偷偷摸摸地做倡議工作

純粹講下我做「滑鼠娘娘」嘅無聊嘢。

一開始加入鍵盤戰線嘅時候，仲係學生妹一名，中4升中5。

13年嘅時候，政府會搵我哋開會，同我哋傾吓份草案，通常都係揀平日夜晚放工時間後。個陣屋企好嚴，無咩事都好少有得出街玩，何況係平日夜晚，更加唔敢同屋企講係搞版權法。

所以啲會幾乎全部係瞞住屋企人去開。嗰陣時因為要應付公開試，所以一個星期有幾晚都要補習。而補習就成為咗我最好嘅掩護 — 應該去補習嘅時間我去咗開會，預啱補習完返屋企嘅差唔多時間返到屋企，扮補完習。個陣仲會放多套衫响書包，去開會嘅時候唔使著住校服。

開會嘅時候，政府啲官會買定晚餐（通常係Pizza）俾我哋，邊食邊傾，討論下開放式豁免、版權人態度之類。呢啲會一開要開好耐，我通常都要中途離場趕返屋企。當我表示要離場返屋企嘅時候，啲官會好似親戚咁樣叫我小心睇車返到屋企早啲訓。

對咗幾年，私底下都會寒喧傾計，當時佢哋知道我考試考得好、入咗港大，仲特登買咗Brownie畀我食住開會恭喜我。 今年見到其中一個當年同我哋成日交手嘅官員升職，做咗版權署署長，鍵盤戰線都真係恭喜佢嘅。

記得有次周博賢搵我哋上佢節目，我又係走咗補習去數碼港，然後狗衝搭的士要9點半之前返到去屋企，不然時間對不上。之後上到大學住Hall，幾點返去屋企人根本唔會知，所以就再無需要偷偷地去開會了。

而家講返出嚟，有少少好奇到底爸爸媽媽知唔知我成日偷偷地唔補習，又知唔知我冇去補習唔係去咗玩而係去做呢啲奇怪嘢，定係知道但唔出聲。如果佢哋知道咗，會唔會罰我，我又唔係去行街玩。 佢哋對個女咁樣，有冇意見。不過而家我都大學畢業，佢哋應該唔會翻舊帳罰返我嘅。 （但浪費咗啲補習費係真嘅，對唔住啊啊啊啊）

呢啲小事諗返起真係好開心。

The Rest is History。做咗發言人／滑鼠娘娘，死好命拉冧咗條Bill，然後而家繼續做碌左去讀歐盟法。