Phantom of the Opera(電影版)
轉念一想其實係Stalker同受害人嘅故事
之前寫過自己嘅美學同對好多嘢嘅興趣係有POTO開始，係影響我最多嘅作品。 尋日同今日都響度重溫電影版，發現個故事其實有啲痴線，一時之間覺得信息量好大。
不過以下嘅嘢唔會影響我對POTO嘅熱愛，因為「聽故唔好駁故」係睇劇、睇戲嘅原則，只要好好享受作品帶畀自己嘅悸動就足夠。
POTO嘅故事發生响巴黎歌劇院入面。歌劇院嘅經理咁啱辭職，搵咗兩位搞Junk Business/ Scrap Metal嘅暴發戶代替自己，而新經理換咗Roul作為佢哋嘅贊助人。新經理們因為掛住𥄫女，激嬲咗自視極高嘅女高音Carlotta，急忙晒冧，叫佢唱隻solo。响Carlotta唱歌嘅時候，背景嘅幕布銀牙咁樣冧咗落嚟（係Phantom做嘅），Carlotta就好嬲發脾氣話新舊經理都無處理過呢啲「有鬼」嘅問題，佢唔玩了，匆匆而去。
冇咗女高音全世界進入緊急狀態，今晚點表演呢？呢個時候負責好多劇院安排嘅Madam Giry就好冷靜淡淡然咁表示 “Christine Daae could sing it”。當晚Christine技驚四座，一鳴驚人。Roul亦都响Christine表演嘅時候，認出佢就係自己嘅青梅竹馬，於是响表演之後去咗女高音嘅廂房入面同Christine相認，想同佢發展下話帶佢去食晚餐。
响Roul離開廂房之後，Phantom就突然現身，話自己係Christine過咗身嘅爸爸派落嚟嘅音樂天使，輕易令Christine跟自己走咗。 Christine跟住Phantom去到劇院嘅地下，亦即係Phantom住嘅地方。响見到Phantom屋企有自己等身大小著住婚紗嘅figure之後暈低咗，醒返之後除咗Phantom嘅面具，令Phantom大怒。Phantom冷靜返之後，就將Chrstine送返上地面，仲順手寫埋恐嚇信畀劇院經理、Roul、Carlotta，警告佢哋一定要畀Christine上位，同埋叫Roul唔好再嘗試見Christine。
全世界收到信都又驚又怒，但劇院經理最後決定無視恐嚇，照樣畀Carlotta擔大旗做主角。Phantom極嬲，就响Carlotta表演嘅時候，响佢嘅私人物品上面動手腳令佢失聲，當眾出醜。仲响劇院宣布「我咪講咗要你哋做啲乜囉」。之後仲順手殺咗一個舞台工作人員，吊落舞台畀大家睇。 嚇到Christine即刻拉住Roul衝上天台，話好驚Phantom云云。Roul就趁呢個時候表達愛意，兩個人都互表心跡之後，就情不自禁擁吻呀講肉麻情話呀咁話要私奔，但Phantom其實响角落頭偷睇緊，咩都見到晒。Christine同Phantom離開天台之後，Phantom就一個人響度傷心嚎哭。
過咗一段時間之後，歌劇院舉辦新年化妝舞會，所有人都盛裝出席玩得不亦樂乎。呢個時候Phantom就高姿態登場，話自己寫咗一個新劇本畀歌劇院，順便奚落咗全世界一輪。佢亦都發現Christine同Roul原來秘密訂咗婚，嬲到將Christine當係頸鏈咁帶住嘅戒指扯斷，話 “You belong to me”然後就跳入機關到消失咗。Roul就跟住Phantom入咗去機關，想捉住佢但不果，畀Madam Giry拉返出嚟。Roul就質問Giry係咪知道啲咩，Giry响嘆口氣之後就將所有嘢和盤托出。
响Giry仲學緊做芭蕾舞伶嘅時候，一次去睇吉卜賽人嘅雜技團，發現咗Phantom。Phantom原來先天毀容，俾人話係「惡魔之子」，當佢係展品咁做show虐待。Giry就將佢放咗出來，將佢收埋响歌劇院入面。Phantom慢慢大個，成為咗一個建築、作曲天才，同埋殺人犯。
