「一蟹不如一蟹」

到底係咩事？

以前生活過嘅舍堂入面，有啲人事變化（HKU早前改咗有關舍監、導師嘅規定，有指係想減弱舍堂嘅影響力），於是身為老鬼嘅我，就搵相熟嘅朋友傾偈食下花生關心下。 朋友話「你哋走晒之後，無以前支歌仔唱架啦。」我話「如果舍堂界頂唔住，都幾可惜。」然後不免又話下當年沙宣道、坐滿中山階嘅事。

朋友話而家有咩事應該都唔會再搞到啲咩。我反而覺得唔係咁樣，因為之前學生會選舉，投票率都好高，可見有咩事學生都係會出嚟表態，同埋而家嘅時勢，真係無咩好搞。我哋只係食正14年條水，先好似大有作為咁，冇誰比誰高尚。

但講返自己舍堂，呢幾年都出咗好多岔子 — 唔見咗10萬嘅現金，想用 “loss of assest”寫落報告到就了事、性騷擾非禮醜聞一年出3、4單、宿生會面對呢啲事只係想息事寧人私了甚至唔俾人討論。口講要「學生共治」，但又要「大人」永遠當佢哋係小朋友。以前好似真係唔係咁？以前大家都似負責任啲，我啲大仙（仙=Senior）老鬼好似都唔係咁做嘢，都唔會咁樣教我。問題出咗响邊度？ 係傳承出咗問題定係有啲咩導致咁樣？

我傾向覺得係共業嚟。

但大家一齊做嘅嗰個「業」係咩？ 係咪教育制度？定係大環境？

呢排睇緊本書，叫《專業之死：為何反知識會成為社會主流，我們又該如何應對由此而生的危機？》（英文：The Death of Expertise: The Campaign Against Established Knowledge and Why it Matters）。本書係講呢個世代，素人唔止唔相信專業，甚至反唇相譏，而且唔願意學習；大家自問「見多識廣」，有咩可以Google都可以成為專家，於是反權威，本書嘗試分析後面嘅原因。睇嘅時候，我完全感受到作者有幾大怨氣。

反智像一道綿延不絕的線，蜿蜒貫穿著我們生活中的政治與文化面，
至於滋養著這條線的謬誤觀念則是：
民主就等於「我再無知，也可以跟博學的你平起平坐」。
— 《專業之死》

作者從人性、教育、網路、媒體四個角度切入，討論唔算特別深入，而且好重怨氣，亦都只係傾向描述趨勢同現象，輔以美國歷史去稍稍解釋，隱隱透住「而家啲後生」、「一蟹不如一蟹」嘅批評。

作者講嘅嘢都唔係無道理，而家人都不求甚解，睇咗幾篇文就覺得自己識晒；大學生响大學唔係學做學問，讀幾年都master唔到批判性思考、求真嘅精神；大家睇新聞慣性只睇同溫層嘅嘢；媒體會迎合觀眾而放棄新聞精神放棄對取材嘅執著，所以新聞就會到而家都仲講緊藝人出軌；加上資訊爆炸種種嘅原因，我哋好似再比唔上以前嘅年代。 我哋對於價值觀同原則嘅執著，好似真係冇以前咁多，簡單啲講就係冇以前咁「老土」。

只係，呢啲全部都只係表徵，但表徵後面根本性嘅原因係咩？到底真係發生咗咩事？係邊一個環節有所唔同，而導致而家係而家呢個樣子？ 係咪真係因為互聯網、資訊發達加上種種歷史事件，令到大家對專業同「老土」嘅概念失去全部信任而變成咁樣？係咪真係因為學歷膨脹、教育產業化而令到而家啲大學生變成人哋口中嘅「而家嗰啲後生嘅」？

冇人、冇一本書畀到答案我。