Banksy展覽
只有對生活有體會的人才可能create art
第一次聽Banksy嘅大名，係睇卓韻芝嘅書（應該係）《推推推推推》嘅一篇文。嗰時應該仲係初中學生，已經經歷咗Phantom of the Opera嘅藝術啟蒙，但對於Contemp Art一竅不通。但卓韻芝嘅文將呢個名，呢個神龍見首不見尾嘅藝術家嘅形象，放咗響我心入面。
文中卓韻芝將Banksy捧得極高，我睇字嘅時候冇乜感覺。大概就係覺得Banksy應該係一個反叛藝術家，用Art反叛，做藝術界嘅野孩子。而藝術圈呢啲嘢大概就係鍾意標奇立異。 即使Google過Banksy嘅作品，感覺到唔係好大。係幾靚嘅，幾有意思，但可能係主觀覺得Banksy就係「執意要離經叛道」，所以都冇話好喜歡。
但我對於Banksy最欣賞嘅嘢，係卓韻芝提到：
某次他的女兒喜歡上了一對NikeJeremyHardy，他說喜歡的話，該自己造一對出來。如果你為人老師或父母，你該帶小朋友看看藝術作品，如果他們喜歡，就叫他們自己也試試造一些東西出來，如果他們很討厭Banksy，就叫他們創作一些東西來表達他如何地憎厭他，就只創作一句標題或一幅畫都好。創造反思的機會，使人情緒得以觸動，是任何藝術作品對世界的最大貢獻。
對於個陣時嘅嘅我，呢段說話對我好大影響。Art唔係精英嘅玩意，如果我有感受，我都可以創造一啲作品出嚟，創造反思、同觸動人嘅機會。我諗我而家寫Medium都係想做呢件事，想有人反思或者被觸動。我唔係大家，但我都可以同藝術扯得上關係。
終於聞名不如見面，尋日去咗睇Banksy嘅展覽。深深被觸動。
Banksy有好多同警察、示威、對抗有關嘅作品。正值香港多事，每個星期都示威、見血。見到啲作品真係好有感受，我見到或者我投射咗自己嘅憤怒、無力、傷感、委屈落去。
嗰啲情緒，我就唔响度講咁多，但睇緊嘅時候，我真係有種被救贖嘅感覺。
Banksy嘅作品，具體化地呈現咗我內在嘅情緒同痛苦，變成一件實際存在嘅物品。令我痛苦萬分、無以名狀嘅感受，一時之間就同我面對面。唔需要再靠內觀先見到，而係張開眼就見到。而且佢作品入面對呢啲嘅感受嘅描述，好準確。每一個細節，都代表咗我曾經感受過、感受緊嘅情緒。所有嘢突然清晰咗，我可以好容易就接受咗啲情緒同感受。
Banksy仲有好多唔同嘅作品，有啲係响傳統嘅風景畫上加上啲好唔協調嘅卡通人物，有啲講監控或者抗爭。但佢嘅作品全部都好有社會性。我睇緊嘅時候，有個好強嘅感覺，係Banksy一定係要對社會好有體會，好多情感，先可能創作力無限咁樣一件一件作品去創作。
就算唔係圍繞社會時事嘅藝術作品，只係最最最傳統嘅畫下山水畫下人像，其實都需要體會同睇法。必須要對生活、身邊種種嘅一切有所體會同感悟，先會有嘢想表達，繼而去創作。You must have something to say，所以先會用唔同方法去創作，去將你感受嘅嘢具體地呈現出嚟。
同樣地，作為接收者嘅觀眾，都需要有所體會，先會鍾意睇藝術品。因為有啲嘢無親身感受過，係無辦法理解或者感同身受。即係你無感受過痛，任何痛苦嘅形式或者描述，對你來講都冇意義。 所以觀眾自己都會要對生活有所體會先會睇得明，亦都由此先會有同你「夾唔夾」嘅作品。
有時唔係好了解點解有人會唔鍾意睇展覽，或者覺得「冇時間做Art」，因為藝術其實係一件鼓勵反思同努力去觸動人嘅事，抗拒藝術，就好似係講抗拒諗嘢同抗拒被觸動，咁樣嘅人，應該好容易慢慢地變蠢同變得唔Elegant。
Banksy作品亂列表：
●06年，他把五百張自製的ParisHilton唱片偷偷放在HMV。此舉早有人做過，吹脹的是他重新設計了封面「Paris全裸身+狗頭」，歌曲名稱包括《我為甚麼成名？》、《我到底做過甚麼？》、《我存在是為了甚麼？》，還找人為歌曲做了混音版。
●他曾多次將自己的作品偷偷放在各大美術館，讓人誤以為是展覽作品的一部份。作品有幾隻戴着墨鏡的死老鼠、一幅前面有警察封鎖現場膠紙的鄉村風景畫、仿EdwardHopper名作等等。
●塗上AndyWarhol圖案的牛；一頭活生生的牛。展示期極短，為怕隻牛「又熱又苦惱」。
●在各地遊客拍照熱點，噴上「這不是影相機會」字句。
●格林兄弟經典故事《糖果屋》──巫婆開門給小孩──改畫成米高積遜開門給小孩。
●為紐約一所酒店塗內牆，那是很多年前的事，當時他只為了得到一晚免費房間。
●為環保團體Greenpeace作畫，內容是漫畫人物被蒙上眼，站在荒凉的田園中。
●07Glastonbury音樂節，用一堆流動廁所製造「仿歷史遺蹟」，理由是「許多歷史遺蹟都有點廢，但這絕對是一堆糞」。
