有一杯咖啡叫做Dirty

短暫返過一間文青咖啡店嘅Part-time，認識咗好多關於咖啡、咖啡店嘅小知識，亦都從此唔係緊急需要咖啡因都唔再飲Starbucks咖啡。

講起點解會返呢間咖啡店都真係幾有趣。有一日，我第一次去買咖啡嘅時候，唔小心一嘢倒瀉咗大半杯，尷尬到嘔。從此舖頭嘅店長同同事都認得我，去到嘅時候會傾兩句偈。

有一日，心情唔好想去飲杯咖啡，其中一個咖啡師就問我有冇興趣返Part-time。因為自己本身就想學沖啡，當時又要搵part-time所以就好快應承咗。去見工果日，店長就同我介紹鋪頭會賣咩咖啡 — Americano、Flat white、Latte、Piccolo、 Machiato同埋Expresso，仲有一種叫Dirty。店長話Dirty係一種新嘅飲法，係將Expresso倒入凍奶入面，唔會攪勻，飲嘅係個shot同奶嘅分層。

返咖啡之前，我一直最愛嘅咖啡都係Flat White，薄薄嘅奶泡加埋Nutty嘅啡，真係無與倫比嘅好飲。不過去到真係返工，每日有兩杯Free Drink，同事沖咗一杯Dirty畀我飲之後，我宣布Dirty先係我嘅最愛。

一直都好討厭飲牛奶，細個媽媽會買定鮮奶，逢星期一三五早餐就要飲牛奶，星期二四就係飲豆漿。本來星期一二三四五都係飲牛奶，但我同家姐都不斷抗議先變咗兩日飲豆漿。個陣返學之前，我會偷偷地倒咗啲牛奶或者直情成盒拎返學校畀同學飲。

但Dirty嘅凍奶底加埋一個好嘅shot，係可以令我完全唔嫌棄牛奶個陣奶味，仲會好樂意飲晒成杯。不過呢，如果奶唔夠凍會係一個災難，我試過响舊公司嘅IFC分店叫咗杯Dirty，佢畀咗室溫嘅奶底我… 個杯嘢我最尾無飲晒。唔夠凍嘅Dirty，同飲半熱不暖嘅奇怪鮮奶咖啡混合體一樣，似Latte唔似Latte，真係好難飲。之後仲訕訕地返自己鋪頭扭計投訴話點解另一間舖頭俾杯室溫嘢我。

只可惜，香港好多地方都唔做Dirty。試過去其他咖啡店，同佢講要杯Dirty佢話無，佢問我咩係Dirty，解釋完之後佢出咗杯Iced Latte畀我。我拎住杯嘢，淨係想仰天長嘯，我都話無嘅話冇所謂畀杯Flatwhite我一樣，點解你要畀期望我然後畀杯Iced Latte我…

返緊呢份Part Time嘅時候真係學咗好多咖啡相關嘅嘢，稍稍開發咗自己嘅咖啡味蕾，然後發現呢啲嘢返唔到轉頭。你會開始留意到打奶太熱太凍，杯啡都會唔好飲，要差唔多55度先啱口味；你會開始留意啲tasting note同埋自己味蕾嘅反應係咪match；會開始轉口味接受Coffee is a fruit，肯飲多咗有果香（aka酸味）同Floral嘅豆；你會開始問人哋用咩豆… 係一條不歸路。

今朝9點幾返到Office，見到靚仔同事已經飲緊第二杯Expresso，忍唔住邊講笑話自己要重新考慮自己係咪真係啱做research，邊打開雪櫃攞啲牛奶出來嘅時候，猛然發現 — 其實可以整Dirty，本身因為落雨無陽光嘅鬱悶心情，即刻180度反轉，幾何級數上升。

一杯Dirty可以起到轉換心情既效果，開心。

無咩事我返出去睇埋啲paper先 :3