Trophy Kid 自白
自chur型選手自白。
一直都係朋友間公認自chur型選手，呢兩個星期簡直係體現得淋漓盡致:
連續3個星期每日都係咁嘅Routine: 每日8點起身溫書，溫到2點出門口，3–6上堂，返屋企再溫書，星期六日全日留响屋企做嘢溫書寫論文做下香港啲嘢，仲有每個星期嘅Pole Dance同返工。有時候都唔係晚晚都可以做到晒瑜伽打坐，但逼自己一定要做到是但一樣。
去到今日終於考完最後一科。帶病上陣一口氣考6個modules 4個鐘，滿意講唔上，但合格應該得掛。
呢種排滿個Schedule嘅作風，諗返起，其實好細個已經開始。 小學嘅時候，星期一至日都有課外活動。星期一學畫，星期二四泳隊，星期三打波，星期四學琴，星期五溜冰，星期六玩音樂劇／黑光劇，星期日同屋企人去行下山出下街。過咗多姿多采嘅童年，成為Trrophy Kid。
除咗游水（aka求生技能）之外，全部嘢都係我自己話要學，爸爸媽媽唔係「贏在起跑線家長」嚟架。佢哋好鼓勵我同家姐想學咩就去學咩，只要屋企Support到都可以去試。 但有一條規矩要守： 就係唔可以影響正經嘢aka學業。
記得有時練完波溜完冰返到屋企好攰，唔想做功課，少不免會俾人剷上天花板。每次我爸開口鬧我嘅時候都一定有以下呢番說話：
「你溜完冰返黎，係咪好攰呢？好攰，休息下都好合理呀係咪先？食完飯睇陣電視先沖涼，然後食下生果先做功課，都好合理呀，但望下個鐘，已經11點幾，好攰要瞓夠係咪都好合理先。啲嘢分開睇全部都好合理呀，但事實就係放埋一齊唔合理丫嘛。點解人人都有24小時，你做得咁少嘢，人哋做到咁多嘢呀，就係人哋唔會浪費呢啲時間，唔會咁樣無咗啲時間呀。只要你想，只要你自律，你就可以做到好多嘢。每人都係得24小時，做得多少嘅分別就係晌呢度。」
呢個mindset影響得我好緊要，覺得只要我想我自制能力夠好，我就可以有無限嘅capacity。 如果做唔到，唔係件事本身無可能，而係我能力有問題，做得唔夠快唔夠好或者唔夠自律，只要努力就可以改進，然後做到。
一直長大，有一段時間因為成績唔好，畀爸爸媽媽cut咗啲課外活動。個陣同屋企人嘈大交，喊晒又發脾氣又求爸媽乜都做齊，答案都係無得傾。然之後我就好自責，覺得係我自己心散，個心太野所以先冇得再玩好多活動。
呢種自責有時候都而家都仲纏繞緊我。有時身體唔好、狀態唔好，個人開始唔平衡，理智知道自己有啲嘢要捨棄，但一旦要放棄啲嘢。我又好似變番嗰個同爸媽嗌大交要畀人cut課外活動嘅小朋友咁，好多怨恨好多忿忿不平。因為細個爸媽話係我做得唔好所以咁咁咁，所以而家都會覺得係自己「唔夠好」所以無辦法take up所有我覺得應該要take up嘅嘢。
即使所有人都話我知，其實你能力好好，你嘅問題唔係做嘢，而係其他方面。我都係對自己嘅能力有超級大嘅質疑，成日覺得自己capacity太細，所以好多嘢都做唔到。亦都因為咁成日畀人用呢點有意無意搵我笨。
所以成日chur自己，成日覺得係我廢，take up客觀準則嚟講太多嘅責任，有好多嘢都完成到，但都有唔少係水過鴨背做得好差勉勉強強叫做過關，甚至係做得差。而呢啲做得差嘅嘢或者水過鴨背嘅嘢，進一步令我覺得自己廢先兼顧唔到全部嘢，而唔係本身個份量已經太多。
而家大個咗，有好轉嘅，有時知道自己唔可以做太多嘢，會刪減咗好多。而家好少再同朋友出去玩，啲時間留番唔洗做嘢响屋企獨處hea下叉下電。因為做嘢、同朋友玩、獨處休息，我嘅優先一定係做嘢同休息。
發現講到尾，都係「愛就係選擇，選擇就係捨棄，犧牲就係意義」，人一日係得24小時，唔計訓覺食飯個10個鐘（痴線如我都確保自己每日有8個鐘訓覺同2個鐘食三餐）其實得14個鐘可以用。能力再通天都最多做14個鐘，仲未計人會攰狀態會飄忽呢樣嗰樣。
我知我對自己太苛刻，但呢個真係賴以為生嘅mindset，我想像唔到一個會撻皮嘅鄺頌晴。所以而家嘅做法係，每日有一個稍為chur嘅to-do list，一定要做完，每日都要睇下書寫下paper打坐做瑜伽做workout訓8個鐘，外加啲洗衫煮飯嘅tasak。將想做嘅嘢排好優次，唔係要考試或者衝鋒陷陣嘅話身體行先，有時真係狀態唔好就會俾自己懶一日半日，提自己要有啲耐性同休息都係正經事。
點解做人咁難，不定打結同解結，幾時先得嚟學晒啲嘢。定其實冇學晒，只係終其一生都喺度嘗試維持平衡？
