冇內置開街站功能嘅人

感激所有曾經同現存 願意落水嘅素人寶寶

呢排忙住同Labour Law & Company Law考試搏鬥，日日拎住啲case係咁背，閉關溫書。早幾日溫書溫到一半嘅時候，電話突然瘋狂震動，一下子收到7,8個messages。拎起嚟睇，見到係一個响另一個城市嘅朋友B，B話想就住《逃犯條例》做啲嘢。

我一貫忙緊嘅回應「你覺得好就去做」。 以後B就開始發問，問我要點做呀要準備啲咩之類。嗰吓溫書溫到半死，有少少燥底，心入面唔係好明啲咁基本嘅嘢點解要問，遊行你咪去準備banner、直幡同大聲公囉，街站你咪準備小露寶同埋傳單囉，做咩事呀。仲有呀，時間上仲有10幾日，呢邊唔使不反對通知書架，咁趕做乜嘢呀。

對住個mon咬牙切齒咁樣耐心覆晒佢。然後B一句「其實我未搞過呢啲」，#shockedface

未搞過? 乜唔係個個都搞過架咩！ B響呢邊做緊學生會架喎！邊有可能！

嗰一刻，我先醒起，係喎其實係我習慣咗同溫層入面個個都係好打得嘅社會運動員，隨手拎起個咪就可以頂幾個鐘。其實我哋呢班人先係唔正常架，正常人係唔使做呢啲嘢架。

即刻收起所有不耐，同佢研究點樣做呢件事，應該用咩point去打動啲居德嘅香港人甚至德國人，點樣先夠貼身同點樣靠嚇去嘗試令佢哋關心。

啱啱加入鍵盤戰線嘅時候，我都係有一大堆念頭同埋橫衝直撞嘅衝勁，好多嘢覺得啱就要去做，就衝去做。搞搞下嘅時候先發現，唔係喎其實我唔知應該點做，然後去問成員搵佢哋求救，甚或要成員幫我執手尾。（我記得第一次搞立法會集會，我直情係喊到收唔到聲哈哈哈哈。）

呢啲嘢曾經都有人手把手教我架，逐個逐個Point同我執。雖然一直都未Master得好好，但百_成材，我比以前真係做得好咗好多。而家到我好似個老屎忽咁同人討論邊啲嘢要講，邊啲嘢其他人冇興趣，感覺有啲怪囉哈哈。

但嗰一份使命感 — — 覺得啲嘢唔對路，我要做啲嘢去幫手去Make change嘅衝動，其實係冇得教冇得學。世界應該冇人天生就Built-in 街站功能，但呢份使命感應該人人Built In。呀，其實唔係使命感，係一份正義感、分辨對與錯嘅能力。

只係，有人願意落水，有人願意搞事，係好感動。
但係呢，一個地方要幾唔正常先會令到遠在他方嘅人都覺得「唔掂了我要做啲嘢」？
如果有一日，香港唔需要咁多內置街站功能嘅人，唔需要咁多素人突然想做啲嘢，咁樣先係大家樂見嘅社會。