漢堡唔用儲值卡搭車
一開始好麻煩，而家幾欣賞。
身為學生，一定會有張學生證同埋學生車飛，响香港用嘅係一張有sensor嘅學生證同學生八達通。
响Universität Hamburg，我哋嘅學生證同Smester Ticket係連埋一齊嘅。
而我哋嘅學生證連同Semester Ticket，係 一 張 紙。
學生證連埋Semester Ticket係一條紙條，將佢對摺之後都唔係一個可以可以放入銀包嘅size，要再摺下個邊。呢張要用半年有多普通嘅紙，仲寫到明唔准過膠。大佬，咁點keep好佢呀，每次上車都要拎出嚟，用兩用就變成梅菜咁啦。
我第一次收到呢張紙，想將佢小心翼翼咁撕落嚟嘅時候，已經撕爛咗…
當時只有仰天長嘯嘅衝動，點解～～～～ 點解得張紙？
UHH作為全漢堡最大嘅大學，竟然俾張紙我？其他學校嘅同學係有張卡架，點解會俾張紙我就算？ 港孩表示不能接受～
但而家發現，唔用卡，出入唔使拍卡，其實係一個德政。
除咗出入法律系圖書館要用一張圖書館證拍卡之外（因為淨係法律系學生先可以用Law Library），其他地方其實都係暢通無阻，完全無程序要過。
即係話，無人知道我去過邊度啦。無人知我幾點搭過咩車，响邊度落車。
未有Semester Ticket之前，冇儲值卡用，我一開始覺得好麻煩，去邊度要買飛，仲要大費周章請人去查飛，覺得歐洲搞咩咁落後。
而家就覺得其實咁先好，無人知道我去咗邊，少咗紀錄我嘅Data。其實真係一個幾保障私隱嘅做法嚟。同埋有時睇住查飛嘅人同逃飛嘅人嗌交，係好有趣的 （花生mode）。同埋即係廢青去完集會乜乜乜，唔怕畀人知搭咩車咁囉，雖然都係有鏡頭有其他嘢架喇，但少一樣好過無。
當然晌香港都可以嘅，只係用八達通會平啲（學生嘛，買飛要買成人飛了），同埋好多時見到部機圍住一班講普通話嘅人，搞成10分鐘到未買到一張尖沙嘴去旺角嘅飛，真心冇耐性排隊呢。
