《一代宗師》：念念不忘
王家衛係我最喜愛嘅導演，《一代宗師》係咁多部作品入面最喜愛嘅一套。其次係《東邪西毒》、《花樣年華》同《2046》。
社運圈嘅人好鐘意引用電影入面嘅一句「念念不忘，必有迴響」去鼓勵自己同其他夥伴，要堅持自己做緊嘅運動、要繼續努力，「留一口氣，點一盞燈，有燈就有人。」電影入面，呢一句「念念不忘」講嘅係作為一代宗師嘅主角們，點樣响大時代入面選擇去留，點樣將武藝薪火相傳或者點樣失傳。
本來電影嘅版本梁朝偉做嘅葉問戲份比較多，但章子怡飾演嘅宮二比葉問要更加突出。原版宮二傳一般，成齣電影側重咗去宮二嘅故事。 仲有張震飾演嘅一線天，全套電影鏡頭好似只得3幕，但起左「做裡子」嘅作用。 去到3D版故事結構性平衡返一啲。
自己最喜歡宮二呢個角色，更加喜歡佢同葉問之間嘅對比。兩個練武之人，一個宮家名門之後，一個跟住陳華順學詠春；一個性格火爆，一個比較柔韌有餘。葉問响金樓打敗咗佢爸爸宮保森之後，宮二一句「宮家無敗績」，一個女子設下霸王夜宴搵葉問單挑。葉問應約到場，宮二惡狠狠咁話「可惜了這一屋子的精緻」，葉問回道「功夫應該係纖毫之爭，真係打爛嘢，當我輸」。兩人開打，宮二一幕入面疑似要跌落下層，葉問立即伸手將佢扶住，但宮二即刻把握機會拉葉問落去，最後葉問踩壞咗一級樓梯，認輸。 每次睇呢一幕都覺得宮二耍賴，而葉問就你死靚妹咁嘅感覺。
然後宮二返回北方，同葉問開始書信來往，信寫得極優美浪漫：
「一約既訂，萬山無阻 」
「郎心自有一雙腳，隔江隔海會歸來」
「葉底藏花一度，夢裡踏雪幾回。」
兩人過招之後對對方念念不忘，好多人都估兩個人係互生情愫，但王家衛有一次做訪問表示宮二對葉問係有意，但葉問對於宮二只係英雄間嘅惺惺相惜。據講，葉問响廣東做咗大樓畀自己同老婆張永成，就係想同佢一齊去北方再見識宮家六十四手。
但適逢日軍侵華，葉問無辦法離開廣東。由於佢唔肯被日軍政府招安，佢嘅日子由一個少爺仔變成一個勞動階級嘅生活 — 拮据至要斬咗練功嘅木人樁、賣咗做好嘅大褸、要去金樓問人攞剩菜畀屋企人。葉問有一句對白係話「如果人生有四季，四十歲前，我的人生都是春天，四十歲後都係冬天」去形容呢個轉折。
至於宮二，佢嘅大師兄馬三投靠日軍政府，成為漢奸，同師傅宮保森反目，宮保森對佢循循教誨嘅時候更加殺咗宮保森。宮二想為父親報仇，但身為女人，加上佢有婚約在身，理應唔可以當係宮家人，門派嘅叔父輩全部睇佢唔起。宮二立心要為宮家報仇，但報仇嘅話就要入道、推掉婚事、發誓終身不嫁不育不傳藝。宮二用一句「不要來打探我，沒有消息就是消息」推咗婚約，去到佛堂暗自同自己講，如果見到一盞點著咗嘅佛燈，就等於爸爸想佢報仇。
之後，宮二响年三十晚，去到火車站等馬三出現。用咗宮家六十四手將馬三大敗，馬三身受重傷迸出一句「宮家的東西，我還了。」，宮二回應「話說清楚了，不是你還了，是我自己拿回來的。」嘴上功夫都唔可以輸。但此役宮二亦都身受重傷，一返到去就吐血。
