Chicago The Musical
一個講述世態炎涼嘅故事。
2010年，當年中二，灣仔APA有Chicago The Musical嘅演出，同家姐去咗睇，好震撼。當時最令我震撼嘅地方係，台上面嘅演員真係著得好暴露，而且劇情相當兒童不宜。
故事講述Roxie Hart同Velma Kelly兩個已婚靚女殺人犯嘅故事。Roxie Hart係一個金髮藍眼發明星夢嘅美女，嫁咗個擔屎唔偷食嘅老實老公Amos，仲有個做郵差嘅情夫。但有一日，Roxie發展佢情夫竟然瞞住佢仲有第二個，嬲得滯錯手之下就殺死咗情夫。而Velma本來有一個妹同佢一齊表演歌舞，佢老公Charlie會陪住佢哋巡迴，但又一日畀Velma發現咗佢老公同佢個妹竟然背住佢哋有染，嬲得滯殺咗佢哋兩個。兩位主角就雙雙被送入監獄候審。
監獄入面，Velma係大家姐一樣嘅存在，Roxie就想去討教。但監獄入面個個都好現實，Roxie什麼也不是，Velma當然就冇理佢。响Roxie賄賂咗入面一個大家都叫佢Mama嘅獄卒之後，Mama介紹佢去揾一個專門為靚女殺人犯辯護、死都拗翻生嘅律師Billy Flynn。
响Roxie嘅老公Amos幫Roxie籌好錢搵Billy之後，Billy就教Roxie開咗好幾場記招，成功吸引媒體嘅鎂光燈。Roxie一瞬間成為咗新聞嘅寵兒，風頭一時無兩，甚至蓋過Velma。Velma呢個時候發現自己被威脅，就去搵Roxie同佢傾合作，喂不如我哋一齊玩啦，Roxie當然就因為小器無理會Velma。
好景不常，好快就出現咗另外一個靚女殺人犯，成功吸引所有媒體同Billy嘅注意力，唔再有人理Roxie。Roxie為咗攞返鎂光燈，就講咗女人最無往而不利嘅大話 — 「我有咗」，成功繼續做眾人嘅焦點。Roxie呢個時候本來已經好嫌棄Billy呢種見高拜見低踩嘅態度，但係當地法院突然打破咗47年都無將女人送上絞刑場嘅慣例，將監獄入面唯一一個無辜嘅女人判死刑。Roxie同Velma都不約而同地淆底，決定都係去搵Billy幫手。最終兩個人都成功獲得釋放。
Roxie當庭釋放嘅一刻，準備接受記者訪問，就有另一個女人响法庭外面開槍殺咗個男人，全世界嘅記者即刻掉低咗Roxie。最後，Roxie接受咗Velma嘅邀請，造成咗雙人歌舞團，以靚女殺人犯做賣點，成功出名。
故事好戲劇性，亦都刻劃出社會嘅世態炎涼。甚至我想用Cheesy嚟形容個故事，但係成套Musical都好靚，佢成功將廉價嘅cheesy演繹成一種「美」。
我個人覺得舞台劇係好睇過電影版，電影版將Roxie塑造到成個Dumb Blonde咁樣，而且感覺上無咁grand同fancy。
舞台嘅設計令到成個感覺好紙醉金迷，即使係晌監獄，入面唔係黑白灰好悶好規律嘅感覺，而係一種污糟但、令人血脈沸騰嘅混亂。睇過相關歷史背景，其實30年代嘅芝加哥真係咁樣，處處都有謀殺、處處都有罪惡，但處處都有機會，肯博就好可能可以上位。
成套劇我覺得最靚嘅一幕係女子監獄入面嘅Cell Block Tango。
呢隻歌係講6個監獄入面嘅靚女殺人犯嘅故事。佢哋各自都因為唔同嘅原因而殺咗自己身邊嘅男人（其中一個係無辜架，亦都係被送上絞刑台嘅一個）。交代完佢哋嘅故事之後，佢哋反複問 「你覺得我有做錯咩？如果你親歷其境，我肯定你哋都一樣會咁做」
He had it coming, he had it coming all along.
If you have been there, if you have seen it,
I betcha you would have done the same!
最有趣嘅地方係，聽完隻歌之後，就真係嬲佢哋唔落喎。
靚女一號因為男朋友／老公Bernie有啲令人煩厭嘅壞習慣（gum popping），有一日佢放工返嚟已經好燥底，同佢講「你試下再pop你舊香口膠啊拿」，然後Bernie pop咗… 於是靚女一號就响牆上面攞咗支槍落嚟，對住Bernie個頭開咗兩槍以示警告。電影版呢度處理得好好，因為佢安排靚女一號不停劃火柴，其實同gum popping一樣咁乞人憎。
靚女二號識咗個叫做Ezekiel嘅男人，Ezekiel話佢自己single，佢哋旋即打得火熱進入同居生活。但有一日靚女二發現 “Single? Single my ASS!” Ezekiel唔止結咗婚，仲有6個老婆！於是靚女二號响Ezekiel返屋企嘅時候，照常沖咗杯酒畀佢，毒死咗Ezekiel。
靚女三號一晚响廚房煮緊晚飯，佢老公突然衝入嚟大叫「你同送牛奶嗰個人有一腿!」根據靚女三號嘅講法，佢老公痴咗線然後自己沖埋佢把刀10次。
靚女四號就係唯一無辜嘅犯人。佢係唔識講英文嘅，唯一即係會重複 “uh-uh, not gulty!” 但佢愛人唔知點樣畀人開槍打死咗，入咗佢數。
靚女五號就係主角Velma，根據佢嘅講法，Velma發現咗佢老公同佢個妹竟然背住佢哋有染，佢太震驚斷咗片，去到自己將手上面嘅鮮血洗乾淨嘅時候先知佢哋已經死咗。
靚女六號認識咗一個畫家 Al Lipschitz， Al Lipschitz每一晚都會出去尋找自己，响佢尋找嘅過程入面會搵到Ruth啦、Gladys啦、Rosemary啦，仲有Irving。靚女六號話佢哋係因為Artistic difference而分手， “He saw himself alive, and I saw him dead”
He took a flower in its prime
And then he used it and he abused it
It was a murder but not a crime!I didn’t do it but if I’d done it
How could you tell me that I was wrong?
呢啲殺人故事好滑稽，令到你嬲佢哋唔落。加埋呢一段嘅排舞真係好出眾，靚女一至六號嘅獨舞再加雙人舞，再加埋之後嘅群舞，真係令人血脈沸騰。成個畫面都好靚好Grand。靚女殺人犯好靚但好嬲對佢哋各自嘅男人都充滿怨氣，然後殺咗人，嗰啲怨氣都無消失，反而係覺得「你怪我？佢哋班仆街自己攞嚟架」，係好feminene嘅力量嘅展現，又性感又有力。對我嚟講，有少少係我要成為 Strong and Independent bitch嘅啟蒙。
作為「新時代嘅女性」，呢套音樂劇畀我一種幾重為女性說話嘅感覺。歌詞入面都有好多解放女性、情慾自主嘅字句。除咗Cell Block Tango直情係力的表現之外，All that Jazz入面 “No, I am not one’s wife, but oh I love my life”、Nowadays嘅 “You can like the life you’re living, you can live the life you like. You can even marry Harry and Mess around with Ike. Isn’t it good?”都好似係鼓勵女人唔好諗咁多，世態炎涼，花無百日紅，啲嘢話咁快就會無，自己開心就好。
