由本土派少女去到中女嘅反思

早幾日，同曾經同我做咗一個訪問嘅記者傾偈，諗返起曾經有一篇叫做《一個20歲本土派少女的反思》嘅故仔。

當時我20歲，經歷人生第一次修正自己嘅思想、思辨方法嘅過程。 而家睇返，原來兩年幾三年，我又再一次或者好多次改變咗我嘅諗法。

「我們已經付出好多心機，好多人受傷、被打，但最後還是被踩到上心口。」鄺頌晴形容佔領運動的失敗令她感到屈辱。

唯獨係呢個感覺同我塊面，一樣無改變過。都係好屈辱、都係好圓。唯一唔同嘅係，屈辱而家唔係來自失敗，而係來自無力。我無能力去令任何人好過啲；响身邊人等上庭入獄、流亡，所有行動、說話、安慰都只係顯得軟弱無力，我無能力去分擔任何事。

睇番訪問入面，口中曾透露過嘅每一粒字、每一個諗法，再同自己而家嘅諗法比較一下，兩年後已經脫胎換骨。 但唔似20歲嘅時候，想全盤否定自己曾經相信過嘅嘢。

20歲前，我用自己把尺度人而不自知。20歲，我發現自己手上面原來有把尺。22歲，我盡量提住自己手上面有把尺，盡量要自己少啲嗲，但唔代表我冇睇法冇comment。

當年，我覺得「原來很多事情真的沒有絕對正確或錯誤的。」、「很多時候，大家理據都無錯，只是站在不同位置看事情。」到而家我都一樣相信，事情係冇正確同錯誤，或者對錯係不可知，或者對錯只係我哋因應生存而制定出嚟嘅標準。但有一樣嘢叫做「選擇」。

係呀，又係老土嘅「愛就係選擇」。你可以去選擇一套理念，而你要堅守到尾。你會理解其他人嘅選擇，你都知道你唔係啱晒，但你都係要貫徹你嘅信念，為咗你嘅城市、為咗你想像中嘅美好將來。即使我知道你背負嘅，同我唔一樣，我會明白，但咁樣唔會阻止我去貫徹我嘅信念，更加唔代表你可以阻止我。

自從我發現大部份人做嘅選擇都係基於「唔想死」、基於覺得咁樣就可以响社會生存而作出決定，我對人嘅包容大咗好多，應該講，我無咁容易因為「人」而嬲。 所有人，再仆街嘅行為都好，佢哋都好少真係立心不良，佢哋只係想生存。生存係一種狀態，無啱錯嘅分別。自此，我就好難真係嬲一個人（除非佢傷害我身邊嘅人或者搞到我）。

認知到呢一點，就真係開始識得選擇自己嘅理念，同時知道其他人選擇其他理念其實都係「唔想死」。而你會全心全意，推廣自己嘅理念，希望更多人可以相信自己果套先可以真係做到「唔好死」。

抱住自己嘅信念，同時認知到自己嘅信念唔係絕對，但又要選擇貫徹信念。呢個係一個好delicate嘅Balance。我都唔係好識用文字形容。

*標題嘅「中女」起源於當年訪問出咗之後，我send咗畀一位老師睇，佢話期待我幾年之後身為中女嘅諗法。