關於練習 — 幾時嚟真？
同自己講過、同人哋講過、聽人哋講過、聽自己講過，好多嘢都唔係一蹴而就，要練習。 照顧好自己要練習、放低一個人要練習、對自己好啲要練習、唔抑鬱要練習…
於是每日練習。一心懷惡念，就練習提醒自己唔可以講出口；一想懶唔做運動，就練習說服自己出門口做Gym；一想將自己嘅價值同其他人掛鈎，練習話俾自己知唔係咁樣… 反覆練習，一次做得比一次好。
成日諗，咁到底幾時先真係「嚟真」唔係練習呢？我練琴練波練舞，都有一刻係「嚟真」去表現或者比賽，咁到底我人生嘅咁多習題，幾時先係真正需要做到個一刻？所有練習到應該係有個目標，所有嘢都應該serve個purpose架嘛？ 我嘅人生應該係養兵千日，用在一朝，要有一刻所有嘢都突然講得通，原來我之前點點點係要成就嗰一刻嘅事。
但照顧自己對自己好呢啲嘢，點樣用在一朝？放低一啲人一啲事嘅練習，個purpose又係乜嘢？ 所有嘅過程係咪應該係有個終點？如果冇「派上用場」嘅一刻，咁要點算？
早幾日，發現一件大褸嘅鈕扣有啲鬆脫嘅跡象，打開針線盒縫返好佢嘅時候，忽然又開始思考呢樣嘢。針黹自細幾好，媽媽教咗啲基本針步之後自己好有興趣研究，整過袋、公仔、做過衫。但其實學針黹拎住塊布日日練習咁多無一刻係「嚟真」，聯返好粒鈕扣個一個時刻係咪嚟真？見住當時男朋友用封箱膠紙痴住個爛咗嘅褲袋想著條褲忍唔住出聲話幫佢搞個下係咪嚟真？定係大仙衝入自己房要你响MO前幫佢補返條西褲個下嚟真？
如果要我將好多嘢都當做練習，人生到底幾時先嚟真？
正能量寶寶可能會話「YOLO 你嘅人生而家就嚟真架喇」。但一旦所有嘢都係「嚟真」，我會俾自己好大壓力，所有嘢呢一刻就要做到我理想中咁樣，會痴線。所以我先練習去接受「所有嘢都係練習」。
唔知一開始同我講佢我將啲事情當做練習嘅人，有冇思考過呢個問題。
可能有啲嘢，唔需要「嚟真」。因為其實件事本來冇乜意義，唔需要有一個purpose，我練極pole dance都應該唔會有一刻我真係需要識pole dance，除非我真係窮到燶要做stripper？ 我練極波都應該唔會有一日真係需要我識打波，打波永遠都只係興趣唔會「有用」。
迷信「有用」，其實係我迷信「故事」，故事有起承轉合，有鋪排，作者安排得一定有用意。但講故事嘅人同聽故事嘅人，其實都係得我自己。
又或者可能係，因為個世界唔存在「最好」，所以永遠都有進步空間，而我每一日都去練習就係「以有涯隨無涯」咁樣。
再或者可能係，人生本來就係求舒服，身體舒服心理舒服，每次練習都係想令自己長遠舒服啲，所以練習唔抑鬱、練習放低啲人同事都係想舒服。而每個階段令人舒服嘅嘢都唔一樣。
朋友話，一念起一念滅，其實你諗咁多都係咁，只係好似睇住自己啲念頭浮起然後消失，再有其他念頭出現，你都係死返去打坐啦。 打多啲你就可以活在當下，唔會諗咁多壞腦嘅嘢，練習下靜心啦。
又係練習，又係冇答案。
我都係未練習好接受人生無答案，或者練習好靜靜地所謂嘅活在當下有耐性。
