錫住我啲朋友嚟用

呢幾日時不時有人問我願唔願意做聯署發起人，或者問我「點解你仲未做ABCDE」。其實我今日先啱啱考完兩個法律考試，過去嘅兩星期如非必要都盡量足不出戶讀書，壓力好大。讀書考試如期畢業一定係我而家最優先嘅事。而香港嘅事，唔係唔重要，只係唔係最優先。

有個好強烈嘅感覺係身邊有一部份人，都會好期待一啲大家比較熟悉嘅面孔去帶頭做一啲嘢。因為有一群人做慣做熟，一向都係佢哋做，所以理所當然地覺得一樣都係由佢哋做。但呢一班熟手技工，其實每一個都曾經係一張白紙，都係唔識未試過。只係佢哋基於唔同嘅原因，覺得唔對路，覺得個社會有問題，想改變想見到個地方變好，於是膽粗粗去做，慢慢就變成大家熟悉嘅面孔。

如果你會問人「點解未做ABCDE」，如果你覺得有啲嘢應該要出現而遲遲未見蹤影，其實你可以去做。

有啲位我知道會有好多顧慮，熟悉嘅面孔好多時都唔介意攬上身，橫掂個底都花晒，咪落自己個名。但要佢哋攬上身，唔好要佢哋做得咁辛苦好無？如果你係想做嘢但怕上身，咁你可以drraft好一份聯署、準備好一啲需要嘅嘢，然後用熟悉面孔嘅名字。越多人做，越多人願意做，對每一個人嚟講風險就越低，呢個道理應該個個都知道架。

我覺得有一樣嘢好可怕，有啲人會覺得你一旦試過拋個身出嚟做，你以後就要做落去。以後，你就要有責任一直follow落去，唔可以有其他優先嘅事。但咁樣唔係大家最討厭嘅大台同老屎忽咩，唔係一直都講緊群眾自發咩。點解要問「你點解唔去做ABCDE」「XXX去咗邊」「佢唔上水好過分」。

關心社會係應有之義，唔係一小撮人嘅責任或者義務。眼見好多朋友其實為咗生活或者學業疲於奔命，都仲要捱更抵夜去攪咁多嘢，好心痛架。

自己身在異地，見到同窗舊友放工之後去開站，開站嗌咪嗌到失聲，然後仲有精力同我商量點樣幫母校啲師弟妹設計文宣，啲字點寫好，都唔好意思話自己考完試呢邊夜晚時間要訓覺，快手起埋貨先去訓覺。

錫住佢哋，ok?