鏡頭一轉就見到Christine好早起咗身，因為心情唔好決定去自己爸爸嘅墓前拜祭，訴說下自己心情。Phantom亦都扑暈咗本來嘅車夫，自己上陣跟埋去，Roul發現Christine唔見咗嘅時候亦都騎馬追上去。Christine去到墳前，訴說對於爸爸嘅思念，Phantom故技重施現身話自己係佢嘅音樂天使，想再次擄走Christine。但Roul及時趕到，同Phantom打鬥，帶走咗Christine。
返到歌劇院之後，Roul說服兩個經理，演出Phantom所寫嘅新劇本，搵Christine去做主角，咁Phantom一定會出現，然後安排警察殺咗去，掂晒。去到真正上演，Phantom都真係有出現，但警察無殺到佢之餘，佢仲响眾目睽睽之下擄走咗Chrstine。Roul就即刻去營救，响地底搞咗一輪，唱咗個好好聽嘅三重唱之後，Christine鼓起勇氣錫咗Phantom。Phantom深受感動，放走咗佢哋，要求佢哋保密，然後自己都離開歌劇院地底。
咁樣寫出嚟之後，個故事真係好lame，啲角色一個二個全部唔知發生咩事。
Roul嘅痴線程度比較低，只係溝女大過天，啱啱見返青梅竹馬就想同佢廝守一生。然後又好弱智地決定要演果套劇用自己未婚妻引Phantom出嚟，結果搞到一鑊粥咁樣。
Phantom就係套戲入面最痴線個個，好聽啲叫做太癡情，直說就係變態Stalker一個，YOU入面嘅男主角拍馬都追唔上Phantom嘅痴線程度呀～套戲又一幕話Christine同佢朋友話，佢細細個就聽到有把聲（Phantom把聲）guide住佢，即係話Phantom由Chrstine細個開始就一直mon住佢啦，長腿叔叔咁樣樣。之後又放個幕落嚟壓落Carlotta到、响女高音廂房整塊後面有通道嘅單面鏡（等等先間房本來係Carlotta架喎Dafaq?）、寫恐嚇信要全世界畀Christine上位、整到Carlotta失聲、殺咗個後台人員、跟蹤Christine上天台、跟蹤Christine去墳場、三番四次擄走Christine、利用Christine對爸爸嘅思念… 不能盡錄嘅種種痴線行為。
除咗變態Stalker我諗唔到第二個字形容Phantom。一句 “Pitiful creatures of darkness, what kind of life do you know?”已經可以總結到Phantom呢個人物，就係小時候悲劇，導致心理扭曲，無糾正過，然後遇到鍾意嘅人之後痴咗線，釀成悲劇。
至於Christine唔係痴線，而係弱智。成套戲去到臨演Don Juan Triumphant之前，都無為自己做過啲咩，淨係不停「遇到癡線佬、受驚、等人救、表露心跡」loop幾次。去到唔到佢唔做選擇，去到佢要選擇演唔演，即係「betray the man who once inspired my voice」佢先真正做咗選擇。但去到呢刻之前佢都好似天真小朋友咁，盲目相信爸爸一定會派個天使俾自己，而Phantom就一定係個天使。不停耍智障，身陷險境要人救，真係好典型「女主角」。相比起小說入面，Christine响戲入面真係弱智得過份，小說入面雖然未至於Strong and Independent，但起碼有為自己做吓決定嘗試下解決問題。
唔知點解今次睇呢套作品先察覺呢啲咁無聊嘅嘢，但聽故唔好駁故，呢堆嘢寫嚟for fun就可。作品都係好好睇、歌都係好好聽、成套戲都係好grand好靚 :D
