「你廢唔係問題」
「你廢唔係問題，但唔好將你廢邊成其他人嘅問題」
呢句說話係一位辦事能力極高嘅前輩同我講的。當時我明顯就係闖咗禍，而且係一鑊翹起全世界嗰種程度嘅禍。
衰衝動，一頭熱去做一啲嘢，但自己冇自知之明，無秤吓自己有幾多斤兩，衝出去柒，出咗事，要勞煩前輩同其他人執手尾。 我當時覺得有啲委屈，覺得太多嘢唔係我預測之外，我都冇辦法控制。想開口解釋，執緊手尾嘅前輩一句 “Details of your incompetence do not intererst me”。
前輩言下之意即係我唔好咁多嗲啦，更加委屈，即刻喊。
咩喎，我都係想幫手，我都好努力。前輩反咗個白眼，話「乜而家我哋開Evaluation咩，而家當務之急係幫你搞返啱件事。你廢唔係問題，但唔好將你廢變成其他人嘅問題。」
唔敢再出聲，默默等佢處理，聽佢吩咐改返晒啲嘢。睇住其他人就extra做多好多嘢幫我補鑊，先發現自己之前「一頭熱」有幾天真，唔敢再衝動唔識都夾硬自己做，唔問人或者問咗唔聽人講嘢。更加明白「唔好將自己廢變成人哋嘅問題」係幾重要，因為冇人有義務幫我執手尾，佢哋大可以睇住我死，只係佢哋錫到我燶／逼不得已先落水幫我。
件事處理得七七八八之後，前輩同我傾計，問我有冇嘢要同其他人講/解釋，我諗咗一陣，本來個啲委屈一句都唔想再講，覺得慚愧要人幫我執手尾。佢哋先應該最委屈，唔係佢哋開嘅頭，但佢哋就要執手尾，因為佢哋嘅其中一員，即係我，闖咗禍。
“I am sory, I screwed it up. Thank you for fixing it for me.”
做錯嘢，就道歉、認錯。添麻煩俾人，就道歉、認錯。
同埋，人哋同你執手尾條氣都順啲呀，唔係應份架嘛。
呢單嘢之後，禍我都係繼續瘋狂闖。
但每次衝出去柒之前，會諗一諗到底自己係咪worst case scenario都處理到，如果唔得就要開口問人點算。而且知道自己唔識就要聽人講，唔好自己自把自為。當然，都係有無數次要大佬們執手尾。但起碼要即刻跪同認錯，然後改，唔好要人執手尾執得咁辛苦。
隨著越來越耐嘅年資，慢慢都由「成日要人執手尾」嘅小輩，變老成為「耐唔耐都幫人執下手尾」嘅小輩。
由會破口大罵始作俑者公審佢，收咗火去到只會講「唔係你一頭熱，其他人就奉旨要幫你，你開嘅頭要其他人埋尾，唔公道呀」。有種話緊以前嘅自己既感覺。自己响個過程發現自己細個真係麻撚煩到極致，話就話人仆下仆下就會大，但我都未免製造得太多麻煩。
話雖如此，近日我遇到千年難得一遇嘅執手尾事件，我發現，我都真係唔係極品。極品係 — 一頭熱衝出嚟，出咗事 ，有人執手尾；始作俑者再闖禍兼且覺得委屈，一個轉身再闖禍，又有手尾跟，loop到2046。 去到一個位，所有人撒手不管，決定放棄。
所以呢篇文係作指桑罵槐之用的。
