容，而是世界上沒有人應該被這樣對待】

其實義士係一班犧牲者，無論係初一或者之前之後大大小小行動都有佢哋嘅付出。
呢一班嘅犧牲者出於想香港好、想守衛香港，一個好單純，甚至有啲人會覺得係幼稚嘅前設而行出嚟。
但而家佢哋就要被判處監禁，即使佢哋唔需要入獄，佢哋都已經畀程序折磨咗一段好長嘅時間，淨係初一嘅被捕者，佢哋已經被程序折磨咗兩年。
呢兩年，或者佢哋而家響入面坐緊嘅時間，未來嘅唔知幾多幾多年，其實係無人彌補到俾佢哋。

佢哋失去嘅係自由，而自由係無價嘅。

無論係離開咗香港嘅義士、留低咗响香港嘅義士，其實佢哋都係一樣咁勇敢，一樣咁值得尊重。
佢哋每一個人，都值得我哋由衷嘅敬佩。
香港人真係負咗佢哋太多，香港負咗佢哋太多，負咗佢哋嘅家人、另一半、朋友都太多。香港其實真係唔值得有佢哋呢班人。

有時我會想佢哋可以自私啲，想佢哋多啲為自己著想，諗下都佢哋自己想點。

我亦都知道，有啲時候，嘗試做正確嘅事就會係咁，就係會有人犧牲，就係有人畀人打壓。
但我真係好唔想，畀人犧牲嘅係佢哋。
尤其是當我認知到，佢哋其實唔係當日我坐响警署拎住嘅果份名單上面嘅名咁簡單。
佢哋係一個有血有肉嘅人，佢哋有生活、佢哋有朋友、佢哋有家人、有另一半、有佢哋嘅夢想，有佢哋自己好鍾意做嘅事。
每一次諗到呢啲地方，我都覺得好無力。
我哋過緊嘅，我哋而家企響呢度過緊嘅生活，係佢哋失去咗嘅自由生活。

我每一刻都對此心存歉疚。

我哋可以扮呢一切從來都無發生過，我哋可以扮香港社會無病，可以扮香港社會從來冇存在過呢班人，可以扮香港政府無打壓香港人，亦都可以扮香港政府無用法律去壓榨義士。
但我哋都可以選擇無力而且歉疚感生存落去，感受呢班人為香港付出嘅努力。

可能我哋各自嘅人生都沉悶、刻板。
起身、返工、放工、讀書、做功課、行街、睇戲、食飯，但義士連呢種刻板嘅人生都冇辦法過。
响我哋眼中，可能我哋可以開住個熱水，沖半個鐘頭涼，但義士連呢個小小嘅奢侈到冇辦法享有。

我希望我哋每一個人嘅內心都要保持呢種無力同歉疚。
我哋每一日都要記住，响我哋過緊沉悶刻板或者多姿多采嘅人生嘅同時，有一班人，為咗呢個地方為咗香港，為咗我哋每一個人，受緊司法程序嘅折磨或者响監獄入面坐緊。
一定要記住呢種無力而且痛苦嘅感覺。
我哋必須連佢哋嗰一份都努力活好。呢個係我哋唯一可以做到嘅事。

我好希望，去到有一日，我哋可以接佢哋出嚟嘅時候，呢個地方會係一個更加好嘅地方，係一個佢哋想見到亦都想响度生活嘅地方。

我唔知道點樣先係好好裝備自己，或者點樣先會令香港變成一個好啲嘅地方。
現實真係好殘酷，就係我見唔到希望。我甚至見唔到自己嘅前途或者任何人嘅未來會有光明。
但如果大家仲係讀緊書嘅，就好好讀書，覺得自己身體唔好嘅就去好好做運動。
希望每一個人都照顧好自己。希望將來，過多幾年之後，我哋都會成為社會上有能力去扶持同幫助其他人嘅人。
因為呢樣係當下我哋唯一可以做到嘅嘢。未來尚未來，當下就係我哋唯一可以把握到嘅嘢。

希望每一個人都會好好把握每一刻嘅當下。都希望我哋每一個人都係活在同一個當下，都一齊為咗同一個目標去努力，同埋好好生活。