The Philosopher Song
一直陪我走過抑鬱症、自我懷疑嘅歌。
頭盔：唔識寫樂評，亂來的。而如果作曲者你本人睇緊嘅話，我先衷心表示我亂咁詮釋嘅歉意，唔好嬲。【同埋作品面世之後就作者已死嘛係咪先】
若干年前，生命中出現咗呢一個singer-song-writer。佢成功得到我家姐嘅芳心，所以做細妹嘅我就突然多咗一個「音樂人」响我生命入面。
一直對佢嘅音樂冇興趣，冇動過念頭要聽佢嘅歌，直到抑鬱症最差嘅日子一日好鬱悶唔開心又無嘢做到極點，响YouTube搜尋 “Jabin Law”，有一大堆歌。呢隻You Can Walk Along（The Philosopher Song）嘅歌名吸引咗我，於是開咗嚟聽。
一聽就喊到痴咗線。
首歌嘅兩句歌詞好觸動到我。每次聽呢隻歌我都好鍾意聽到呢兩句。
Have you been Someone you expected?
Have you seen Something you corrected?
個一刻聽，覺得係當頭棒喝，你响度做緊咩呢，你自己都唔鍾意呢個自己，你自己都唔知自己想點，你有冇見到自己做得好咗，你响度做緊咩呢？
當時將所有討厭自己、睇唔起自己、嫌棄自己嘅情緒喊晒出嚟。自己入大學之前，決心要搏盡做個會閃閃發光嘅人，但最尾呢？最尾高不成低不就，仲有情緒病，自己都控制唔到自己，一日到黑俾麻煩人。 無成為自己理想中嘅模樣，認知到自己對自己嘅情緒無掌控能力，認知到自己能力不足，覺得好屈辱嘅感覺，釋放晒出嚟。
loop咗唔知幾多次之後，舒服咗好多。
隻歌有種好溫柔嘅感覺，結他加埋Jabin Law把聲，令我個一刻有被安慰嘅感覺。好似一個朋友，好認真咁坐响你對面聽完你呻完一大堆你自己都知道廢嘅廢話之後，認真咁同你傾計。好似一個朋友，睇住你情緒崩潰喊到口腫面腫，同你講「ok呀 我陪住你」，然後笑笑唔出聲繼續陪住你。
啲歌詞將一個又一個片段帶到我嘅面前，好calming。雖然其實我唔係好知道到底Jabin law想表達啲咩意境，但我聽嘅時候，淨係有種好平靜嘅嘅感覺，好似訓響草地上面嘅吊床飲住啱啱好唔太凍嘅lemonade嘅感覺。好安靜，好自在，所有尖銳會刺傷自己嘅情緒都可以慢慢溫柔地釋放，所有感受到被允許，no judgement咁樣。
之後每次聽呢隻歌，聽到呢兩句，都滿心感動。
狀態好嘅時候聽，就會諗「呀～我好咗好多了，真係向住自己想成為嘅樣子進發緊，慢慢嚟一定會越來越喜歡自己」。狀態唔好嘅時候聽，就會聽住然後ugly cry，覺得自己好失敗，無成為都自己理想中嘅人，聽完會可以對自己溫柔啲寬容啲。
於是呢隻歌就成為咗我狀態唔好Playlist嘅一員，一直陪我度過抑鬱同自我懷疑嘅日子哈哈哈。（死啦我好驚佢其實會睇呢篇嘢。如果隻歌其實係好cynical咁點算。）
上年5月去台灣嘅時候，第一次聽Jabin Law唱Live，聽到佢唱 You Can Walk Along (The Philosopher Song)，心入面超級感動呀嗚嗚嗚，Live真係好好聽好令人舒服。哈哈我希望我可以用啲冇咁lame嘅字去形容，但我詞彙貧乏，淨係識用好聽。
誠意推介：
另一隻我好喜歡嘅Jabin Law嘅歌係Forest of Remains，無點解，純粹鍾意。
