Pole Dance教會我的事
信自己，去做啦，你會幸福架。
兩年前，同當時男朋友感情出現問題，於是想搵啲嘢學下分散下注意力，咁啱屋企附近開咗新嘅Studio，有Pole Dance，所以就去咗試堂，之後一直學到而家。
我自己去學嘅時候，係抱住「學跳豔舞」嘅心情去上第一堂。但第一堂落堂之後，我已經知道事情唔係咁簡單。先唔好講Pole Dance有好多種，唔係每一種都啱小朋友自己收睇，呀唔係，唔係每一種都係Exotic。
上完第一堂之後，我對腳都出現耶穌釘十字架咁嘅瘀痕响腳背、小腿上五吋下五吋瘀晒、手震腳震，第二日連舉高手都做唔到，著唔到、除唔到過頭笠嘅衫。因為所有動作都好用力，要靠皮膚同條柱摩擦產生嘅摩擦力先可以停留響半空。試下想像細個玩瀡滑梯，「卒」住條滑梯卡住咗嘅痛苦；或者著短褲玩消防員跣落下一層個條柱，你個膝頭內側「卒」住嘅痛苦，大概就係最基本要承受嘅痛楚。 有啲時候要用大髀內側「卒」住條柱、有時淨係靠臂力、有時用膝頭內側「卒」住條柱、有時淨係用大脾後邊舊肉… 上到去就係要靠你身體嘅力量同埋忍痛嘅意志力去支撐住自己嘅身體。
我一開始學嘅時候，筋非常緊、無肌肉、無意志力、好驚青，即係咩都做唔到同做得唔好睇。慢慢學慢慢開始做到更加多動作，開始可以做完一組動作唔喘氣，慢慢體能好咗，肌肉多咗。
不過個人都係冇乜意志力，好驚青，成日都唔信自己做得到。硬係覺得防手就會跌落嚟，硬係因為個grip (皮膚同Pole接觸摩擦嘅地方)好痛就直接放棄。同埋好驚自己真係做唔到，所以就直情唔敢試，因為試咗真係做唔到好樣衰。尤其係一班同學入面，一定有一兩個人好叻，好快做得啱晒又靚，望到都真係幾自卑。
去到過咗嚟德國之後，因為知道知道自己一定要保持做運動嘅習慣，所以決定繼續學Pole Dance，經同學介紹搵到而家上堂嘅Studio。响德國上第一堂嘅時候，已經近乎3個月冇上過堂，無做過運動。結果乜都做唔到。之後每次上Pole Tricks，其實我都對自己幾不滿，覺得自己好廢呀、唔夠力呀，總之就係唔滿意自己嘅表現。有一次落堂，有同學問我點解一開始會响香港學，又點解決定繼續學落去。我諗咗一陣，係呢點解我繼續學呢。
其實答案係想做運動、想建立身體嘅力量、想睇住自己進步、鍾意跳舞、享受做到一坐動作個腦嘅多巴胺分泌。好Basic Bitch嘅講法係 “I just wanna have fun with myself”。嗰一日之後，我開始不斷同自己講，你只係去做運動只係去郁動下，唔駛太在乎其他嘢。不斷同自己講，不斷洗自己腦。淨係去感受下啲肌肉有唔夠力、個Grip有幾痛。之後發現其實我最享受嘅係响Pole上面唔可以分心嘅感覺，同埋所有嘅成果都淨係屬於我。
其實我一直都覺得，我以前嘅「成就」全部都唔係自己嘅努力得返嚟，全部都係運氣使然加埋其他人嘅幫助同照顧先得到，完全無自己嘅功勞。成日覺得自己能力不足，但又好怕真係去面對自己能力不足，所以好多嘢都唔敢去試唔敢去做。到呢一刻都冇試過盡力做一件事，成日得過且過，過到關就算。因為盡全力試咗做咗，原來無自己想像中嘅咁好，就要面對自己理想同現實嘅落差，太恐怖，唔敢想像。
Pole Dance係一個畀我面對自己嘅機會。有兩次好深刻嘅場景，都係老師教咗一組動作，我一直都做唔到，覺得自己唔夠力、Grip唔實條柱唔敢放手又種種原因做唔到。望住其他同學做得好靚好優雅，心入面更加怯同唔開心。然後老師行埋嚟叫我做俾佢睇，緊張到手心出汗，好似細個俾人檢查功課咁。頂硬上，硬著頭皮試畀老師睇，竟然輕鬆做到喎。咁即係上面果堆全部都係自己畀自己嘅藉口唔去做啦，完全係我人生嘅寫照哈哈哈。
同埋上到去，做唔到又點先？咪一係放手跳番落嚟，一係以奇怪嘅姿勢慢慢跣返落嚟，再唔係咪大叫救命等老師同學嚟幫我囉。肯試就得啦，一次唔得咪做兩次，兩次唔得咪做三次囉係咪先？哈哈哈，講好簡單，星期二老師教shoulder stand，我一直都唔敢真係用力撐起個人倒立，得老師行埋嚟幫我果次成功咗，之後一律淆底唔敢自己真係試，淨係做下樣好似真係練習緊咁。
哈哈哈，我真係垃圾屎嚟，其實寫咗咁長就係想迫自己大方承認 — 我就係細膽淆底怕失敗唔敢試，怕自己冇自己想像中咁完美，唔想接受自己能力不足，唔敢承認自己唔叻，唔想面對現實。但我唔想再係咁。
我想做一個真係有能力嘅人，想做一個接受自己唔會一次做得好、接受自己會失敗嘅人，而且更加要做一個唔怕自己失敗唔怕自己樣衰嘅人。因為點都好，呢個細膽淆底嘅自己就係我唯一可以依靠嘅自己，唔到我揀嗚嗚。
跳Pole Dance可能係其中一個要我具體化地面對自己嘅戲機會。意中人成日都話「身體永遠係你畀幾多佢，佢畀返幾多你」，回報同收穫係少有地成正比。我真係放心機去做Gym，去練習，身體就自然慢慢會有力有肌肉，會做到啲動作；試多幾次畀老師逼一逼之後咩都做到，身體自然就會知道其實唔駛咁淆底；畀自己樣衰多幾次失敗多幾次之後，發現其實得自己會介意，根本冇乜大不了，可能自己就會無咁覺得失敗同怕（掛）。
講好簡單，但我一諗到自己其實係一條廢柴就手軟腳軟好想逃避，又差唔多要進入自我懷疑嘅循環。好想仰天長嘯 — 到底幾時先做到滿意嘅自己呀～