之後宮二去到香港行醫，而葉問亦都輾轉落到香港開班授徒。兩人响香港重遇，兩人响戲廳見面嘅時候，葉問攞出當年做咗嘅大褸嘅一粒鈕扣，同宮二講當年係真係諗住去東北見佢。宮二聽住戲，若有所思咁講：
「風流本就是個夢。有人說絲不如竹，竹不如肉，唱得遠比說得好聽。當年要真硬著性子把戲學下去，我定會是台上的角兒。千迴百轉，亦悲亦喜。唱膩了楊門女將就換遊園驚夢唱著。那時候，你在台下，我唱你看。想想那樣的相遇，也怪有意思的。」
「我怕到時候一票難求啊。」
「您真捧場。你看戲，我送票。」
「其實人生如戲。這幾年，宮先生文戲武唱，可是唱得有板有眼，功架十足。可惜，就差個轉身。」
「想不到你把我當戲看。我的戲，不管人家喝不喝彩，也只能這樣下去了。今晚請您出來，也是想把該了的事了一了，該說的話說一說。」
「宮先生要出門？」
「在北方有句老話：人不辭路，虎不辭山。這些年，我們都是他鄉之人。我是真的累了，想回老家。臨走前，有樣東西要還給您。六十四手，我已經忘了。我在最好的時候遇到你，是我的運氣。可惜我沒時間了。想想說人生無悔，都是賭氣的話。人生若無悔，那該多無趣啊。葉先生，說句真心話，我心裡有過你。我把這話告訴你也沒什麼。喜歡人不犯法，可我也只能到喜歡為止了。這些話我沒對誰說過，今晚見了你，不知道為什麼就都說出來了。就讓你我的恩怨像盤棋一樣，保留在那兒。你多保重。」
「人生如棋落子無悔。我們之間本來就沒恩怨。有的只是一段緣分。你爹講過，念念不忘，必有迴響，有燈就有人。希望有一日，我可以再見宮家六十四手。」
葉問一句「差一個轉身」，想勸宮二唔好繼續執拗。宮二回絕咗佢嘅好意。
然後兩人响香港嘅橫街窄巷並肩而行，臨別前宮二同葉問講「我爹常說，習武之人有三個階段：見自己，見天地，見眾生。我見過自己，也算見過天地，可惜見不到眾生。這條路我沒走完，希望你能把它走下去。」
然後佢哋從此無再見過對方。
宮二之後幾年病逝一生不嫁不育不傳藝，葉問就一生桃李滿門。
宮二嘅執拗真係令人好動容。因為「宮家無敗績」，所以去金樓設宴去到表白，宮二仍然係有一種女兒家嘅執拗同傲氣，唔低頭，但好優雅同大方。嗯，我鍾意你，但僅此而已，我只係想話你知。
「所謂的大時代，不過就是一個選擇，或去或留。我選擇了留在屬於我的年月，那是我最開心的日子。」
呢句對白，就係宮二一生嘅寫照，佢選擇唔低頭，走自己認定嘅路。宮二嘅執拗，令身邊人都覺得痛心，每一個人都心痛佢或者想佢拋開呢啲嘢，可能佢有一絲猶疑後悔過，但佢覺得自己無得揀，覺得佢就係要走呢條路。走到尾，佢都係甘之如飴。只係都忍唔住要留一個輕輕嘅註腳，「我心裡有過你」。
對比起葉問，人到屋簷下不得不低頭，生活同現實慢慢改變咗佢。而佢冇宮二咁多包袱同負擔，佢背負嘅唔係家族情仇或者咩原則，佢背負嘅只係自己。或者應該講，佢選擇無俾任何嘢困住自己。
但無論一個人點選擇，選擇似葉問抑或宮二，由選擇嘅一刻開始，以後只有眼前路，無身後身。葉問抑或宮二，都係對過去念念不忘，只係不忘過去嘅乜嘢有分別。
「我踏出這一步的時候，我以為有一天我還會回來。想不到那次是最後一面，從此我只有眼前路，沒有身後身。」
